ఫ్రెంచ్ వైన్, షాంపేన్‌లపై 200 శాతం టారీఫ్‌లు.. మరో బాంబు పేల్చిన ట్రంప్

తాను ప్రతిపాదించిన ‘గాజా శాంతి బోర్డు’లో చేరడానికి తిరస్కరించడంతో ఫ్రాన్స్‌పై అమెరికా అధ్యక్షుడు డొనాల్డ్ ట్రంప్ అగ్గిమీద గుగ్గిలం అవుతున్నారు. దీంతో ఆ దేశం నుంచి దిగుమతి చేసుకునే వైన్, షాంపేన్‌లపై 200 శాతం టారీఫ్‌లు విధిస్తానని బెదిరింపులకు పాల్పడ్డారు. అంతేకాదు, గ్రీన్‌లాండ్ విషయంలో ఫ్రాన్స్ అధ్యక్షుడు ఇమ్మాన్యుయేల్ మెక్రాన్ తనకు పంపిన ఒక ప్రైవేట్ సందేశాన్ని కూడా ట్రంప్ సోషల్ మీడియాలో పంచుకున్నారు. అమెరికాను ఫ్రాన్స్ ఎగతాళి చేయడంతో ట్రంప్ ఈ తీవ్రమైన చర్యకు దిగారు. గ్రీన్‌లాండ్‌పై ట్రంప్ ఎందుకు అంతగా ఆసక్తి చూపుతున్నారో అమెరికా ట్రెజరీ సెక్రటరీ స్కాట్ బెస్సెంట్ చెప్పిన కారణాలను ఫ్రాన్స్ ఎద్దేవా చేసింది.

 ‘‘నేను వారి (ఫ్రాన్స్) వైన్, షాంపైన్‌లపై 200 శాతం సుంకాలు విధిస్తాను. అప్పుడు వాళ్లు చేరతారు. చేరకపోయినా పర్వాలేదు’ అని బెదిరించారు. ఈ ‘శాంతి మండలి’ మొదట్లో గాజా పునర్నిర్మాణం కోసం ఉద్దేశించినప్పటికీ, దాని పరిధి కేవలం గాజాకే పరిమితం కాదని తెలుస్తోంది.

మెక్రాన్ పంపిన ప్రైవేట్ సందేశంలో.. ఇరాన్, సిరియా విషయాల్లో మేము ఏకీభవిస్తున్నామని, కానీ గ్రీన్‌లాండ్‌పై ట్రంప్ చేస్తున్న పని తనకు అర్థం కాలేదని తెలిపారు. దావోస్‌లో జరిగే వరల్డ్ ఎకనామిక్ ఫోరమ్‌లో ట్రంప్‌తో పాటు ఇతర G7 నేతలను కలవడానికి, అలాగే ఉక్రెయిన్, డెన్మార్క్, సిరియా, రష్యా ప్రతినిధులను ఆహ్వానించడానికి సిద్ధంగా ఉన్నానని మెక్రాన్ చెప్పారు. ట్రంప్ ప్రతిపాదించిన ‘శాంతి మండలి’లో ఆహ్వానానికి ఫ్రాన్స్ సానుకూలంగా స్పందించలేదని ఏఎఫ్‌పీ వార్తా సంస్థ తెలిపింది. ఈ మండలి పరిధి గాజాకే పరిమితం కాదని పేర్కొంది.

గ్రీన్‌లాండ్ విషయంలో ట్రంప్ చేస్తున్న ప్రయత్నాలను ఫ్రాన్స్ ఎద్దేవా చేసింది. భవిష్యత్తులో రాబోయే ముప్పును నివారించడానికి ముందుగానే నష్టం కలిగించాలనే ఆలోచన సరికాదని వ్యాఖ్యానించింది. ‘ఒకవేళ ఎప్పుడైనా నిప్పు అంటుకుంటే, అగ్నిమాపక సిబ్బంది జోక్యం చేసుకుంటారు.. కాబట్టి ఇప్పుడే ఇంటిని కాల్చేయడం మంచిది.. ఒకవేళ ఎప్పుడైనా షార్క్ దాడి చేస్తే అప్పుడు జోక్యం చేసుకుంటారు కాబట్టి ఇప్పుడు లైఫ్‌గార్డ్‌ను తినేయడం మంచిది.... ఒకవేళ ఎప్పుడైనా ప్రమాదం జరిగితే, నష్టం జరుగుతుంది.. కాబట్టి ఇప్పుడు కారును ఢీకొట్టడం మంచిది’ అంటూ ఫ్రాన్స్ విదేశాంగ మంత్రిత్వ శాఖ అధికారిక ట్విట్టర్ ఖాతాలో పోస్ట్ చేసింది.

చైనా, రష్యాల నుంచి భవిష్యత్తులో ముప్పు పొంచి ఉందని, అందుకే ట్రంప్ గ్రీన్‌లాండ్‌పై దృష్టి సారించారని బెస్సెంట్ సమర్థించారు. ‘భవిష్యత్తులో ఆర్కిటిక్ కోసం ఈ పోరాటం నిజమైంది... మేము మా NATO హామీలను కొనసాగిస్తాం. రష్యా నుంచి లేదా మరేదైనా ప్రాంతం నుంచి గ్రీన్‌లాండ్‌పై దాడి జరిగితే, మేము అందులో భాగమవుతాం’ అని ఆయన అన్నారు. ఈ వ్యాఖ్యలపై ఫ్రాన్స్ వ్యంగ్యంగా స్పందించింది.