మూడంతస్తుల బిల్డింగ్ పై నుంచి దూకిన మహిళా కానిస్టేబుల్

హైదరాబాద్ నగరంలోని ఉప్పల్ పోలీస్ స్టేషన్ పరిధిలో ఒక విషాదకర సంఘటన చోటుచేసుకుంది. పద్మావతి కాలనీలో నివసిస్తున్న ఓ మహిళా కానిస్టేబుల్ తన నివాసం ఉంటున్న భవనం పైనుంచి దూకి ఆత్మహత్యాయత్నానికి పాల్పడటం స్థానికంగా తీవ్ర కలకలం రేపింది. వృత్తిరీత్యా రక్షణ కల్పించాల్సిన పోలీసులే ఇలాంటి నిర్ణయం తీసుకోవడం చర్చనీయాంశంగా మారింది.

యాదాద్రి భువనగిరి జిల్లా బీబీనగర్ మండలం రవి పహార్ తండాకు చెందిన ప్రమీల, 2020 బ్యాచ్‌కు చెందిన పోలీస్ కానిస్టేబుల్. ఆమె ప్రస్తుతం నాచారం పోలీస్ స్టేషన్‌లో విధులు నిర్వహిస్తున్నారు. ఉద్యోగ రీత్యా ఆమె తన భర్త బాలాజీ నాయక్ , ఇద్దరు పిల్లలతో కలిసి ఉప్పల్ పద్మావతి కాలనీలోని ఒక అపార్ట్‌మెంట్‌లో నివాసం ఉంటున్నారు. అయితే.. గత కొంతకాలంగా ఆమె కుటుంబ సమస్యలతో సతమతమవుతున్నట్లు సమాచారం. ఈ క్రమంలోనే మనస్తాపానికి గురైన ప్రమీల.. తాను ఉంటున్న అపార్ట్‌మెంట్ మూడవ అంతస్తు నుండి ఒక్కసారిగా కిందికి దూకేశారు.

ప్రమీల భవనం పైనుంచి దూకడం గమనించిన స్థానికులు వెంటనే స్పందించి ఆమెను ఉప్పల్‌లోని సిటీ న్యూరో ఆసుపత్రికి తరలించారు. అక్కడ ప్రాథమిక చికిత్స అందించిన అనంతరం.. పరిస్థితి విషమంగా ఉండటంతో మెరుగైన వైద్యం కోసం ఆమె భర్త బాలాజీ నాయక్ సికింద్రాబాద్‌లోని యశోద ఆసుపత్రికి తరలించారు. ప్రస్తుతం ఆమె అక్కడ అత్యవసర విభాగంలో చికిత్స పొందుతున్నారు. ఈ ఘటనపై సమాచారం అందుకున్న ఉప్పల్ పోలీసులు కేసు నమోదు చేసుకుని దర్యాప్తు ప్రారంభించారు.

సాధారణంగా పోలీస్ ఉద్యోగం అంటేనే సమయపాలన లేని విధి నిర్వహణ. అటు ఇంటి బాధ్యతలు, పిల్లల పెంపకం, ఇటు వృత్తిపరమైన సవాళ్లను సమన్వయం చేసుకోవడంలో మహిళా పోలీసులు ఎంతో మానసిక సంఘర్షణకు లోనవుతుంటారు. కుటుంబంలో చిన్నపాటి కలతలు వచ్చినప్పుడు.. పని ఒత్తిడి తోడై ఇలాంటి తీవ్ర నిర్ణయాలకు దారితీసే అవకాశాలు ఉన్నాయని నిపుణులు అభిప్రాయపడుతున్నారు. ఆత్మహత్య అనేది దేనికీ పరిష్కారం కాదని... క్లిష్ట పరిస్థితుల్లో ఉన్నప్పుడు ఉన్నతాధికారుల సాయం లేదా మానసిక నిపుణుల సలహా తీసుకోవడం ఉత్తమమని సామాజిక కార్యకర్తలు సూచిస్తున్నారు. ప్రమీల త్వరగా కోలుకోవాలని ఆమె సహచర ఉద్యోగులు ఆకాంక్షిస్తున్నారు.