పట్టాలు తప్పి పక్కకు పడిపోయిన ప్యాసింజర్ రైలు.. 13 మంది మృతి

మెక్సికోలోని దక్షిణ రాష్ట్రమైన ఓక్సాకా ఆదివారం రోజు జరిగిన భారీ రైలు ప్రమాదంతో ఒక్కసారిగా ఉలిక్కిపడింది. ఆ దేశ ప్రభుత్వం ఎంతో ప్రతిష్టాత్మకంగా చేపట్టిన 'ఇంటర్‌ఓషియానిక్ కారిడార్'లో భాగంగా నడుస్తున్న ప్యాసింజర్ రైలు పట్టాలు తప్పడంతో.. 13 మంది అక్కడికక్కడే ప్రాణాలు కోల్పోయారు. దాదాపు వంద మంది వరకు ప్రయాణికులు గాయపడటంతో ఆ ప్రాంతంలో విషాద ఛాయలు అలుముకున్నాయి.

మెక్సికన్ నావీ వెల్లడించిన వివరాల ప్రకారం.. నిజాండా పట్టణం సమీపంలో ఈ ప్రమాదం సంభవించింది. ప్రమాద సమయంలో రైలులో 9 మంది సిబ్బంది సహా మొత్తం 250 మంది ప్రయాణిస్తున్నారు. రైలు వేగంగా వెళ్తున్న క్రమంలో అదుపు పట్టాలు తప్పాయి. ఫలితంగా పక్కకు పడిపోయింది. ఈక్రమంలోనే రైల్లో ఉన్న ప్రయాణికులంతా హాహాకారాలు చేశారు. ఈ దారుణ ఘటనలో 13 మంది ప్రాణాలు కోల్పోగా.. 98 మందికి పైగా గాయపడ్డారు. గాయపడిన వారిలో 36 మందిని ఆసుపత్రికి తరలించగా.. ఐదుగురి పరిస్థితి అత్యంత విషమంగా ఉందని మెక్సికో అధ్యక్షురాలు క్లాడియా షీన్‌బామ్ స్వయంగా వెల్లడించారు.

ఈ దుర్ఘటనపై అధ్యక్షురాలు క్లాడియా షీన్‌బామ్ తీవ్ర విచారం వ్యక్తం చేశారు. బాధిత కుటుంబాలను ఆదుకునేందుకు సీనియర్ అధికారులను ఘటనా స్థలానికి పంపినట్లు ఆమె తెలిపారు. మెక్సికో అటార్నీ జనరల్ ఎర్నెస్టినా గోడాయ్ రామోస్ ఈ ప్రమాదంపై ఉన్నత స్థాయి దర్యాప్తుకు ఆదేశించారు. సాంకేతిక లోపం వల్ల ప్రమాదం జరిగిందా లేక మానవ తప్పిదం వల్ల జరిగిందా అనే కోణంలో అధికారులు ఆరా తీస్తున్నారు. మెక్సికన్ నావీ ఆధ్వర్యంలో సహాయక చర్యలు ముమ్మరంగా సాగుతున్నాయి.

ఈ ప్రమాదం జరిగిన రైలు మార్గం మెక్సికోకు అత్యంత కీలకమైనది. 2023లో అప్పటి అధ్యక్షుడు ఆండ్రెస్ మాన్యుయెల్ లోపెజ్ ఒబ్రాడోర్ హయాంలో ప్రారంభమైన ఈ 'ఇంటర్‌ఓషియానిక్ రైలు'.. పసిఫిక్ మహాసముద్రంలోని సెలినా క్రజ్ రేవును, అట్లాంటిక్ తీరంలోని కోట్జాకోయల్కోస్‌తో కలుపుతుంది. సుమారు 180 మైళ్ల (290 కి.మీ) పొడవున్న ఈ మార్గం ప్రపంచ ప్రసిద్ధ పనామా కాలువకు ప్రత్యామ్నాయంగా, అంతర్జాతీయ వాణిజ్యానికి వ్యూహాత్మక మార్గంగా మెక్సికో ప్రభుత్వం భావిస్తోంది. ఇప్పుడిప్పుడే ఊపందుకుంటున్న ఈ రైలు మార్గంలో ఇలాంటి పెద్ద ప్రమాదం జరగడం ఆ దేశ మౌలిక సదుపాయాల భద్రతపై ప్రశ్నలు లేవనెత్తుతోంది. ప్రస్తుతం ట్రాక్ పునరుద్ధరణ పనులు కొనసాగుతున్నాయి. క్షతగాత్రులకు మెరుగైన వైద్యం అందించేందుకు సైన్యం, సివిల్ ప్రొటెక్షన్ బృందాలు రంగంలోకి దిగాయి.