అమెరికా ఒత్తిడి భారత్‌‌ను ఏం చేయలేదు.. భారతీయ అమెరికన్ సీఈఓ

భారతదేశ విదేశాంగ విధానం ఉన్నతమైన ఆదర్శాల కంటే కఠినమైన ఆర్థిక వాస్తవాల ద్వారా రూపుదిద్దుకుంటోందని AI ఆధారిత జియోస్పేషియల్ అనలిటిక్స్ సంస్థ ఆల్ఫాజియో వ్యవస్థాపక సీఈఓ, భారత సంతతికి చెందిన అమెరికన్ పరాగ్ ఖన్నా వ్యాఖ్యానించారు. తన సొంత ప్రజల ప్రయోజనాల కోసమే భారత్ పనిచేస్తోందని, రష్యా విషయంలో అమెరికా ఒత్తిడి తెచ్చినా, తన విధానాన్ని మార్చుకోలేదని ఆయన వివరించారు. ట్రంప్ యంత్రాంగం ఒత్తిడి భారత్‌ను ఏం చేయలేదని అన్నారు. ప్రపంచవ్యాప్తంగా దేశాల విదేశాంగ విధానాలు వాటి ఆర్థిక పరిస్థితులపై ఆధారపడి ఉంటాయని ఖన్నా తెలిపారు. ముఖ్యంగా, దిగుమతి చేసుకునే వస్తువుల వాటా ఎక్కువగా ఉన్న దేశాలు, తమ ఆర్థిక ప్రయోజనాలను కాపాడుకోవడానికి ఆదర్శాలకు ప్రాధాన్యత ఇవ్వవని ఆయన అభిప్రాయపడ్డారు.

ఈ విషయంలో భారత్ అగ్రస్థానంలో ఉందని, అందుకే దాని విదేశాంగ విధానం ఆదర్శాల ద్వారా నిర్దేశించబడదని ఖన్నా పేర్కొన్నారు. ‘‘మీరు దేశాలకు వాటి వాణిజ్య లోటు, దిగుమతి చేసుకునే వస్తువుల వాటా ఆధారంగా ర్యాంక్ ఇవ్వొచ్చు. ఆ వాటా ఎక్కువగా ఉంటే, వారి విదేశాంగ విధానం ఆదర్శాల ద్వారా నిర్దేశింపబడదు. ఎందుకంటే ఇది అంతర్జాతీయంగా చౌకగా వస్తువులను దిగుమతి చేసుకోవడం లేదా దేశీయ బడ్జెట్‌లో సబ్సిడీలు ఇవ్వడం అనే ప్రశ్నగా మారుతుంది’’ అని ఖన్నా తెలిపారు.

 ఈ విషయంలో ఒక్క భారత్ మాత్రమే కాదు, అమెరికా మిత్రదేశమైన జపాన్ కూడా రష్యా ఇంధనాన్ని దిగుమతి చేసుకోడానికి మార్గాలను అన్వేషించిందని ఆయన గుర్తు చేశారు. నార్డ్ స్ట్రీమ్ పైపులైన్ పేల్చివేత తర్వాత కూడా ఐరోపా ప్రత్యామ్నాయ మార్గాల ద్వారా రష్యా చమురు, గ్యాస్‌ను పొందుతోందని ఆయన తెలిపారు. ‘అందరూ ఈ మల్టీ-అలైన్‌మెంట్‌ను పాటిస్తున్నారు. భారత్ తన పొరుగు దేశాలపై దృష్టి పెట్టాలి. ఇతరుల నుంచి ఆదేశాలు తీసుకోదు’ అని ఖన్నా అన్నారు. భారతదేశం ఈ విషయంలో చాలా తెలివిగా వ్యవహరించిందని ఆయన ప్రశంసించారు. ఉక్రెయిన్‌తో యుద్ధం చేస్తోన్న రష్యాపై అమెరికా ఆంక్షలు విధించడంతో ఆ దేశం చమురు, గ్యాస్ దిగుమతి చేసుకుంటోందనే సాకుతో భారత్‌పై డొనాల్డ్ ట్రంప్ అదనపు సుంకాలు విధించిన విషయం తెలిసిందే.