ఖాతాలో ఎంత బ్యాలెన్స్ ఉంటే వడ్డీ ఎంతొస్తుందో తెలుసా?

చాలా మందికి బ్యాంక్ ఫిక్స్‌డ్ డిపాజిట్ల గురించి తెలిసే ఉంటుంది. ఇక్కడ ప్రత్యేకంగా ఎఫ్‌డీ ఖాతా తీసి డబ్బులు జమ చేస్తే.. నిర్ణీత కాలానికి నిర్దిష్ట వడ్డీ రేట్ల ప్రకారం రాబడి ఉంటుంది. ఇంకా బ్యాంకుల్లో రికరింగ్ డిపాజిట్ ఉంటుంది. ఇక్కడ నెలనెలా నిర్దిష్ట మొత్తం జమ చేస్తే.. నిర్ణీత కాలానికి రాబడి వస్తుంది. మరి బ్యాంకులు మీ సేవింగ్స్ అకౌంట్లపైనా వడ్డీ ఇస్తాయని తెలుసా.. చాలా మందికి దీని గురించి అవగాహన ఉండదు. మీ సేవింగ్స్ అకౌంట్లోనే దీనికి సంబంధించి వడ్డీ వార్షిక ప్రాతిపదికన జమవుతుంటుంది. అకౌంట్లో బ్యాలెన్స్ ఆధారంగా వడ్డీని నిర్ణయిస్తాయి. అయితే స్టేట్‌మెంట్ చాలా జాగ్రత్తగా చూస్తే గానీ ఈ వడ్డీ జమయ్యిందన్న విషయం చాలా మందికి తెలియకపోవచ్చు.

>> అయితే ఫిక్స్‌డ్ డిపాజిట్, రికరింగ్ డిపాజిట్లతో పోలిస్తే సేవింగ్స్ అకౌంట్లపై వడ్డీ రేట్లు చాలా తక్కువగానే ఉంటాయని చెప్పొచ్చు. కానీ కొన్ని బ్యాంకులు మాత్రం ఇక్కడ కూడా ఆకర్షనీయ స్థాయిలోనే వడ్డీ ఆఫర్ చేస్తున్నాయి. ఇందులో ప్రముఖ స్మాల్ ఫైనాన్స్ బ్యాంకుగా ఉన్న ఏయూ స్మాల్ ఫైనాన్స్ బ్యాంకు వంటివి ఉంటాయి. ఇప్పుడు మరో ప్రముఖ ప్రైవేట్ రంగ బ్యాంకు కూడా ఇలానే సేవింగ్స్ అకౌంట్లపై వడ్డీ రేట్లను సవరించింది.

తాజాగా ఐడీఎఫ్‌సీ ఫస్ట్ బ్యాంక్ .. పొదుపు ఖాతాలపై (సేవింగ్స్ అకౌంట్) వడ్డీ రేట్లను సవరించింది. కొత్త వడ్డీ రేట్లు 2026, జనవరి 9 నుంచే అమల్లోకి వచ్చాయి. అంతకుముందు మొత్తం బ్యాలెన్స్‌పై ఒకటే వడ్డీ రేటు ఉండేది. ఇప్పుడు వేర్వేరు బ్యాలెన్స్‌లపై వడ్డీ రేట్లు వేర్వేరుగా ఉన్నాయి. ఇప్పుడు బ్యాంక్ అకౌంట్లో ఎంత బ్యాలెన్స్ ఉంటే.. వడ్డీ ఎలా ఉంటుందో చూద్దాం.

రూ. 1 లక్ష వరకు బ్యాలెన్స్ ఉంటే.. ఇక్కడ వార్షిక ప్రాతిపదికన 3 శాతం వడ్డీ చెల్లిస్తుంది. రూ. 1 లక్ష నుంచి 10 లక్షల వరకు బ్యాలెన్స్ మెయింటెయిన్ చేసే వారికి 5 శాతం వడ్డీ ఆఫర్ చేస్తుండటం విశేషం. రూ. 10 లక్షల నుంచి రూ. 10 కోట్ల వరకు నగదు ఉంటే.. ఇక్కడ వడ్డీ రేటు అత్యధికంగా 6.50 శాతంగా ఉంది. రూ. 10 కోట్ల నుంచి రూ. 25 కోట్ల వరకు బ్యాలెన్స్‌పై 6 శాతంగా వడ్డీ రేటు ఉంది. రూ. 25 కోట్ల నుంచి రూ. 100 కోట్ల వరకు బ్యాలెన్స్ ఉంటే వడ్డీ రేటు 5 శాతంగా.. రూ. 100 కోట్లకుపైన బ్యాలెన్స్‌పై 4 శాతంగా వడ్డీ రేటు ఉంది.

అయితే ఇక్కడ ఒకటి గుర్తుంచుకోవాలి. వడ్డీ చెల్లించే విధానం మారింది. మీ అకౌంట్లో రూ. 10 లక్షలు ఉంటే మొదటి రూ. 1 లక్షపై 3 శాతం వడ్డీ ఇస్తుంది. తర్వాతి 9 లక్షలపై 5 శాతం వడ్డీ చెల్లిస్తుంది. దీనినే ప్రోగ్రెసివ్ స్ట్రక్చర్ అంటారు. ఇదే విధంగా రూ. 1 కోటి బ్యాలెన్స్ ఉంటే ఇక్కడ మొదటి రూ. 1 లక్షపై 3 శాతం, తర్వాతి 9 లక్షలపై 5 శాతం చెల్లిస్తుంది. మిగతా 90 లక్షలపై వడ్డీ రేటు 6.50 శాతం చొప్పున చెల్లిస్తుందన్నమాట. ఇలాగే అన్ని బ్యాలెన్స్‌లకు వర్తిస్తుందని గుర్తుంచుకోవాలి.