భారత్‌లో రూ.25 లక్షల ప్యాకేజీ, లండన్‌లో రూ.1.10 కోట్లు.. ఏది బెస్ట్

భారత్‌లో పనిచేసే ఓ సాఫ్ట్‌వేర్ ఇంజినీర్.. సోషల్ మీడియాలో వేసిన ప్రశ్నకు నెటిజన్ల నుంచి రకరకాల కామెంట్లు వస్తున్నాయి. తన జాబ్ కెరీర్‌కు సంబంధించి.. ఆ టెకీ సూచనలు, సలహాలు కోరగా.. చాలా మంది నెటిజన్లు సమాధానం ఇస్తున్నారు. భారత్‌లో ఉండి జాబ్ చేయాలా లేక ప్రమోషన్ వచ్చిందని ఎక్కువ జీతానికి విదేశాలకు వెళ్లి పనిచేయాలో తేల్చుకోలేకపోతున్నానని.. దానికి సలహా ఇవ్వాలని కోరగా.. నెటిజన్ల నుంచి భారీగా రెస్పాన్స్ వచ్చింది. ఇక్కడ జీతం తక్కువగా ఉందని.. వేరే దేశానికి వెళ్తే.. ఇక్కడి కంటే 4 రెట్లు అధికంగా వస్తుందని ఆ టెకీ వెల్లడించాడు.

దేశ రాజధాని ఢిల్లీకి సమీపంలో ఉన్న గుర్గావ్‌లో ఓ టెకీ ఏడాదికి రూ.25 లక్షల ప్యాకేజీతో పనిచేస్తున్నాడు. తాను పని చేస్తున్న కంపెనీ.. అతడికి ఒక ఆఫర్ ఇచ్చింది. అదే సంస్థకు చెందిన బ్రాంచ్ లండన్‌లో ఉండగా.. ఆన్ సైట్ ప్రమోషన్ కింద.. అక్కడికి వెళ్లేందుకు అతడికి ఆఫర్ ఇచ్చింది. ప్రస్తుతం ఇక్కడ రూ.25 లక్షల ప్యాకేజీ ఉండగా.. లండన్‌లో 1.03 లక్షల పౌండ్లు అంటే మన భారత కరెన్సీలో ఏకంగా రూ.1.10 కోట్ల ఆఫర్ చేసింది. అయితే లండన్ ఖర్చులు భరించగలనా అని అతడు రెడ్డిట్ వేదికగా అడిగిన ప్రశ్నకు.. నెటిజన్లు సలహా ఇస్తున్నారు.

 జలుబు + దగ్గు + కఫం 3 సమస్యల్ని వదిలించే ఓ సింపుల్ చిట్కా, ఒకే ఒక ఉల్లిపాయతో అంతా క్లియర్, ఎలా వాడాలో తెలుసా?

అయితే కొనుగోలు శక్తి సామర్థ్యం (పర్చేసింగ్ పవర్ పారిటీ-పీపీపీ) ప్రకారం లండన్‌లో రూ.1.10 కోట్ల జీతం తక్కువేమో అన్న అతని సందేహం ఇప్పుడు నెట్టింట తీవ్ర చర్చకు దారితీసింది. ప్రస్తుతం రూ.25 లక్షల ప్యాకేజీతో గుర్గావ్‌లో పనిచేస్తున్న ఆ టెకీకి త్వరలోనే మరో రూ.5 లక్షల జీతం పెరిగే అవకాశాలు ఉన్నాయి. లండన్ ఆఫర్‌లో బేసిక్ శాలరీ 77 వేల పౌండ్లు కాగా.. మొత్తం ప్యాకేజీ 1.03 లక్షల పౌండ్లుగా ఉంది. అయితే గ్లాస్‌డోర్ వంటి వెబ్‌సైట్లలో చూస్తే లండన్ ఆఫీసులో ఇది యావరేజ్ శాలరీ అని.. కానీ భారత్‌తో పోలిస్తే అక్కడ ఖర్చులు ఎక్కువని.. తన పెట్టుబడులు, సేవింగ్స్ దెబ్బతింటాయేమోనని ఆ టెకీ భయపడుతున్నాడు.

పీపీపీ (పర్చేసింగ్ పవర్ పారిటీ) అంటే ఏంటి?

సాధారణంగా ఒకే వస్తువును భారత్‌లో కొనడానికి అయ్యే ఖర్చుకు.. లండన్‌లో అయ్యే ఖర్చుకు చాలా తేడా ఉంటుంది. ఆ టెకీ చెప్పిన లెక్కల ప్రకారం రూ.30 లక్షల భారతీయ జీతం ఇచ్చే సౌకర్యవంతమైన జీవితాన్ని గడపాలంటే లండన్‌లో రూ.1.10 కోట్ల కంటే ఇంకా ఎక్కువ ప్యాకేజీ ఉండాలని అతను భావిస్తున్నాడు.

నెటిజన్ల సలహాలు

ఈ పోస్ట్‌పై స్పందించిన మెజారిటీ నెటిజన్లు అతనికి లండన్ వెళ్లమని సూచించడం గమనార్హం. కేవలం డబ్బు గురించి మాత్రమే ఆలోచించకుండా.. విదేశాల్లో ఒంటరిగా ఉంటూ కొత్త సంస్కృతిని నేర్చుకోవడం జీవితాన్ని సంపూర్ణం చేస్తుందని పేర్కొంటున్నారు. ప్రస్తుతం ఆ టెకీ వయసు కేవలం 25 ఏళ్లే కాబట్టి.. రిస్క్ తీసుకోవడానికి ఇదే సరైన సమయమని.. ఒకవేళ నచ్చకపోయినా మళ్లీ భారత్‌కు తిరిగి వచ్చి.. ఇక్కడ మంచి జాబ్ చూసుకోవచ్చని చెబుతున్నారు.

లండన్ వెళ్లిన కొత్తలో కష్టంగా అనిపించినా.. నెమ్మదిగా ఖర్చులు ఎలా తగ్గించుకోవాలో, ఎలా పొదుపు చేయాలో అర్థమవుతుందని సూచిస్తున్నారు. భారత్‌తో పోలిస్తే లండన్‌లో గాలి నాణ్యత, మౌలిక సదుపాయాలు, ప్రయాణ సౌకర్యాలు బాగుంటాయని.. అవి లైఫ్ స్టైల్‌ను మారుస్తాయని నెటిజన్లు సలహా ఇచ్చారు.