40 ఏళ్లుగా ఉన్న పాత మట్టి కుండ,,,రూ.29 లక్షలకు విక్రయం

అమెరికాలోని నెబ్రాస్కాకు చెందిన 91 ఏళ్ల వృద్ధురాలు లోయిస్ జుర్గెన్స్.. తన పుట్టినరోజున ఒక అద్భుతమైన సర్‌ప్రైజ్ అందుకున్నారు. దాదాపు 40 ఏళ్లుగా తన ఇంటి వరండాలో ఒక సాదాసీదా కుండలా పడి ఉన్న ఓ మట్టి పాత్ర.. వేలంలో ఏకంగా 32 వేల డాలర్లు అంటే మన భారత కరెన్సీలో రూ. 29 లక్షలకు అమ్ముడై ఆమె జీవితాన్నే మార్చేసింది. లోయిస్ జుర్గెన్స్ వద్ద 30 గ్యాలన్ల సామర్థ్యం గల.. రెడ్ వింగ్ అనే పాత మట్టి కుండ ఉండేది. దీన్ని ఆమె కేవలం మొక్కలు పెట్టుకోవడానికో లేదా పాత సామాన్ల కోవలోనో తన ఇంటి బయట 40 ఏళ్లుగా ఉంచారు.

ఈ క్రమంలోనే తన 91వ పుట్టినరోజుకు ముందు.. ఇంట్లోని అనవసర సామాన్లను అమ్మేసే గ్యారేజ్ సేల్‌లో ఆ మట్టి కుండను కేవలం 50 డాలర్లు అంటే సుమారు రూ.4 వేలకు విక్రయించాలని ఆమె అనుకున్నారు. వేలం నిర్వాహకుడు కెన్ బ్రామర్.. లోయిస్ ఇంటికి వెళ్లి ఆ కుండను పరిశీలించారు. దాన్ని వెనక్కి తిప్పి చూడగా.. ఆయన ఆశ్చర్యపోయారు. ఆ కుండపై నీలిరంగులో సీతాకోకచిలుక గుర్తులు ఉన్నాయి.

అంతకంటే అరుదైన విషయం ఏంటంటే.. దానిపై కంపెనీ ముద్ర రెండుసార్లు పడింది. ఇలాంటి పొరపాట్లు జరిగిన పాత్రలు రెడ్ వింగ్ వస్తువులను సేకరించే వారికి అత్యంత విలువైనవిగా పరిగణిస్తారు. లోయిస్ ఈ కుండకు కనీసం 100 డాలర్లు వస్తాయని ఆశించారు. కానీ వేలం రోజున సుమారు 300 మంది బిడ్డర్లు పోటీ పడ్డారు. టెక్సాస్, కాన్సాస్, అయోవా రాష్ట్రాలకు చెందిన ముగ్గురు పెద్ద కలెక్టర్ల మధ్య తీవ్రమైన పోటీ నెలకొంది. చివరకు ఇది సుమారు రూ. 29 లక్షలకు అమ్ముడైంది.

వేలం ముగిసే సమయానికి లోయిస్ తన పుట్టినరోజు సందర్భంగా స్థానిక చర్చిలో వాలంటీర్‌గా సేవలు అందిస్తున్నారు. ఆమె వేలం ప్రాంతానికి చేరుకోగానే కెన్ బ్రామర్ ఆమె అనుకున్న వంద డాలర్ల కంటే కొంచెం ఎక్కువే వచ్చాయని తెలిపారు. ఈ వార్త విన్న లోయిస్ ఆనందంతో ఒక్కసారిగా కళ్లు తిరిగి పడిపోబోయారు. తన 91 ఏళ్ల జీవితంలో జరిగిన అత్యంత ఉత్సాహభరితమైన సంఘటన ఇదేనని ఆమె సంతోషం వ్యక్తం చేశారు.