జననాయగన్ వర్సెస్ పరాశక్తి.. తమిళనాడు ఎన్నికల వేళ సినిమా ఫైట్

తమిళనాడులో ఈ ఏడాది అసెంబ్లీ ఎన్నికలు జరగనున్నాయి. ఇప్పటికే ఈ ఎన్నికల కోసం ఆ రాష్ట్రంలోని ప్రాంతీయ పార్టీలతోపాటు.. కాంగ్రెస్, బీజేపీ వంటి జాతీయ పార్టీలు కూడా బాగా దృష్టి పెట్టాయి. అధికారంలో ఉన్న ఎంకే స్టాలిన్ నేతృత్వంలోని డీఎంకే పార్టీని గద్దె దించాలని అటు బీజేపీ, ఇటు కొత్తగా విజయ్ పెట్టిన తమిళగ వెట్రి కళగం పార్టీ వ్యూహ ప్రతివ్యూహాలు సిద్ధం చేసుకుంటున్నాయి. ఈ నేపథ్యంలోనే తమిళనాడు ఎన్నికల్లో హోరాహోరీ పోరు తప్పదనే సంకేతాలు వెలువడుతున్నాయి. అయితే అంతకంటే ముందు.. ఈసారి పొంగల్‌ (సంక్రాంతి) పండగకు తమిళ సినిమాల జోరు కొనసాగనుంది. అయితే ఈ పొంగల్ సినిమాలు కేవలం సినిమాలకు మాత్రమే పరిమితం కాకుండా.. రాజకీయాల్లో కీలక మలుపు తెచ్చే అవకాశాలు ఉన్నాయనే చర్చ ఇప్పుడు విశ్లేషకులు చర్చించుకుంటున్నారు.

విజయ్-జన నాయగన్

దీంతో తమిళనాడు అసెంబ్లీ ఎన్నికల యుద్ధం ఈ పొంగల్‌కు బాక్సాఫీస్ వద్దే మొదలవుతోందని రాజకీయ, సినీ వర్గాలు చెబుతున్నాయి. టీవీకే పార్టీని పెట్టి రాజకీయ అరంగేట్రం చేసిన దళపతి విజయ్.. ఈసారి ఒంటరిగానే ఎన్నికల్లో పోటీ చేస్తానని ప్రకటన చేసిన సంగతి తెలిసిందే. అయితే ప్రస్తుతం విడుదలకు సిద్ధంగా ఉన్న జన నాయగన్ చిత్రం.. తన కెరీర్‌లో 69వది కాగా.. ఇదే చివరిది అని ఇప్పటికే ప్రకటించారు. ఈ సినిమా ఈనెల 9వ తేదీన థియేటర్లలోకి రానుంది. అవినీతి వ్యవస్థపై పోరాడే ఒక సామాన్య యువకుడి కథగా ఈ సినిమాను రూపొందించారు. 'నేను వస్తున్నాను.. వెనక్కి తగ్గేది లేదు' అనే డైలాగులు నేరుగా రాజకీయ ప్రత్యర్థులను ఉద్దేశించినవే అని అభిమానులు భావిస్తున్నారు. ఈ జన నాయగన్ సినిమాకు హెచ్. వినోద్ దర్శకత్వం వహిస్తుండగా.. అనిరుధ్ సంగీతం అందిస్తున్నారు.

శివకార్తికేయన్-పరాశక్తి

అయితే డీఎంకే నేపథ్యం కలిగి ఉన్న పరాశక్తి సినిమా ఈనెల 10వ తేదీన విడుదల కానుంది. పరాశక్తి సినిమాలో శివకార్తికేయన్ హీరోగా నటిస్తున్నారు. డీఎంకే స్టాలిన్ తండ్రి, తమిళనాడు మాజీ సీఎం కరుణానిధి కుటుంబానికి చెందిన ఆకాష్ భాస్కరన్ ఈ పరాశక్తి చిత్రాన్ని నిర్మిస్తున్నారు. 1952లో కరుణానిధి రాసిన క్లాసిక్ చిత్రం పరాశక్తి పేరునే ఈ సినిమాకు పెట్టడం గమనార్హం. 1960లలో జరిగిన హిందీ వ్యతిరేక ఉద్యమం నేపథ్యంలో ఈ సినిమా సాగుతుంది. హిందీ రుద్దుడు అంశాన్ని ప్రధానంగా తీసుకుని డీఎంకే సిద్ధాంతాలను ప్రతిబింబించేలా ఈ సినిమాను రూపొందించారు. శివకార్తికేయన్, అథర్వ మురళి ప్రధాన పాత్రల్లో నటిస్తుండగా.. సుధా కొంగర డైరెక్టర్.

అయితే.. రాజకీయ సందేశంతో జన నాయగన్ సినిమాను తెరకెక్కించగా.. డీఎంకే పార్టీ తన ద్రావిడ సిద్ధాంతాలతో పరాశక్తిని కౌంటర్‌గా బరిలోకి దించుతోంది. ఈ రెండు సినిమాల ఫలితం కేవలం వసూళ్లపైనే కాకుండా.. రాబోయే ఎన్నికల మూడ్‌పై కూడా ప్రభావం చూపే అవకాశం ఉందని విశ్లేషకులు భావిస్తున్నారు. మరోవైపు.. ఈ రెండు సినిమాలు విడుదలకు ముందే.. దానికి సంబంధించిన ఫైటింగ్ మొదలైంది. ఈ సినిమా పోరు కేవలం థియేటర్లకే పరిమితం కాకుండా.. బయట కూడా ముదిరింది.

మధురైలో జన నాయగన్ ట్రైలర్ ప్రదర్శన సమయంలో.. పరాశక్తి సినిమా పోస్టర్లను విజయ్ అభిమానులు చింపేశారనే ఆరోపణలు వెల్లువెత్తాయి. అలాగే పరాశక్తి ఆడియో లాంచ్ సమయంలో టీవీకే పార్టీ నినాదాలతో విజయ్ ఫ్యాన్స్ రచ్చ చేశారు. దీంతో సినిమాలు విడుదల కాకముందే ఇలాంటి పరిస్థితి ఉంటే.. అవి థియేటర్లలోకి వస్తే.. పరిస్థితి ఎలా ఉంటుందోననే ఆందోళనలు వ్యక్తం అవుతున్నాయి. మొత్తానికి ఈ పొంగల్ మాత్రం తమిళనాడులో సినిమాల కంటే పొలిటికల్ హీట్ పెంచుతుందనే వాదనలు వినిపిస్తున్నాయి.