ఎస్బీఐ నుంచి మరో ఐపీఓ వచ్చేస్తుంది.. ఛైర్మన్ కీలక ప్రకటన

స్టాక్ మార్కెట్లలో పెట్టుబడులు పెట్టే వారు ఎక్కువగా ఐపీఓల్లో కూడా ఇన్వెస్ట్ చేస్తుంటారు. ఇక్కడ లిస్టింగ్ గెయిన్స్ ఎక్కువగా ఉంటాయని చెప్పొచ్చు. ఏదైనా కంపెనీ తన షేర్లను విక్రయించడం ద్వారా పబ్లిక్‌లోకి రావడాన్ని ఐపీఓ అంటారు. ముందుగా నిర్దేశించిన ధరకు ఇక్కడ నిర్ణీత షేర్లను కొనుగోలు చేసేందుకు బిడ్స్ దాఖలు చేయాల్సి ఉంటుంది. అందుబాటులో ఉన్న షేర్ల కంటే ఎన్నో రెట్ల షేర్లకు బిడ్స్ దాఖలవుతాయి. అందులో లక్కీగా షేర్లు అలాట్ అయిన వారికి మంచి రిటర్న్స్ వచ్చేందుకు అవకాశం ఉంటుంది. ఇక ప్రముఖ కంపెనీల నుంచి ఏదైనా ఐపీఓ వస్తే రెస్పాన్స్ ఊహించని విధంగా ఉంటుంది.ఇటీవలి కాలంలో టాటా క్యాపిటల్, బజాజ్ హౌసింగ్ ఫైనాన్స్, గ్రో లిమిటెడ్, మీషో ఇలా పలు ఐపీఓలు అదరగొట్టాయి. ఇప్పుడు మరో ప్రముఖ సంస్థ నుంచి పెద్ద ఐపీఓ రాబోతుంది.

అదే స్టేట్ బ్యాంక్ ఆఫ్ ఇండియా  అనుబంధ సంస్థ మ్యూచువల్ ఫండ్స్ విభాగం, అసెట్ మేనేజ్‌మెంట్ కంపెనీ అయిన ఎస్బీఐ ఫండ్స్ మేనేజ్‌మెంట్ లిమిటెడ్. ఈ ఐపీఓ గురించి కొంత కాలంగా విస్తృతంగా వార్తలు వస్తున్న సంగతి తెలిసిందే. తాజాగా దీనిపై స్వయంగా ఎస్బీఐ ఛైర్మన్, తెలుగు వ్యక్తి సీఎస్ శెట్టి కీలక ప్రకటన చేశారు. రాబోయే 12 నెలల్లోనే అంటే సంవత్సరంలో ఎస్బీఐ మ్యూచువల్ ఫండ్ ఐపీఓ లిస్టింగ్ ప్రక్రియను పూర్తి చేయాలని లక్ష్యంగా పెట్టుకున్నట్లు తెలిపారు.

ది ఎకనామిక్ టైమ్స్‌తో ఒక ఇంటర్వ్యూలో భాగంగా శెట్టి ఈ వ్యాఖ్యలు చేశారు. ప్రస్తుతానికి ఎస్బీఐ మ్యూచువల్ ఫండ్ ఐపీఓను పూర్తి చేయడమే తమ లక్ష్యంగా ఉందని.. ఇతర ఐపీఓలు, వాటా విక్రయంపై ఎలాంటి ఆసక్తి లేదని స్పష్టం చేశారు. ఇదే సమయంలో ఆయనకు మరికొన్ని ప్రశ్నలు ఎదురయ్యాయి. ఎస్బీఐకి కొత్త మూలధనం అవసరమా అని ప్రశ్నించగా.. రాబోయే ఐదేళ్ల వరకు అవసరం లేదని శెట్టి సమాధానం ఇచ్చారు.

ఎస్బీఐ మ్యూచువల్ ఫండ్ ఐపీఓ ప్రణాళికల దశలో ఉంది. మర్చంట్ బ్యాంకర్ల నియామకంపై దృష్టి సారించింది. ఈ ఎస్బీఐ ఫండ్స్ మేనేజ్‌మెంట్ లిమిటెడ్ అనేది ఎస్బీఐ, అముండి జాయింట్ వెంచర్. ఇందులో భాగంగా రెండూ కలిపి 10 శాతం వాటాను ఐపీఓ కోసం అందుబాటులో ఉంచనున్నాయి. ఎస్బీఐ తన 6.3 శాతానికి సమానమైన 3,20,60,000 షేర్లను ఐపీఓ కోసం విక్రయించనుంది. మరోవైపు అముండి ఇండియా హోల్డింగ్.. 3.70 శాతం వాటాకు సమానమైన 1,88,30,000 షేర్లను విక్రయించనుంది. ఎస్బీఐ నుంచి చాలా కాలం తర్వాత వస్తున్న ఈ ఐపీఓ కోసం ఇన్వెస్టర్లు ఎంతగానో ఎదురుచూస్తున్నారు.