ఆ రెండు జిల్లాల మధ్యలోనే ఫిక్స్,,,,విశాఖపట్నానికి దగ్గరలో మరో ఎయిర్‌పోర్ట్

ఆంధ్రప్రదేశ్ ప్రభుత్వం రాష్ట్రవ్యాప్తంగా 9 కొత్త ఎయిర్‌పోర్టుల కోసం ప్రతిపాదనలు చేసింది. ఇప్పటికే కొన్ని విమానాశ్రయాలకు సంబంధించి భూసేకరణ, టెండర్లు ప్రక్రియ జరుగుతోంది.. కొన్నిటికి మాత్రం సర్వే జరుగుతోంది. ఏపీ ప్రభుత్వం కాకినాడ జిల్లాలో కొత్త ఎయిర్‌పోర్ట్‌ను ప్లాన్ చేసింది. ఈ ఎయిర్‌పోర్ట్ విశాఖపట్నం, రాజమహేంద్రవరం మధ్యలో ఏర్పాటు చేయాలని ప్రతిపాదించిన సంగతి తెలిసిందే. అయితే ఈ కొత్త ఎయిర్‌పోర్టుకు అనువైన స్థలంపై ఇంకా క్లారిటీకి రాలేదు. అనకాపల్లి జిల్లా-కాకినాడ జిల్లాల మధ్య ఎంపికపై సందిగ్థత కొనసాగుతోంది.

ఏపీ ప్రభుత్వం గ్రీన్‌ఫీల్డ్ ఎయిర్‌పోర్టును కాకినాడ జిల్లాలోని అన్నవరం, తుని మధ్యలో నిర్మించాలని భావించింది. అయితే ఎయిర్‌పోర్ట్‌ను ప్రతిపాదించిన చోట భూములిచ్చేందుకు రైతులు ఒప్పుకోలేదు. అంతేకాదు ఆ ప్రాంతంలో సాంకేతికపరంగా సమస్యలు వచ్చాయి.. ఆ తర్వాత ప్లాన్ మార్చారు. అనకాపల్లి జిల్లా పాయకరావుపేట, నక్కపల్లి మధ్య ఉన్న గోపాలపట్నం దగ్గర నిర్మిస్తే ఎలా ఉంటుంది అని ఆలోచన చేశారు. అయితే ఆ ప్రతిపాదనను కూడా పక్కన పెట్టారు. అయితే ఇటీవల కొత్త విమానాశ్రయాల ప్రతిపాదనల గురించి చర్చకు వచ్చిన సమయంలో.. తుని, అన్నవరం మధ్య కొత్త ఎయిర్‌పోర్ట్‌ నిర్మాణం కోసం డీపీఆర్‌ సిద్ధం చేస్తున్నట్లు చెప్పారు.

కాకినాడ, ఉప్పాడ సమీపంలో పరిశ్రమలు రాబోతున్నాయి. అటు అనకాపల్లి జిల్లా నక్కపల్లికి పరిశ్రమలు (బల్క్‌డ్రగ్‌ పరిశ్రమ, ఆర్సెలార్‌ మిత్తల్‌, ఎన్‌టీపీసీ ప్లాంట్) వస్తున్నాయి. అందుకే కాకినాడ జిల్లాలోనే ఎయిర్‌పోర్ట్ నిర్మిస్తే మరింత ఉపయోగంగా ఉంటుంది అంటున్నారు. పారిశ్రామికాభివృద్ధికి దోహదపడుతుందంటున్నారు. తునికి 100 కిలోమీటర్లదూరంలో అటు రాజమహేంద్రవరం, ఇటు విశాఖపట్నం ఎయిర్‌పోర్ట్‌లు కూడా ఉన్నాయి. అయితే తుని దగ్గర భూములు కొత్త విమానాశ్రయానికి అనుకూలంగా లేవని గతంలో ఆ ప్రతిపాదనను పక్కన పెట్టారు. ఇప్పుడు మళ్లీ పాయకరావుపేట సమీపంలో నిర్మించేందుకు ప్రతిపాదనల్ని పరిగణలోకి తీసుకునే అవకాశం ఉంది అంటున్నారు. మరి ప్రభుత్వం, అధికారులు ఈ కొత్త ఎయిర్‌పోర్టును ఎక్కడ ఏర్పాటు చేస్తారన్నది ఆసక్తికరంగా మారింది. అయితే విశాఖపట్నం, రాజమహేంద్రవరానికి మధ్యలోనే ఏర్పాటు చేస్తే ఉపయోగంగా ఉంటుందనే వాదనలు కూడా ఉన్నాయి.