పుతిన్, జెలెన్‌స్కీ మూర్ఖులు,,,,ట్రంప్ ఘాటు వ్యాఖ్యలు

దావోస్‌లో జరుగుతోన్న ప్రపంచ ఆర్థిక ఫోరం సదస్సుకు అమెరికా అధ్యక్షుడు డొనాల్డ్ ట్రంప్ బుధవారం హాజరయ్యారు. ఈ సందర్భంగా ఆయన .. గ్రీన్‌లాండ్, రష్యా-ఉక్రెయిన్ యుద్ధం సహా పలు అంశాలను ప్రస్తావించారు. ‘అమెరికా ఫస్ట్’ అనే నినాదాన్ని మరోసారి పునరుద్ఘాటించిన ట్రంప్.. గ్రీన్‌లాండ్‌ తమ భూభాగమని పునరుద్ఘాటించారు. ఆ దీవిని అమెరికా కోరుకుంటుందని, కానీ దానిని స్వాధీనం చేసుకోవడానికి బలప్రయోగం చేయదని ట్రంప్ తెలిపారు. అదే సమయంలో ఆయన పరోక్షంగా బెదిరింపులకు దిగారు.. ‘ప్రపంచ రక్షణ కోసం మాకు ఒక మంచు ముక్క కావాలి, వారు ఇవ్వరు.. మీరు అవునంటే మేము చాలా కృతజ్ఞులమై ఉంటాం.. లేదా మీరు కాదని చెప్పినా మేము గుర్తుంచుకుంటాం’ అని అన్నారు.

 ట్రంప్ మాట్లాడుతూ. ‘రెండో ప్రపంచ యుద్ధం తర్వాత, గ్రీన్‌లాండ్‌ను డెన్మార్క్‌కు అమెరికా తిరిగి ఇచ్చేసింది. అప్పుడు మేమెంత తెలివితక్కువగా ప్రవర్తించాం? కానీ ఇప్పుడు వాళ్లు ఎంత కృతఘ్నత లేకుండా ఉన్నారు?’ అని గుర్తు చేసుకున్నారు. గ్రీన్‌లాండ్‌ను దాదాపు పూర్తిగా జనావాసం లేని, అభివృద్ధి చెందని ప్రాంతంగా అభివర్ణించారు. ఇది అమెరికా, రష్యా, చైనాల మధ్య కీలకమైన వ్యూహాత్మక స్థానంలో ఎవరూ రక్షించకుండా ఉందని ఆయన అన్నారు. ట్రంప్ తన 70 నిమిషాల ప్రసంగంలో చివరగా బెదిరింపు ధోరణితో మాట్లాడారు.

అనంతరం దాదాపు నాలుగు సంవత్సరాలుగా కొనసాగుతోన్న రష్యా-ఉక్రెయిన్ యుద్ధం గురించి ట్రంప్ మాట్లాడారు. ఈ క్రమంలో రష్యా, ఉక్రెయిన్ అధ్యక్షులు వ్లాదిమిర్ పుతిన్ , వొలొడిమిర్ జెలెన్‌స్కీ లను మూర్ఖులుగా అభివర్ణించారు. ‘వారు (వ్లాదిమిర్ పుతిన్, వొలొడిమిర్ జెలెన్‌స్కీ) ఇప్పుడు కలిసి వచ్చి ఒక ఒప్పందాన్ని కుదుర్చుకోగల దశలో ఉన్నారని నేను నమ్ముతున్నాను. వారు అలా చేయకపోతే వారికంటే మూర్ఖులు ఎవరూ ఉండరు.. అది వారిద్దరికీ వర్తిస్తుంది. వారు మూర్ఖులు కాదని నాకు తెలుసు’ అని ఆయన అన్నారు.

‘అమెరికా బలంగా తిరిగి వచ్చింది.. గతంలో కంటే మెరుగ్గా ఉంది’ అని ఆయన ప్రకటించారు. మూర్ఖులు కొనుగోలుచేసి పనిచేయని గాలిమరలు ఐరోపావ్యాప్తంగా ఉన్నాయని అమెరికా అధ్యక్షుడు అన్నారు. చైనా నుంచి విండ్‌మిల్లులను కొనుగోలు చేసే ‘మూర్ఖులు’ ఐరోపా దేశాలే అని ఆయన దుయ్యబట్టారు. అలాగే, తన ప్రతిపాదనను వ్యతిరేకించిన ఫ్రాన్స్‌ అధ్యక్షుడు మెక్రాన్‌ను ట్రంప్ ఎగతాళి చేశారు. ‘ఆరోగ్య కారణాల వల్ల మెక్రాన్ ధరించిన సన్ గ్లాసెస్‌ను లక్ష్యంగా చేసుకుని, ఔషధ ధరల చర్చలపై ఆయనను మోసగించారని ఆరోపించారు.

అమెరికా ధరలకు అనుగుణంగా ఔషధ ధరలను పెంచడానికి మెక్రాన్ విముఖత చూపడాన్ని ప్రస్తావిస్తూ ‘‘నిన్న నేను అతనిని ఆ అందమైన సన్ గ్లాసెస్‌తో చూశాను - ఏం జరిగింది? కానీ అతను కఠినంగా ఉండటం నేను చూశాను’’ అని ట్రంప్ అన్నారు. ‘నేను మెక్రాన్‌కు చెప్పాను... నువ్వు 30 ఏళ్లుగా ప్రిస్క్రిప్షన్ డ్రగ్స్‌తో అమెరికాను దోచుకుంటున్నావు. నువ్వు నిజంగా అలా చేయాలి, నువ్వు అలాగే చేస్తావు’ అని దుయ్యబట్టారు.