సీనియర్లకు అధిక వడ్డీ.. లక్ష జమ చేస్తే మూడేళ్లలో

గతేడాది ఆర్బీఐ రెపో రేటును ఏకంగా 125 బేసిస్ పాయింట్ల మేర తగ్గించింది. 2025 ఏడాది ప్రారంభంలో 6.50 శాతంగా ఉన్న రెపో రేటు కాస్తా చివరికి వచ్చే సరికి 5.25 శాతానికి దిగొచ్చింది. ఇక్కడ ఫిబ్రవరిలో 25 బేసిస్ పాయింట్లు, ఏప్రిల్ నెలలో మరోసారి 25 బేసిస్ పాయింట్ల మేర వడ్డీ రేట్లలో కోత విధించింది. జూన్‌లో 50 బేసిస్ పాయింట్లు తగ్గించింది. ఇక డిసెంబరులో మరోసారి 25 బేసిస్ పాయింట్లు తగ్గించింది. ఇలా మొత్తం 1.25 శాతం తగ్గించగా.. 5.25 శాతానికి దిగొచ్చింది. ఆర్బీఐ రెపో రేటును తగ్గిస్తే.. బ్యాంకులు లోన్ వడ్డీ రేట్లు తగ్గించి ఇదే సమయంలో ఫిక్స్‌డ్ డిపాజిట్లపైనా వడ్డీ రేట్లను తగ్గించాయి. ఇటీవల ఫిక్స్‌డ్ డిపాజిట్ వడ్డీ రేట్లు ఆల్ టైమ్ కనిష్ఠ స్థాయిలకు పడిపోయాయని చెప్పొచ్చు.

ఎస్బీఐ, హెచ్‌డీఎఫ్‌సీ సహా పలు ప్రముఖ ప్రైవేట్, ప్రభుత్వ రంగ బ్యాంకులు కూడా డిపాజిట్ వడ్డీ రేట్లను తగ్గించాయి. దీంతో రాబడి గతంతో పోలిస్తే భారీగా తగ్గింది. అయినప్పటికీ ఇప్పటికీ ప్రభుత్వ, ప్రైవేట్ రంగ ప్రముఖ బ్యాంకుల కంటే స్మాల్ ఫైనాన్స్ బ్యాంకుల్లో కాస్త ఆకర్షణీయ స్థాయిలోనే వడ్డీ రేట్లు ఉన్నాయి. ఏ బ్యాంకులోనైనా ఇంకా సాధారణ ప్రజల కంటే సీనియర్ సిటిజెన్లకు 50 బేసిస్ పాయింట్ల వరకు వడ్డీ ఎక్కువగా ఉంటుంది. ఇప్పుడు ప్రముఖ స్మాల్ ఫైనాన్స్ బ్యాంకుల్లో మూడేళ్ల వ్యవధి డిపాజిట్లపై సీనియర్ సిటిజెన్లకు వడ్డీ రేట్లు ఎలా ఉన్నాయి.. రూ. 1 లక్ష డిపాజిట్ చేస్తే మెచ్యూరిటీకి ఎంత వస్తుందో తెలుసుకుందాం.

ఇక్కడ సీనియర్ సిటిజెన్లు అంటే 60 ఏళ్లు పైబడిన వారు. ఇంకా రూ. 3 కోట్ల వరకు డిపాజిట్లపై ఈ వడ్డీ రేట్లు వర్తిస్తాయి. గరిష్ఠంగా ఈ బ్యాంకుల్లో 7.50 శాతం వరకు వడ్డీ ఆఫర్ చేస్తున్నాయి. అత్యధికంగా జనా స్మాల్ ఫైనాన్స్ బ్యాంకు, స్లైస్ స్మాల్ ఫైనాన్స్, ఉత్కర్ష్ స్మాల్ ఫైనాన్స్ బ్యాంకులు మూడేళ్ల ఎఫ్‌డీపై సీనియర్ సిటిజెన్లకు 7.50 శాతం వడ్డీ ఇస్తున్నాయి. ఇక్కడ రూ. 1 లక్ష జమ చేస్తే మూడేళ్లకు రూ. 24,972 వడ్డీ అందుతుంది.

సూర్యోదయ్ స్మాల్ ఫైనాన్స్ బ్యాంకులో వడ్డీ రేటు 7.25 శాతంగా ఉంది. ఇక్కడ రూ. లక్షపై మూడేళ్లకు రూ. 24,055 వడ్డీ అందుతుంది. ఉజ్జీవన్ స్మాల్ ఫైనాన్స్ బ్యాంకులో 7.20 శాతం వడ్డీ రేటు ఉండగా.. లక్ష పెట్టుబడిపై రూ. 23,872 వడ్డీ వస్తుంది. ఏయూ స్మాల్ ఫైనాన్స్ బ్యాంకులో వడ్డీ రేటు 7.10 శాతంగా ఉంది. ఇక్కడ లక్షకు రూ. 23,508 వడ్డీ వస్తుంది.