విజయవాడ- హైదరాబాద్ హైవేపై ఆ ఇబ్బంది తప్పినట్టే

విజయవాడ - హైదరాబాద్ జాతీయ రహదారిపై ప్రయాణించే వాహనదారులకు శుభవార్త. అత్యవసర రాకపోకల కోసం నందిగామ ఫ్లైఓవర్ సిద్ధమైంది. నందిగామ వైజంక్షన్ వద్ద వాహనాల రాకపోకలకు అంతరాయం కలగకుండా ఉండేందుకు అత్యవసర పరిస్థితులలో తాత్కాలిక రాకపోకలకు అనుగుణంగా అధికారులు ఈ ఫ్లైఓవర్ సిద్ధం చేశారు. మరోవైపు నందిగామ వద్ద ఫ్లైఓవర్, అప్రోచ్ రహదారుల నిర్మాణం ఇంకా పూర్తి కాలేదు. దీంతో వాహనాల రాకపోకలకు ఇంకా అనుమతి లభించలేదు.

ఈ నేపథ్యంలో ఈ ప్రాంతంలో తరుచుగా ట్రాఫిక్ జామ్ కలుగుతోంది. సంక్రాంతి పండుగ నేపథ్యంలో హైదరాబాద్ నుంచి భారీ సంఖ్యలో విజయవాడ వైపు వెళ్తుంటారు. ఈ క్రమంలోనే మూడు రోజుల కిందట నందిగామ వైజంక్షన్ వద్ద భారీగా ట్రాఫిక్ జామ్ ఏర్పడింది. ఈ సంగతిని దృష్టిలో పెట్టుకుని అధికారులు తాత్కాలిక ఏర్పాట్లు చేశారు. నందిగామ వద్ద అత్యవసర రాకపోకల కోసం ఫ్లైఓవర్ సిద్ధం చేశారు. ఈ ఏర్పాట్లను విజయవాడ పోలీస్ కమిషనర్ రాజశేఖరబాబు పరిశీలించారు. ఫ్లైఓవర్ వద్ద దీపాలను సైతం ఏర్పాటు చేశారు.

మరోవైపు సంక్రాంతికి ఊరెళ్లినవారు పండగ పూర్తైన వెంటనే హైదరాబాద్‌కు తిరుగుపయనమవుతారు. దీంతో విజయవాడ హైదరాబాద్ జాతీయ రహదారిపై మరోసారి ట్రాఫిక్ జామ్ ఏర్పడే అవకాశాలు ఉన్నాయి. ఈ పరిస్థితిని దృష్టిలో పెట్టుకుని విజయవాడ పోలీసులు తాత్కాలికంగా ఈ ఏర్పాట్లు చేశారు. అయితే భారీగా ట్రాఫిక్ జామ్ ఏర్పడి, అత్యవసర పరిస్థితులు ఏర్పడితేనే నందిగామ ఫ్లైఓవర్ వద్ద రాకపోకలకు అనుమతి ఇస్తారు. మరోవైపు నందిగామ వైజంక్షన్ వద్ద అండర్‌పాస్‌ వంతెనకు అప్రోచ్ రోడ్డు నిర్మాణం జరుగుతోంది.

అయితే ఈ రోడ్డు నిర్మాణం పూర్తి కాకపోవటంతో వాహనాలను సర్వీస్ రోడ్డుపై పంపిస్తున్నారు. అయితే సర్వీస్ రోడ్డు గుంతలమయంగా మారటంతో.. వాహనాల రాకపోకలకు ఇబ్బందులు తలెత్తుతున్నాయి. దీంతో ట్రాఫిక్ జామ్ అవుతోంది. ఏపీలోని ప్రధాన జాతీయ రహదారులలో ఒకటైన విజయవాడ హైదరాబాద్ జాతీయ రహదారిపై ఈ పరిస్థితి ఉండటంతో వాహనదారులు అసహనం వ్యక్తం చేస్తున్నారు.ఈ నేపథ్యంలో పండగకు సొంతూరుకు వచ్చిన జనం మళ్లీ నగరబాట పట్టనుండటంతో అధికారులు తాత్కాలికంగా ఈ ఏర్పాట్లు చేశారు.