అన్నమయ్య జిల్లా ఉంటుంది.. రెవెన్యూ మంత్రి కీలక ప్రకటన

ఆంధ్రప్రదేశ్ కేబినెట్ భేటీలో 24 అంశాలకు ఆమోదం లభించినట్లు ఏపీ రెవెన్యూ శాఖ మంత్రి అనగాని సత్యప్రసాద్ వెల్లడించారు. కేబినెట్ భేటీ అనంతరం నిర్వహించిన విలేకర్ల సమావేశంలో ఈ వివరాలను వెల్లడించారు. 9 జిల్లాలలో ఎలాంటి మార్పులు లేవన్న మంత్రి అనగాని సత్యప్రసాద్..17 జిల్లాలలో మార్పులు చేసినట్లు తెలిపారు. ప్రాథమిక గెజిట్ నోటిఫికేషన్ విడుదల చేసిన అనంతరం.. ప్రజల నుంచి వచ్చిన అభిప్రాయాలను అనుసరించి.. 25 మార్పులు చేసినట్లు వివరించారు.. గూడూరులోని మూడు మండలాలను నెల్లూరుకు తీసుకువచ్చామని.. రెండు మండలాలు తిరుపతి జిల్లాలో ఉంటాయని వివరించారు.

అలాగే మండపేటను రాజమండ్రిలోకి చేర్చటంతో పాటుగా, పశ్చిమ గోదావరి జిల్లాలోని పెనుకొండ గ్రామాన్ని వాసవి పెనుకొండగా మార్చినట్లు వివరించారు. అద్దంకి, దర్శి నియోజకవర్గాలను ప్రకాశం జిల్లాలోకి తీసుకువచ్చామన్నారు. రాజంపేటను కడపలోకి, రాయచోటిని మదనపల్లెలోకి, రైల్వే కోడూరును తిరుపతిలోకి చేర్చనున్నట్లు మంత్రి వెల్లడించారు. అన్నమయ్య జిల్లా పేరు అలాగే ఉంటుందని.. జిల్లా కేంద్రం మదనపల్లెగా ఉంటుందని రెవెన్యూ మంత్రి అనగాని సత్యప్రసాద్ క్లారిటీ ఇచ్చారు. రాయచోటిని మదనపల్లెలోకి తీసుకువస్తున్నామని.. మదనపల్లె జిల్లా కేంద్రంగా అన్నమయ్య జిల్లా ఉంటుందని.. మదనపల్లెనే అన్నమయ్య జిల్లాగే పిలుస్తామని క్లారిటీ ఇచ్చారు. గొప్ప వ్యక్తుల పేర్లను ఓ ప్రాంతానికి పరిమితం చేయడం సరైంది కాదని సూచించారు.

రాయచోటి విషయంలో మంత్రి మండిపల్లి రాంప్రసాద్ రెడ్డి బాధపడిన మాట వాస్తవమేనని మంత్రి అనగాని సత్యప్రసాద్ అన్నారు. రాజంపేట వాసులు కడపలోకి వెళ్తామని.. రైల్వే కోడూరు జనం.. తిరుపతిలోకి వెళ్తామని అంటున్నారని.. ప్రజల అభిప్రాయాలు, ఆకాంక్షలను అనుసరించి ఈ కీలక నిర్ణయాలు తీసుకున్నామని చెప్పుకొచ్చారు.

కేబినెట్ భేటీ అనంతరం మంత్రి మండిపల్లి రాంప్రసాద్ రెడ్డిని చంద్రబాబు పిలిపించి ఓదార్చారని.. రాయచోటి అభివృద్ధికి హామీ ఇచ్చారన్నారు. రైల్వేకోడూరు, రాజంపేట వాసులు కలిసి ఉండాలని కోరుకోవడం లేదని.. అలాంటప్పుడు చేయడానికి ఏం ఉంటుందని అన్నారు. వైసీపీ హయాంలో జిల్లాల పునర్విభజన పారదర్శకంగా చేసి ఉంటే ఈ పరిస్థితి వచ్చేది కాదన్నారు. డిసెంబర్ 31న తుది నోటిఫికేషన్ అనంతరం.. జనవరి 1 నుంచి ఈ నిర్ణయాలు అమల్లోకి వస్తాయని మంత్రి అనగాని సత్యప్రసాద్ వెల్లడించారు.