ఎప్‌స్టీన్‌తో సంబంధాలపై ఆరోపణ.. బ్రిటన్ మాజీ ప్రిన్స్ ఆండ్రూ అరెస్ట్

జెఫ్రీ ఎప్‌స్టీన్ సెక్స్ కుంభకోణంలో ఆరోపణలు ఎదుర్కొంటున్న బ్రిటన్ మాజీ యువరాజు ఆండ్రూను యూకే పోలీసులు అరెస్ట్ చేశారు. ప్రభుత్వ కార్యాలయంలో దుష్ప్రవర్తనకు పాల్పడ్డారనే అనుమానంతో ఆయన తాత్కాలిక నివాసమైన సాండ్రింగ్‌హామ్ ఎస్టేట్‌లో అరెస్టు చేసినట్లు మీడియా కథనాలు పేర్కొన్నాయి. యూకే చట్టం ప్రకారం అరవైల్లో ఉన్న ఓ వ్యక్తిని గురువారం అరెస్ట్ చేసిన ప్రకటన విడుదల చేసిన థేమ్స్ వ్యాలీ పోలీసులు.. మాజీ యువరాజు పేరును వెల్లడించలేదు. జాతీయ మార్గదర్శకాల ప్రకారం అరెస్ట్ చేసిన వ్యక్తి పేరు వెల్లడించడం లేదని స్పష్టం చేశారు. పలు పరిశీలన అనంతరం అదుపులోకి తీసుకుని, దర్యాప్తు ప్రారంభించామని పేర్కొనారు. లైంగిక నేరాలకు పాల్పడినట్టు ఆరోపణలు ఎదుర్కొన్న జెఫ్రీ ఎప్‌స్టీన్‌కు 2010లో ఆండ్రూ వాణిజ్య సమాచారాన్ని పంపాడనే నివేదికలను అంచనా వేస్తున్నట్లు పోలీసులు వెల్లడించారు

‘‘సమగ్ర అంచనా తర్వాత ప్రభుత్వ కార్యాలయంలో దుష్ప్రవర్తన ఆరోపణలపై మేము ఇప్పుడు దర్యాప్తు ప్రారంభించాం’ అని ఆ ప్రకటన పేర్కొంది. మా భాగస్వాములతో కలిసి పనిచేస్తున్నప్పుడు దర్యాప్తు సమగ్రత, నిష్పాక్షికతను కాపాడుకోవడం చాలా ముఖ్యమని వివరించారు. ఆండ్రూ ఉండే సాండ్రింగ్‌హామ్ ఎస్టేట్‌లోని వుడ్ ఫామ్‌కి గురువారం తెల్లవారుజామున ఆరు పోలీసు వాహనాలు, సాధారణ దుస్తులు ధరించిన ఎనిమిది మంది అధికారులు వెళ్లినట్టు రాయిటర్స్ నివేదించింది. ఆయన 66వ పుట్టిన రోజునే ఈ అరెస్ట్ జరగడం గమనార్హం.

స్థానిక పోలీస్ అధికారి డాల్ బాబు మీడియాతో మాట్లాడుతూ... ఆండ్రూను అరెస్ట్ చేశామని, ఆయన డిజిటల్ పరికరాలను, ఫైల్స్‌ను, ఇతర ఆధారాలను సేకరించే పనిలో ఉన్నారని చెప్పారు. ఆయనకు సంబంధించిన అన్ని చోట్లా సోదాలు నిర్వహించనున్నట్టు తెలిపారు.

ఆండ్రూ ఆరెస్ట్‌పై యూకే ప్రధాన మంత్రి కీర్ స్టార్మర్ స్పందిస్తూ.. చట్టానికి ఎవరూ అతీతులు కాదని అన్నారు. మహిళలు, బాలికలపై హింసకు సంబంధించిన ఏదైనా అంశానికి చెందిన సమాచారం ఉన్న ఎవరైనా.. వారు ఎవరైనా సరే ముందుకు రావడం బాధ్యత... మన వ్యవస్థ ప్రధాన సూత్రాలలో ఒకటి చట్టం ముందు అందరూ సమానమే.. ఎవరూ అతీతులు కారు.. అన్ని చోట్లా వర్తింపజేయడం చాలా ముఖ్యం’ అని ఆయన అన్నారు.

ఇటీవల అమెరికా న్యాయశాఖ విడుదల చేసిన మూడు మిలియన్ ఫైల్స్‌ తర్వాత ఎప్‌స్టీన్‌తో తన సంబంధాలపై ప్రిన్స్ ఆండ్రూ ఒత్తిడిలో ఉన్నారు. మహిళతో అత్యంత దారుణంగా వ్యవహరించి ఫోటోలు బయటకు వచ్చాయి. 2010-2011 మధ్య వాణిజ్య రాయబారిగా ఉన్న ఆండ్రూ.. కీలక సమాచారాన్ని ఎప్‌స్టీన్‌కు చేరవేసినట్టు నివేదికలు వెల్లడించాయి. సింగపూర్, హాంకాంగ్ వియత్నాంలకు తన పర్యటనల నివేదికలను ప్రిన్స్ ఆండ్రూ అందజేసినట్లు తాజాగా వెల్లడైన ఎప్‌స్టీన్ ఫైల్స్ బహిర్గతం చేశాయి. పెట్టుబడి అవకాశాల గురించి రహస్య సమాచారాన్ని కూడా ఆయన పంచుకున్నారు. కాగా, ఎప్‌స్టీన్‌తో సంబంధాలు బయటపడిన తర్వాత 2025లో ఆయనను రాజకుటుంబం సోదరుడు కింగ్ ఛార్లెస్ III వెలివేశారు. ఎప్‌స్టీన్ బాధితురాలు వర్జినీయా గ్యుఫ్రే.. ఆండ్రూ తనపై లైంగిక దాడి చేశాడని, అప్పటికి తనకు 17 ఏళ్లు అని ఇటీవల విడుదలైన తన పుస్తకంలో వెల్లడించారు.