కాంగ్రెస్‌కు ‘శశి’ గండం? కమలం వైపు థరూర్ చూపు.. కేరళ రాజకీయాల్లో పెను సంచలనం!

కేరళ అసెంబ్లీ ఎన్నికల వేళ కాంగ్రెస్ పార్టీలో అంతర్గత విభేదాలు మరోసారి రచ్చకెక్కాయి. రాబోయే ఎన్నికల వ్యూహంపై చర్చించేందుకు హైకమాండ్ ఢిల్లీలో ఏర్పాటు చేసిన అత్యంత కీలకమైన సమావేశానికి ఆ పార్టీ సీనియర్ నేత, ఎంపీ శశి థరూర్ గైర్హాజరు కావడం ఇప్పుడు రాజకీయ వర్గాల్లో హాట్ టాపిక్‌గా మారింది. సొంత పార్టీ సమావేశాన్ని వదిలేసి, అదే సమయంలో తిరువనంతపురంలో ప్రధానమంత్రి నరేంద్ర మోదీ పాల్గొన్న అధికారిక కార్యక్రమానికి థరూర్ హాజరవ్వడం చర్చనీయాంశమైంది. ఈ పరిణామం ఆయన పార్టీ మారుతున్నారనే సంకేతాలకు మరింత బలాన్ని చేకూరుస్తోంది.
గత కొంతకాలంగా కాంగ్రెస్ అగ్ర నాయకత్వానికి, థరూర్‌కు మధ్య దూరం పెరుగుతూ వస్తోందన్నది బహిరంగ రహస్యం. ముఖ్యంగా రాహుల్ గాంధీ తన ప్రసంగాల్లో కీలక నేతల పేర్లను ప్రస్తావిస్తూ థరూర్ పేరును ఉద్దేశపూర్వకంగా విస్మరించడం ఆయనను తీవ్ర అసంతృప్తికి గురిచేసినట్లు తెలుస్తోంది. పార్టీ కోసం ఎంతగానో శ్రమిస్తున్నా తగిన గుర్తింపు లభించడం లేదని థరూర్ వర్గీయులు భావిస్తున్నారు. ఈ క్రమంలోనే అధిష్టానం కూడా ఆయనను కీలక బాధ్యతల నుంచి దూరం పెడుతూ వస్తుండటం, ఆయన అసహనానికి ప్రధాన కారణమని విశ్లేషకులు భావిస్తున్నారు.
మరోవైపు, శశి థరూర్ అప్పుడప్పుడు ప్రధాని మోదీ పరిపాలనా దక్షతను, విదేశాంగ విధానాలను ప్రశంసించడం కాంగ్రెస్ శ్రేణులకు మింగుడుపడటం లేదు. భావజాలపరంగా విభేదాలు ఉన్నప్పటికీ, అభివృద్ధి విషయంలో మోదీ అనుసరిస్తున్న తీరును థరూర్ సమర్థించడం వెనుక పెద్ద వ్యూహమే ఉందనే ప్రచారం జరుగుతోంది. బిజెపి కూడా కేరళలో బలపడటానికి థరూర్ వంటి విద్యావంతుడు, ప్రపంచవ్యాప్తంగా గుర్తింపు ఉన్న నేత కోసం ఎదురుచూస్తోంది. ఈ నేపథ్యంలోనే మోదీతో ఆయన భేటీ కావడం కేవలం యాదృచ్ఛికం కాదని, అది భవిష్యత్ రాజకీయ ప్రయాణానికి పునాది కావొచ్చని అంచనా వేస్తున్నారు.
ప్రస్తుతం నెలకొన్న పరిస్థితులను గమనిస్తుంటే శశి థరూర్ కాంగ్రెస్‌కు గుడ్ బై చెప్పి కమలం గూటికి చేరే అవకాశాలు మెండుగా కనిపిస్తున్నాయి. ఒకవేళ ఇదే నిజమైతే కేరళలో కాంగ్రెస్ నేతృత్వంలోని యూడీఎఫ్ (UDF) కూటమికి అది కోలుకోలేని దెబ్బ అవుతుంది. థరూర్ వంటి చరిష్మా ఉన్న నాయకుడు బిజెపిలో చేరితే, ఆ రాష్ట్రంలో ఆ పార్టీకి కొత్త ఊపిరి పోసినట్లవుతుంది. కేరళ రాజకీయ ముఖచిత్రాన్ని మార్చేసే ఈ భారీ మార్పుపై మరికొద్ది రోజుల్లోనే స్పష్టత వచ్చే అవకాశం ఉంది.