గోల్డ్ రేట్స్‌లో ఊహించని ట్విస్ట్..! పెట్టుబడిదారులు అప్రమత్తం

బంగారం ప్రియులకు కొంత ఊరట లభించింది. గత నెల రోజులుగా ఆకాశాన్నంటిన బంగారం ధరలు ఇటీవల ఒక్కసారిగా క్షీణించాయి. భారత బులియన్ మార్కెట్‌లో ఇంతవరకు ప్రీమియంతో ట్రేడైన గోల్డ్, ఈ వారంలో తొలిసారి తగ్గింపుతో విక్రయమవుతోంది. సాధారణంగా అంతర్జాతీయ స్పాట్ రేట్లను అనుసరించే దేశీయ ధరలు, ప్రస్తుతం గ్లోబల్ మార్కెట్‌తో పోలిస్తే తక్కువగా నమోదవడం విశేషంగా మారింది.ధరల హెచ్చుతగ్గుల నేపథ్యంలో భారత రిటైల్ కొనుగోలుదారులు కొంత వెనక్కి తగ్గినా, చంద్ర నూతన సంవత్సరానికి ముందు చైనాలో బంగారం కొనుగోళ్లు ఊపందుకున్నాయి. దేశీయ డీలర్లు అధికారిక ధరలపై ఔన్సుకు 12 డాలర్ల వరకు డిస్కౌంట్ అందిస్తున్నారు. ఇందులో 6% దిగుమతి సుంకం, 3% జీఎస్టీ ఉన్నాయి. గత వారం వరకు ఔన్సుకు 70 డాలర్ల ప్రీమియం ఉన్న నేపథ్యంలో, ప్రస్తుత తగ్గింపు మార్కెట్ ధోరణిలో మార్పును సూచిస్తోంది. హైదరాబాద్‌కు చెందిన ఓ ఆభరణాల వ్యాపారి ప్రకారం, తయారీ ఛార్జీలపై రాయితీలు ఉన్నప్పటికీ జ్యువెలరీ డిమాండ్ పూర్తిగా కోలుకోలేదని, ప్రస్తుత ధరల వద్ద వినియోగదారులు జాగ్రత్తగా వ్యవహరిస్తున్నారని తెలిపారు.గత వారం 10 గ్రాములకు రూ.1.33 లక్షల వరకు తగ్గిన దేశీయ ధరలు, శుక్రవారం (ఫిబ్రవరి 13) నాటికి రూ.1.54 లక్షల వద్ద నిలిచాయి. ఇకముందు ధరలు మరింత సర్దుబాటు కావచ్చనే అంచనాలు వినిపిస్తున్నాయి. ఈ నెలలో యునైటెడ్ అరబ్ ఎమిరేట్స్ నుంచి సుమారు 80 మెట్రిక్ టన్నుల బంగారం రాయితీ సుంకంతో దిగుమతవుతుందనే అంచనాలతో, పలువురు బులియన్ డీలర్లు బ్యాంకుల నుంచి కొనుగోళ్లు వాయిదా వేశారు. భారత్–యూఏఈ సమగ్ర ఆర్థిక భాగస్వామ్య ఒప్పందం (CEPA) ప్రకారం యూఏఈ నుంచి దిగుమతి అయ్యే బంగారం, వెండిపై తక్కువ సుంకాలు వర్తిస్తాయి.ఆసియా మార్కెట్ల పరిస్థితి కూడా మిశ్రమంగానే ఉంది. హాంకాంగ్లో బంగారం ఔన్సుకు సుమారు 1.80 డాలర్ల ప్రీమియంతో ట్రేడవుతుండగా, జపాన్లో 6 డాలర్ల తగ్గింపు నుంచి 1 డాలర్ ప్రీమియం వరకు ఉంది. అలాగే సింగపూర్లో 0.50 డాలర్ల డిస్కౌంట్ నుంచి 3.50 డాలర్ల ప్రీమియం మధ్య ట్రేడింగ్ కొనసాగుతోంది.విశ్లేషకుడు రాస్ నార్మన్ అభిప్రాయం ప్రకారం, ధరల పెరుగుదల కొంతవరకు కొనుగోళ్లను ప్రభావితం చేసినప్పటికీ మొత్తం డిమాండ్ ఇంకా సానుకూలంగానే ఉంది. పీపుల్స్ బ్యాంక్ ఆఫ్ చైనా బంగారు నిల్వలను క్రమంగా పెంచుతుండటం మార్కెట్‌కు మద్దతుగా నిలుస్తోంది. మరోవైపు, పీఎల్ క్యాపిటల్ సీఈఓ సందీప్ రైచురా అంచనా ప్రకారం 2026 చివరి నాటికి అంతర్జాతీయ ధరలు ఔన్సుకు 6,000 డాలర్లను తాకే అవకాశం ఉంది. ద్రవ్యోల్బణ ఒత్తిళ్లు, భౌగోళిక రాజకీయ ఉద్రిక్తతలు, కేంద్ర బ్యాంకుల కొనుగోళ్లు ఈ అంచనాలకు బలం చేకూరుస్తున్నాయని పేర్కొన్నారు. అగ్నమ్ అడ్వైజర్స్ సీఈఓ ప్రశాంత్ మిశ్రా అభిప్రాయం ప్రకారం వెండి ధరలు బంగారంతో పోలిస్తే ఎక్కువ అస్థిరంగా ఉన్నప్పటికీ, దీర్ఘకాలిక పెట్టుబడిదారులు మాత్రం బంగారంపై విశ్వాసాన్ని కొనసాగిస్తున్నారు.