టిప్ ఇస్తేనే దిగు,.. కస్టమర్‌ను కారులోనే లాక్ చేసిన ఉబర్ డ్రైవర్

బ్రిటన్‌లో ఒక భారత మహిళా ఉబెర్ డ్రైవర్.. తన కారులోకి ఎక్కిన ప్రయాణికురాలి పట్ల వ్యవహరించిన తీరు ఇప్పుడు తీవ్ర వివాదాస్పదంగా మారింది. డబ్బులు చెల్లించినా.. తనకు టిప్ ఇవ్వాలంటూ ఆ డ్రైవర్ డిమాండ్ చేయడం.. అందుకు ఆ కస్టమర్ ఒప్పుకోకపోవడంతో.. వారిద్దరి మధ్య వాదన జరిగింది. అయితే ఇది గతేడాది జరిగిన సంఘటన కాగా.. ఆ వీడియో ఇప్పుడు సోషల్ మీడియాలో వైరల్‌గా మారడంతో నెటిజన్లు తీవ్ర ఆగ్రహం వ్యక్తం చేస్తున్నారు. సాధారణంగా క్యాబ్ ప్రయాణం ముగిసిన తర్వాత ఛార్జీకి అదనంగా డ్రైవర్‌కు టిప్ ఇవ్వడం అనేది కస్టమర్ ఇష్టం. కానీ ఆ మహిళ మాత్రం బలవంతంగా వసూలు చేయాలని చూసింది.

యూకేలో ఒక ప్రయాణికురాలు ఉబర్ క్యాబ్ బుక్ చేసుకుని తన గమ్యస్థానానికి చేరుకున్నాక కారు దిగబోతుండగా.. మహిళా డ్రైవర్ డోర్లు లాక్ చేసింది. యూకేలోని రూల్స్ ప్రకారం డ్రైవర్‌కు టిప్ ఇవ్వాలని డిమాండ్ చేసింది. లేదంటే డోర్లు తీయనని మొండికేసింది. కావాలంటే కారులోనే కూర్చో, పడుకో అంటూ ఆ డ్రైవర్ చాలా దురుసుగా ప్రవర్తించింది. దానికి ప్రయాణికురాలు బదులిస్తూ.. తాను ఇప్పటికే ప్రయాణానికి తగిన ఛార్జీలు చెల్లించానని.. టిప్ అనేది ఇస్తే తీసుకోవాలి కానీ డిమాండ్ చేయవద్దని.. కారు డోర్లు లాక్ చేయడం సరైంది కాదని వాదించింది.

అంతేకాకుండా కారు కూడా చాలా అపరిశుభ్రంగా ఉందని టిప్ ఇచ్చేది లేదని తేల్చి చెప్పింది. ఇక ఆ వైరల్ వీడియోలో డ్రైవర్ పక్కన సోడా టిన్లు, చెత్తాచెదారం ఉండటం కనిపిస్తోంది. అయితే కస్టమర్ కూర్చునే సీట్ క్లీ్న్‌గా ఉందంటూ ఆ డ్రైవర్ వాదించడం గమనార్హం. ఇక ఈ వీడియో సోషల్ మీడియాలో వైరల్ కావడంతో నెటిజన్లు సదరు డ్రైవర్‌పై విమర్శలు గుప్పిస్తున్నారు. ఒక వ్యక్తిని వారి ఇష్టానికి వ్యతిరేకంగా కారులో బంధించడం కిడ్నాప్ లేదా బందీ చేయడంతో సమానమని కొందరు పేర్కొన్నారు. ఇలాంటి పనులు చేస్తూ విదేశాల్లో మన దేశం పేరు పాడు చేస్తున్నారు అంటూ భారతీయ నెటిజన్లు తీవ్ర ఆవేదన వ్యక్తం చేశారు. మరికొందరు మాత్రం.. పెరుగుతున్న ఖర్చుల దృష్ట్యా డ్రైవర్లకు టిప్ ఇవ్వడం తప్పనిసరి కావాలని అభిప్రాయం వ్యక్తం చేశారు.

యూకే నిబంధనల ప్రకారం.. ట్యాక్సీ లేదా ఉబెర్ డ్రైవర్లకు టిప్ ఇవ్వడం అనేది పూర్తిగా ప్రయాణికుడి ఇష్టం. అది చట్టపరంగా తప్పనిసరి కాదు. కారు సేవలు నచ్చితేనే స్వచ్ఛందంగా ఇచ్చే ఈ మొత్తాన్ని ఇవ్వలేదని ప్రయాణికులను బంధించడం చట్టపరంగా నేరం. అయితే ఈ వీడియో గతేడాది జరగ్గా ఇప్పుడు వైరల్ అవుతోంది. ఇక ఆ మహిళా ఉబర్ డ్రైవర్‌పై ఏదైనా చర్యలు తీసుకున్నారా లేదా అనేది ఇంకా తెలియరాలేదు.