ప్రయత్నం విఫలమైనా, ప్రార్థన విఫలం కాదు.. డీకే శివకుమార్ ఇంట్రెస్టింగ్ పోస్ట్

కర్ణాటక రాజకీయాల్లో ముఖ్యమంత్రి పదవి కోసం సాగుతున్న అంతర్గత పోరు మరోసారి చర్చనీయాంశమైంది. మంగళవారం మైసూరు ఎయిర్‌పోర్టులో కర్ణాటక సీఎం సిద్ధరామయ్య, డిప్యూటీ సీఎం డీకే శివకుమార్ వేర్వేరుగా రాహుల్ గాంధీతో భేటీ కావడంతో ఈ విషయం ఇప్పుడు తీవ్ర చర్చకు దారి తీసింది. ఇక ఈ భేటీ ముగిసిన తర్వాత ఉపముఖ్యమంత్రి డీకే శివకుమార్ చేసిన సోషల్ మీడియా పోస్ట్ ఇప్పుడు కర్ణాటక రాష్ట్ర రాజకీయాల్లో సంచలనం రేపుతోంది.

రాహుల్ గాంధీతో భేటీ అయిన తర్వాత.. డీకే శివకుమార్ తన ఎక్స్ ఖాతాలో ఒక ఆసక్తికరమైన వ్యాఖ్యను పోస్ట్ చేశారు. ప్రయత్నం విఫలమైనా.. ప్రార్థన విఫలం కాదు.. అని ట్వీట్ చేశారు. దీనిపై రాజకీయ విశ్లేషకులు తమ అభిప్రాయాలు వ్యక్తం చేస్తున్నారు. ముఖ్యమంత్రి పదవి కోసం డీకే శివకుమార్ చేస్తున్న ప్రయత్నాలు ప్రస్తుతానికి ఫలించలేదని.. అయితే ఆయన మాత్రం సీఎం కుర్చీపై తన ఆశలను ఇంకా వదులుకోలేదని ఈ పోస్ట్ సూచిస్తోంది. కర్ణాటక సీఎం పదవి కోసం.. డీకే శివకుమార్‌ను రాహుల్ గాంధీ మరికొంత కాలం వేచి ఉండమని సూచించి ఉండవచ్చని అనుమానాలు వ్యక్తం చేస్తున్నారు.

ఇటీవల తమిళనాడులో పర్యటించిన రాహుల్ గాంధీ.. తన టూర్ ముగించుకుని ఢిల్లీ వెళ్తుండగా.. మైసూరులోని మండకల్లి ఎయిర్‌పోర్టులో కొద్దిసేపు ఆగారు. రన్ వే మీదే సిద్ధరామయ్య, డీకే శివకుమార్‌లతో రాహుల్ గాంధీ విడివిడిగా కొన్ని నిమిషాల పాటు చర్చలు జరిపారు. తాజా సమాచారం ప్రకారం.. సంక్రాంతి తర్వాత ఈ ఇద్దరు నేతలను ఢిల్లీకి పిలిచి.. నాయకత్వ మార్పు, అధికార పంపకంపై హైకమాండ్ ఒక స్పష్టమైన నిర్ణయం తీసుకునే అవకాశం ఉంది.

మరోవైపు.. ఈ భేటీపై ముఖ్యమంత్రి సిద్ధరామయ్య స్పందిస్తూ.. రాహుల్‌ గాంధీతో ఎలాంటి రాజకీయ చర్చలు జరగలేదని స్పష్టం చేశారు. కాంగ్రెస్ పార్టీలో ఎలాంటి గందరగోళం లేదని.. అంతా మీడియా సృష్టిస్తున్న ఊహాగానాలేనని ఖండించారు. ముఖ్యమంత్రి పదవి విషయంలో అధిష్టానమే తుది నిర్ణయం తీసుకుంటుందని ఆయన మరోసారి గుర్తుచేశారు. దీంతో సంక్రాంతి పండగ తర్వాత ఢిల్లీలో సిద్ధు, డీకేలతో కాంగ్రెస్ హైకమాండ్ నిర్వహించే భేటీలో కర్ణాటక సీఎం పదవిపై క్లారిటీ రానుంది.