ఛత్తీస్‌గఢ్‌లో మావోయిస్టు పార్టీకి మరో ఎదురుదెబ్బ

ఛత్తీస్‌గఢ్‌లో మావోయిస్టు పార్టీకి మరో భారీ ఎదురుదెబ్బ తగిలింది. ఆ రాష్ట్రంలోని సుకుమా జిల్లా ఎస్పీ కిరణ్‌ చౌహాన్‌ ఎదుట వివిధ క్యాడర్లకు చెందిన 29 మంది మావోయిస్టులు బుధవారం లొంగిపోయారు.సుకుమా జిల్లాలో పోలీసుల ముందు 29 మంది నక్సలైట్లు సరెండర్‌ అయినట్లు సీనియర్‌ పోలీసు అధికారి వెల్లడించారు. రాష్ట్ర ప్రభుత్వం అమలు చేస్తున్న లొంగుబాటు, పునరావాస విధానం తమను ఆకర్షించిందని లొంగిపోయిన మావోయిస్టులు పేర్కొన్నట్లు ఆయన తెలిపారు. లొంగిపోయిన వారిలో గోగుండ ప్రాంతానికి చెందిన దండకారణ్య ఆదివాసీ కిసాన్‌ మజ్దూర్‌ సంఘం (మావోయిస్టుల ఫ్రంటల్‌ వింగ్‌) అధిపతి పోదియం బుధ్రా కూడా ఉండగా, అతని తలపై రూ.2 లక్షల రివార్డు ఉన్నట్లు అధికారులు తెలిపారు. ఇతరులు వివిధ కేడర్లు, మిలీషియా సభ్యులు, అలాగే మావోయిస్టుల జనతన సర్కార్‌ విభాగాలకు చెందిన వారని వివరించారు.లొంగుబాటు చేసిన ప్రతి ఒక్కరికీ ప్రభుత్వం తరఫున రూ.2 లక్షల చొప్పున ప్రోత్సాహకాన్ని అందజేశారు. ఇటీవల గోగుండ ప్రాంతంలో భద్రతా శిబిరం ఏర్పాటు చేయడం ఈ లొంగుబాట్లకు ప్రధాన కారణంగా మారిందని పోలీసులు వెల్లడించారు. శిబిరం ఏర్పాటు అనంతరం నక్సల్‌ వ్యతిరేక చర్యలను మరింత ముమ్మరం చేయడం, నిరంతర ఒత్తిడి మరియు విస్తృత శోధన కార్యక్రమాలు చేపట్టడం వల్ల ఈ ప్రాంతంలో మావోయిస్టుల కార్యకలాపాలు గణనీయంగా తగ్గినట్లు తెలిపారు.కఠినమైన, మారుమూల భూభాగం కారణంగా గోగుండ ప్రాంతం గతంలో మావోయిస్టుల దర్భా డివిజన్‌కు కీలకమైన వ్యూహాత్మక కేంద్రంగా ఉండేదని అధికారులు గుర్తు చేశారు. అయితే భద్రతా శిబిరం ఏర్పాటు తర్వాత మావోయిస్టుల బలమైన కోటను భద్రతా బలగాలు సమర్థవంతంగా కూల్చివేశాయని వెల్లడించారు. ఈ లొంగుబాట్లతో దర్భా డివిజన్‌లో మావోయిస్టుల మద్దతు వ్యవస్థ కూడా తీవ్రంగా బలహీనపడిందని పోలీసు అధికారులు తెలిపారు.నిషేధిత మావోయిస్టు సంస్థతో సంబంధం ఉన్న వారు హింసను విడనాడి సమాజ ప్రధాన ప్రవాహంలోకి రావాలని, ప్రభుత్వం వారికి భద్రతతో పాటు గౌరవప్రదమైన జీవితం కల్పిస్తుందని ఎస్పీ చౌహాన్‌ విజ్ఞప్తి చేశారు. జనవరి 8న దంతేవాడ జిల్లాలో 63 మంది మావోయిస్టులు లొంగిపోగా, అంతకు ముందురోజు రాష్ట్రవ్యాప్తంగా సుమారు 1,500 మంది సరెండర్‌ అయినట్లు అధికారులు వెల్లడించారు. ఈ ఏడాది మార్చి 31 నాటికి నక్సలిజాన్ని పూర్తిగా రూపుమాపాలనే లక్ష్యంతో కేంద్ర ప్రభుత్వం ముందుకెళ్తున్న విషయం తెలిసిందే.