"వాళ్లు పూలు పెడితే.. వీళ్లు క్యాలీఫ్లవర్లు పెడుతున్నారు..టీడీపీ కూటమి ప్రభుత్వంపై ఏపీసీసీ చీఫ్ వైఎష్ షర్మిల విమర్శలు

ఆంధ్రప్రదేశ్ ప్రభుత్వం మీద ఏపీ కాంగ్రెస్ చీఫ్ వైఎస్ షర్మిల మరోసారి విమర్శలు గుప్పించారు. సూపర్ సిక్స్ హామీల అమలుపై కూటమి ప్రభుత్వాన్ని ప్రశ్నిస్తున్న వైఎస్ షర్మిల.. తాజాగా జాబ్ క్యాలెండర్ అంశాన్ని లక్ష్యంగా చేసుకుని ప్రభుత్వంపై విరుచుకుపడ్డారు. టీడీపీ కూటమి సర్కారుతో పాటుగా వైసీపీపై కూడా విమర్శలు గుప్పించారు. తాము అధికారంలోకి వస్తే ఏటా జనవరిలో జాబ్ క్యాలెండర్ప్రకటిస్తామంటూ అధికారంలోకి వచ్చిన కూటమి పార్టీలు.. రెండు సంవత్సరాలు గడుస్తున్నా ఆ విషయంపై నోరెత్తడం లేదని షర్మిల విమర్శించారు. కాంగ్రెస్ పార్టీ తరుఫున ఈ విషయంపై ప్రభుత్వాన్ని ప్రశ్నిస్తున్నామంటూ ఎక్స్ వేదికగా ట్వీట్ చేశారు.

"కూటమి పార్టీల రెండేళ్ల పాలన హామీలు ఘనం.. అమలుకు ఘరానా మోసం. ఏటా జనవరి వస్తోంది.. పోతోంది. సంవత్సరాలు మారుతూ క్యాలెండర్ మారుతున్నా.. ఫస్ట్ తారీఖున ఇస్తామని చెప్పిన జాబ్ క్యాలెండర్‌కు మాత్రం దిక్కులేదు. రికార్డు చేసి పెట్టుకోండని ఇచ్చిన వాగ్దానానికి విలువ లేదు. ఉద్యోగాల పేరుతో ఆశ చూపి, భారీగా నిరుద్యోగుల ఓట్లు దండుకుని, రెండో ఏడాది కూడా జాబ్ క్యాలెండర్‌పై ఊసెత్తకుండా, వారి జీవితాలతో చెలగాటం ఆడేందుకు కూటమి ప్రభుత్వానికి సిగ్గుండాలి. " అంటూ వైఎస్ షర్మిల ట్వీట్ చేశారు.

మరోవైపు వైసీపీపైనా వైఎస్ షర్మిల విమర్శలు గుప్పించారు. వైసీపీ ప్రభుత్వం ఐదేళ్లు జాబ్ క్యాలెండర్ పేరుతో యువత చెవుల్లో పూలు పెడితే, ఇప్పుడు కూటమి ప్రభుత్వం ఏకంగా క్యాలీఫ్లవర్లు పెడుతోందంటూ సెటైర్లు వేశారు. 2025 జనవరి 1 నుంచి క్రమం తప్పని జాబ్ క్యాలెండర్ ఎక్కడని ప్రశ్నించారు. రెండేళ్లలో రెండు జాబ్ క్యాలెండర్ల సంగతేంటి ? ఇదిగో అదిగో అని ఊరించడమే తప్పా ఉద్యోగాల భర్తీ షెడ్యూల్ ఏది ? కూటమి ప్రభుత్వ హామీ జాబ్ క్యాలెండర్ కాదు..జోక్ క్యాలెండర్. నిరుద్యోగ బిడ్డలను దగా చేసిన దగా క్యాలెండర్.. అంటూ షర్మిల తీవ్ర స్థాయిలో విమర్శించారు.

జాబ్ క్యాలెండర్ కోసం ఆంధ్రప్రదేశ్ వ్యాప్తంగా 50 లక్షల మంది నిరుద్యోగులు ఎదురుచూస్తున్నారని.. ఉన్నది సైతం అమ్ముకుని కోచింగులు తీసుకుంటున్నారని షర్మిల పేర్కొన్నారు. వీరంతా ఉద్యోగాలు ఇస్తారా లేదా అనే తీవ్ర ఆందోళనలో ఉన్నారన్నారు. ప్రభుత్వ విభాగాల్లో కలిపి ఖాళీలు 2 లక్షలకు పైగా ఉన్నాయన్న వైఎస్ షర్మిల.. వెంటనే రెండు లక్షల ఉద్యోగాలకు సంబంధించిన జాబ్ క్యాలెండర్ విడుదల చేయాలని డిమాండ్ చేశారు. కూటమి ప్రభుత్వం కొలువులు ఇస్తామని ఇచ్చిన హామీని నిలబెట్టుకోవాలని, రాష్ట్ర నిరుద్యోగుల పక్షాన డిమాండ్ చేస్తున్నామని వైఎస్ షర్మిల ట్వీట్ చేశారు.