అమెరికాలో బిహారీ చాయ్వాలా....టీ రూ.780, పోహా రూ.1500
international | Suryaa Desk | Published : Wed, Jan 21, 2026, 10:47 PM
బిహార్కు చెందిన ప్రభాకర్ ప్రసాద్.. అమెరికాలోని లాస్ ఏంజిల్స్ వీధుల్లో టీ, పోహా అమ్ముతూ సోషల్ మీడియాలో తెగ వైరల్ అయ్యారు. అక్కడ ఒక కప్పు టీ ధర రూ.782.. పోహా ధర రూ.1,512 ఉన్నప్పటికీ.. ప్రభాకర్ ప్రసాద్.. ఆతిథ్యం, బీహారీ మూలాల పట్ల ఆయనకు ఉన్న గౌరవం కస్టమర్లను ఆకర్షిస్తున్నాయి. కష్టపడే తత్వం ఉంటే ప్రపంచంలో ఎక్కడైనా రాణించవచ్చని నిరూపిస్తున్న ప్రభాకర్ ప్రసాద్.. ఇప్పుడు సోషల్ మీడియాలో బాగా ఫేమస్ అవుతున్నారు.
బిహార్లో పుట్టి పెరిగిన ప్రభాకర్ ప్రసాద్.. లాస్ ఏంజిల్స్ వీధుల్లో చాయ్వాలాగా మారి భారతీయ రుచులను అక్కడి వారికి పరిచయం చేస్తున్నాడు. సాధారణంగా మన దగ్గర రూ.10 నుంచి రూ.20కి విక్రయిస్తుండగా.. ఆయన వద్ద ఒక కప్పు టీ ధర 8.65 డాలర్లు అంటే మన భారత కరెన్సీలో సుమారు రూ.782 కాగా.. ఒక ప్లేట్ పోహా ధర 16.80 డాలర్లు అంటే సుమారు రూ.1,512.
మూలాలను మరువని బిహారీ
ప్రభాకర్ ప్రసాద్ తన ఇన్స్టాగ్రామ్ హ్యాండిల్ '@chaiguy_la' ద్వారా తన రోజువారీ పనులను, కస్టమర్లతో ఆయన చేసే ముచ్చట్లను షేర్ చేస్తూ సోషల్ మీడియాలో బాగా యాక్టివ్గా ఉంటాడు. విదేశాల్లో ఉన్నప్పటికీ ఆయన హిందీ మాట్లాడుతూ.. భారతీయ సంప్రదాయ ఆతిథ్యంతో కస్టమర్లను బాగా ఆకట్టుకుంటున్నాడు. ఆయన పొడవాటి జుట్టు, మీసాల ఆహార్యం చూసి అక్కడి వారు ఆయనను 'జీసస్ క్రైస్ట్'తో పోలుస్తుండటం విశేషం.
ఈ వీడియోపై నెటిజన్లు భిన్నాభిప్రాయాలు వ్యక్తం చేస్తున్నారు. కష్టపడాలనే తపన ఉంటే ఏ పని చేసినా.. ఎక్కడైనా డబ్బు సంపాదించవచ్చని ప్రభాకర్ ప్రసాద్ నిరూపించాడని కొందరు ప్రశంసిస్తుంటే.. మరికొందరు మాత్రం ధరలు చాలా ఎక్కువగా ఉన్నాయని కామెంట్ చేస్తున్నారు. అయితే.. అమెరికాలోని జీవన ప్రమాణాలు, అక్కడ లభించే పదార్థాల ధరలను బట్టి ఆ రేట్లు సహజమేనని మరికొందరు వాదిస్తున్నారు. ఏది ఏమైనా.. తన మూలాలను మరువకుండా, కష్టాన్ని నమ్ముకుని విదేశీ గడ్డపై తనకంటూ ఒక ప్రత్యేక స్థానాన్ని సంపాదించుకున్న ప్రభాకర్ ప్రసాద్ ప్రయాణం ఎంతో మందికి స్ఫూర్తిదాయకంగా నిలుస్తోంది.
|
|