బాబర్ ఆజామ్ హ్యాపీగా లేడేమో.. స్టీవ్ స్మిత్

సిడ్నీ క్రికెట్ గ్రౌండ్‌లో జరిగిన బిగ్ బాష్ లీగ్ మ్యాచ్‌లో స్టీవ్ స్మిత్ – బాబర్ ఆజమ్ మధ్య చోటుచేసుకున్న సంఘటన పెద్ద చర్చకు దారి తీసింది. సిడ్నీ సిక్సర్స్ తరఫున ఓపెనింగ్ చేసిన ఈ జోడీ 141 పరుగుల భారీ భాగస్వామ్యాన్ని నెలకొల్పింది. అయితే 11వ ఓవర్‌లో జరిగిన ఓ ఘటన మ్యాచ్‌లో టెన్షన్‌ను పెంచింది.

ఆ ఓవర్‌లో స్పిన్నర్ క్రిస్ గ్రీన్ బౌలింగ్‌లో బాబర్ వరుసగా మూడు డాట్ బంతులు ఎదుర్కొన్నాడు. చివరి బంతిని లాంగ్ ఆన్ వైపు తట్టి సింగిల్ తీసేందుకు ప్రయత్నించగా, నాన్-స్ట్రైకర్ ఎండ్‌లో ఉన్న స్టీవ్ స్మిత్ వెంటనే అతన్ని వెనక్కి పంపాడు. పవర్ సర్జ్ ఓవర్‌లో స్ట్రైక్ తన దగ్గరే ఉండాలన్న ఉద్దేశంతోనే ఆ నిర్ణయం తీసుకున్నాడు.

మ్యాచ్ అనంతరం ఈ ఘటనపై స్పందించిన స్టీవ్ స్మిత్ తన నిర్ణయానికి కారణాన్ని వివరించాడు. “పది ఓవర్ల తర్వాత మేం మాట్లాడుకున్నాం. కెప్టెన్, కోచ్ వెంటనే పవర్ సర్జ్ తీసుకోవాలని చెప్పారు. కానీ నేను ‘ఒక ఓవర్ ఆగుదాం. చిన్న బౌండరీ వైపు షాట్లు ఆడాలనుకున్నా. మొదటి ఓవర్‌ను వృథా చేయకూడదనుకున్నా. ఆ ఓవర్‌లో కనీసం 30 పరుగులు తీయాలనే ప్లాన్ చేశా’” అని స్మిత్ చెప్పాడు.

ఆ తర్వాత ఓవర్‌లో రయాన్ హాడ్లీ బౌలింగ్‌లో స్మిత్ వరుసగా నాలుగు సిక్సర్లు బాది మొత్తం 32 పరుగులు సాధించాడు. ఇది బీబీఎల్ చరిత్రలోనే అత్యంత ఖరీదైన ఓవర్‌గా నిలిచింది. అయితే ఈ నిర్ణయంతో బాబర్ పూర్తిగా సంతృప్తిగా లేడని స్మిత్ అంగీకరించాడు. “ఆ సింగిల్‌ను తిరస్కరించడంతో బాబర్ హ్యాపీగా లేడేమో” అంటూ నవ్వుతూ వ్యాఖ్యానించాడు.

ఆ తర్వాత 13వ ఓవర్‌లో బాబర్‌కు మళ్లీ స్ట్రైక్ వచ్చినప్పటికీ తొలి బంతికే అవుటయ్యాడు. 47 పరుగుల వద్ద పెవిలియన్ చేరిన అతడు తీవ్ర నిరాశతో కనిపించాడు. డగౌట్‌కు వెళ్లే సమయంలో బౌండరీ లైన్‌ను బ్యాట్‌తో కొట్టాడు. ఇక స్టీవ్ స్మిత్ మాత్రం 41 బంతుల్లో అద్భుతమైన సెంచరీ సాధించి జట్టు విజయానికి ప్రధాన కారణమయ్యాడు. ఐదు వికెట్ల తేడాతో సిడ్నీ సిక్సర్స్ విజయాన్ని అందుకుంది.