మంత్రివర్గం సమావేశం నుంచి ఏడ్చుకుంటూ బయటకు వచ్చిన మంత్రి మండిపల్లి

ఏపీలో కొత్తగా మరో మూడు జిల్లాలు ఏర్పాటు కానున్నాయి. రంపచోడవరం, మదనపల్లె, మార్కాపురం జిల్లాల ఏర్పాటుకు ఏపీ మంత్రివర్గం ఆమోదం తెలిపింది. సోమవారం జరిగిన ఏపీ కేబినెట్ భేటీలో జిల్లాల పునర్విభజన ప్రతిపాదనలకు కేబినెట్ గ్రీన్ సిగ్నల్ ఇచ్చింది. ఇందులో భాగంగా ప్రస్తుతం అన్నమయ్య జిల్లా కేంద్రంగా ఉన్న రాయచోటిని కొత్తగా ఏర్పాటు చేసే మదనపల్లె జిల్లాలో కలపనున్నారు. అలాగే రాజంపేటను.. కడప జిల్లాలో కలపనున్నారు. రైల్వే కోడూరును తిరుపతి జిల్లాలో చేర్చనున్నారు. ప్రస్తుతం తిరుపతి జిల్లాలో ఉన్న గూడూరును.. తిరిగి నెల్లూరులో చేర్చనున్నారు. ఈ ప్రతిపాదనలకు ఆంధ్రప్రదేశ్ మంత్రివర్గం ఆమోదం తెలిపింది.

మరోవైపు మంత్రివర్గ సమావేశంలో రవాణా శాఖ మంత్రి, రాయచోటి ఎమ్మెల్యే మండిపల్లి రాంప్రసాద్ రెడ్డి కన్నీరు పెట్టుకున్నారు. అన్నమయ్య జిల్లా కేంద్రంగా ఉన్న రాయచోటిని.. మదనపల్లె జిల్లాలో కలపాలనే ప్రతిపాదన రావటంతో ఆయన కన్నీరు పెట్టుకున్నారు. దీంతో చంద్రబాబు ఆయనను ఓదార్చారు. జిల్లా కేంద్రం మార్చడానికి గల కారణాలను వివరించారు. అలాగే రాయచోటి ప్రాంత అభివృద్ధికి కట్టుబడి ఉన్నామని రాంప్రసాద్ రెడ్డికి భరోసా ఇచ్చారు. అలాగే రాయచోటికి మెడికల్ కాలేజీ ఇస్తామని చంద్రబాబు హామీ ఇచ్చినట్లు సమాచారం.

మరోవైపు ఆంధ్రప్రదేశ్ కేబినెట్ సమావేశం పూర్తై బయటకు వచ్చే సమయంలోనూ.. మంత్రి మండిపల్లి రాంప్రసాద్ రెడ్డి కంటతడి పెట్టుకుంటూ బయటకు వచ్చారు. మరో మంత్రి బీసీ జనార్ధన్ రెడ్డితో కలిసి బయటకు వస్తూ మండిపల్లి రాంప్రసాద్ రెడ్డి భావోద్వేగానికి గురయ్యారు. కేబినెట్ నుంచి కంటతడితోనే బయటకు వచ్చారు. ఈ సందర్భంగా మంత్రి మండిపల్లి రాంప్రసాద్ రెడ్డిని బీసీ జనార్ధన్ రెడ్డి ఓదార్చారు. మంత్రి మండిపల్లిని తన కారులో ఎక్కించుకుని తీసుకెళ్లారు. మరోవైపు రాంప్రసాద్ రెడ్డికి మరోసారి సీఎం చంద్రబాబు వద్ద నుంచి పిలుపు వచ్చినట్లు సమాచారం.

మరోవైపు 2022 ఏప్రిల్ 4న అన్నమయ్య జిల్లా ఏర్పడింది. రాయచోటి జిల్లా కేంద్రంగా అన్నమయ్య జిల్లాను ఏర్పాటు చేశారు. అయితే ఇప్పుడు రాయచోటిని మదనపల్లెలో కలపాలని నిర్ణయించటంతో ఆ ప్రాంతంలో వ్యతిరేకత వ్యక్తమవుతోంది. విద్యార్థులు, ఉద్యోగులు, కార్మికులు ఆందోళన బాటపట్టారు. వెనుకబడిన ప్రాంతమైన రాయచోటి అభివృద్ధి చెందాలంటే.. ప్రస్తుతం ఉన్న అన్నమయ్య జిల్లాను యథావిధిగా కొనసాగించాలని డిమాండ్ చేస్తున్నారు.