భార్యకు వైద్యం చేయించడానికి భర్త సాహసం.. 600 కి.మీ. రిక్షా తొక్కిన 70 ఏళ్ల వృద్ధుడు

అనారోగ్యంతో భార్యకు ఏమవుతుందో అన్న భయం, ఆమెను రక్షించుకోవాలన్న తపన ఓవైపు. అంబులెన్స్ కోసం డబ్బులు లేని దీయనీయమైన స్థితి మరోవైపు. ఈ నేపథ్యంలో 600 కిలోమీటర్లు రిక్షా తొక్కడానికి సిద్ధపడ్డాడు ఓ 70 ఏళ్ల వృద్ధుడు. 300 కిలోమీటర్ల దూరంలో ఉన్న ఆసుపత్రికి తీసుకెళ్లి.. అదే విధంగా ఇంటికి తిరుగు ప్రయాణం అయ్యాడు. ఈ ఎముకలు కొరికే చలి, రోడ్డు ప్రమాదం జరిగినా.. ఆగిపోలేదు. ఒరిస్సాలో జరిగిన ఘటన హృదయాలను కలచివేస్తోంది. ఆ వివరాలు..

సంబల్‌పూర్‌లోని మోడిపాడ ప్రాంతానికి చెందిన బాబు లోహర్ రిక్షా తొక్కుకుంటూ జీవనం సాగిస్తున్నాడు. 2025 నవంబర్‌లో అతడి భార్య జ్యోతి పెరాలటిక్ స్ట్రోక్ (మెదడుకు రక్త ప్రసరణలో అంతరాయం ఏర్పడి.. మెదడు కణాలు చనిపోవడానికి దారితీసే పరిస్థితి) వచ్చింది. దీంతో స్థానిక వైద్యులు.. కటక్‌లో ఉన్న ఎస్‌సీబీ ప్రభుత్వ మెడికల్ కాలేజీకి సిఫార్సు చేశారు. అయితే అంబులెన్స్‌లో లేదా ఇతర వాహనంలో తన భార్యను ఆసుపత్రికి తీసుకెళ్లడానికి బాబు లోహర్ వద్ద డబ్బులు లేవు. దీంతో తన రిక్షాలోనే భార్యను ఆసుపత్రికి తరలించాలని నిర్ణయించుకున్నాడు.

ఆ రెండింటిలో ఏది లేకున్నా ఉండలేను..

బాబు లోహర్ రిక్షాపై కొన్ని పాత మెత్తలు వేసి.. తన భార్యను వాటిపై కూర్చోబెట్టాడు. అనతంరం దేవుడి నామాన్ని జపిస్తూ రిక్షా తొక్కినట్లు తెలిపాడు. "నాకు జీవితంలో కేవలం రెండు ప్రేమలు మాత్రమే ఉన్నాయి. ఒకటి నేను ఇంటికి తిరిగి తీసుకెళ్తున్న నా భార్య. మరొకటి నా రిక్షా. ఈ రెండింటిలో ఏది లేకున్నా నేను ఉండలేను" అని చెప్పాడు బాబు లోహర్.

రోజుకు దాదాపు 30 కిలోమీటర్ల చొప్పున రిక్షా తొక్కాడు బాబు లోహర్. పగలు ప్రయాణిస్తూ, రాత్రిపూట రోడ్డు పక్కన ఉన్న దుకాణాల దగ్గర ఆగుతూ.. తొమ్మిది రోజుల తర్వాత కటక్ ఆసుపత్రికి చేరుకున్నాడు. రెండు నెలల సుదీర్ఘ చికిత్స తర్వాత.. లోహర్ జనవరి 19న మోడిపాడలోని తన ఇంటికి తిరిగి ప్రయాణం ప్రారంభించాడు. ఈ క్రమంలో కటక్ జిల్లాలోని టంగి పోలీస్ స్టేషన్ పరిధిలోని చౌద్వార్ సమీపంలో ఈ దంపతులు ఒక చిన్న ప్రమాదానికి గురయ్యారు. ఓ వాహనం ఓవర్‌టేక్ చేస్తున్నప్పుడు రిక్షాను రాసుకుంటూ వెళ్ళింది. దాంతో జ్యోతి రోడ్డుపై పడి తలకు గాయమైంది. లోహర్‌కు ఎలాంటి గాయం కాలేదు. అనంతరం జ్యోతికి స్థానిక కమ్యూనిటీ హెల్త్ సెంటర్‌లో చికిత్స అందించాడు. రాత్రి బస చేసి.. జనవరి 20వ తేదీ ఉదయం సంబల్‌పూర్‌కు తమ ప్రయాణాన్ని తిరిగి ప్రారంభించారు.

కాగా, ఈ క్రమంలో సహాయం చేస్తామన్న పోలీసుల విజ్ఞప్తిని కూడా సున్నితంగా తిరస్కరించాడు బాబు లోబర్. తాము వాహనం ఏర్పాటు చేస్తామని చెప్పినా.. అతను నిరాకరించాడని టంగి పోలీస్ స్టేషన్ ఇన్‌చార్జ్ బికాష్ సేథీ తెలిపారు. తాము బలవంతం చేస్తే.. సంబల్‌పూర్‌కు వెళ్లే దారిలో ఆహారం తినడానికి కొన్ని డబ్బులు తీసుకున్నాడని చెప్పారు. కాగా, భార్య పట్ల ఆ భర్తకు ఉన్న అమితమైన ప్రేమకు నిదర్శనంగా నిలిచింది ఈ ఘటన. అంతేకాకుండా ప్రాథమిక ఆరోగ్య సంరక్షణ, రవాణా సౌకర్యాలను పొందడంలో పేదలు, వృద్ధులు ఎదుర్కొంటున్న సమస్యలను కూడా ఈ ఘటన ఎత్తిచూపుతోంది.