రైతుల కోసం ప్రత్యేక యాప్.... అన్నీ చెప్పేస్తుంది

భారతదేశానికి వెన్నెముక రైతన్న. దేశానికి అన్నం పెట్టే అన్నదాతకు అడుగు అడుగునా ఇబ్బందులే.. దుక్కి దున్నడం మొదలుకొని.. విత్తు విత్తేదాకా, ఆ పంట చేతికొచ్చాక దానిని అమ్మేవరకూ ప్రతి దశలోనూ రైతులకు ఇబ్బందులే. అయితే వ్యవసాయంలో రైతుకు అండగా నిలిచి.. రైతుల ఆదాయాన్ని పెంచేందుకు ప్రభుత్వాలు కృషి చేస్తున్నాయి. సేద్యానికి సాంకేతికతను జోడించి అద్భుతాలు సాధించే దిశగా చర్యలు చేపడుతున్నాయి. ఇందులో భాగంగానే రైతుల కోసం యాప్ తీసుకువచ్చారు. కేంద్ర ప్రభుత్వం ఫార్మర్ ఛాట్ పేరుతో ప్రత్యేకంగా ఓ యాప్ తీసుకువచ్చింది.

డిజిటల్ గ్రీన్ ట్రస్ట్ సహకారంతో ఈ ఫార్మర్ ఛాట్ యాప్ రూపొందించారు. ఈ అప్లికేషన్ సాయంతో వ్యవసాయమే కాదు.. వ్యవసాయ అనుబంధ రంగాలైన చేపలు, పాడిపశువులు, కోళ్ల పెంపకం వంటి రంగాలకు చెందినవారు కూడా ప్రయోజనం పొందవచ్చు. ఫార్మర్ ఛాట్ యాప్ సాయంతో వివిధ అంశాల గురించి తెలుసుకునే అవకాశం ఉంది.

ఫార్మర్ ఛాట్ యాప్‍ను మొబైల్‌లో ఇన్‌స్టాల్ చేసిన తర్వాత.. లొకేషన్ యాక్సెస్ అడుగుతుంది. ఈ లొకేషన్‌ ఆధారంగా రాబోయే రోజులలో ఆ ప్రాంతంలో వాతావరణం ఎలా ఉంటుంది.. వర్షాలకు ఏమైనా అవకాశాలు ఉన్నాయా అనే సమాచారం అందిస్తుంది. అలాగే ఫార్మర్ ఛాట్ యాప్ సాయంతో పంటసాగులో ఏవైనా సందేహాలు ఉంటే నివృత్తి చేసుకోవచ్చు. పంట ఫోటోలను అప్‌లోడ్ చేసిన అనంతరం మన సందేహాలు అడిగితే సమాధానాలు వస్తాయి. అలాగే వాయిస్ మెసేజ్ రూపంలోనూ సలహాలు పొందవచ్చు. ఈ ఫార్మర్ ఛాట్ యాప్ సహాయంతో ఎలాంటి పంటలకు ఎలాంటి ఎరువులు వాడాలి.. నీరు ఎప్పుడు పెట్టాలనే విషయాలను తెలుసుకోవచ్చు. అలాగే తెగుళ్లు, కీటకాల నివారణ వంటి అంశాలపైనా సమాచారం అందిస్తున్నారు. వీడియోలు కూడా అందుబాటులో ఉన్నాయి.

మరోవైపు ఈ ఫార్మర్ ఛాట్ యాప్‌లో ఉన్న మరో ప్రత్యేకత ఏమిటంటే.. మనం ఎంచుకున్న భాషలో సమాధానం, సలహాలు, సూచలను వస్తాయి. మార్కెట్ సమాచారం కూడా తెలుసుకునేందుకు వీలుంది. అలాగే ఏవైనా సందేహాలు ఉంటే నివృత్తి చేసేందుకు డిజిటల్ అసిస్టెంట్ సౌకర్యం కూడా ఉంది. మరోవైపుఫార్మర్ ఛాట్ అప్లికేషన్ రైతులకు ఎంతో ఉపయోగకరంగా ఉంటుందని అధికారులు చెప్తున్నారు.

కొంతమంది రైతులు అవగాహన లేకపోవటంతో ఏవేవో పురుగుల మందులు పంటలకు వాడుతున్నారని.. దీంతో పంటలు దెబ్బతింటున్నాయని చెప్తున్నారు. అలాంటి ఇబ్బంది లేకుండా ఫార్మర్ ఛాట్ యాప్‌లో అన్ని రకాల పంటలకు సంబంధించిన సలహాలు, సూచనలను నిపుణులు అందిస్తారంటున్నారు. యాప్ గురించి రైతులకు అవగాహన కల్పిస్తున్నట్లు వివరించారు.