ఒక్కొక్కరి తలపై రూ.90 లక్షల సుపారీ,,,,ఉక్రెయిన్ ఉన్నతాధికారుల హత్యకు రష్యా భారీ కుట్ర
international | Suryaa Desk | Published : Sat, Feb 21, 2026, 07:44 PM
ఉక్రెయిన్లోని కీలక రాజకీయ నేతలు, ఉన్నతాధికారులను లక్ష్యంగా చేసుకుని రష్యా పన్నిన ఒక భయంకరమైన హత్యల కుట్రను ఉక్రెయిన్, మోల్డోవా భద్రతా బలగాలు భగ్నం చేశాయి. మాస్కో ఆదేశాల మేరకు ప్రముఖులను అంతమొందించేందుకు సిద్ధమైన 10 మంది సభ్యుల అంతర్జాతీయ హంతక ముఠాను అధికారులు అరెస్ట్ చేశారు. రష్యాపై యుద్ధం మొదలై నాలుగేళ్లు గడుస్తున్న వేళ.. ఉక్రెయిన్ అంతర్గత భద్రతను దెబ్బతీసేందుకు రష్యా ఈ 'కాంట్రాక్ట్ కిల్లింగ్' వ్యూహాన్ని అమలు చేస్తోందని కీవ్ ఆరోపించింది.
జాయింట్ ఆపరేషన్లో దొరికిన నిందితులు
ఉక్రెయిన్ ప్రాసిక్యూటర్ జనరల్ రస్లాన్ క్రావెంచ్కో వెల్లడించిన వివరాల ప్రకారం.. ఉక్రెయిన్, మోల్డోవా దేశాల నిఘా సంస్థలు సంయుక్తంగా ఈ ఆపరేషన్ నిర్వహించాయి. ఉక్రెయిన్లో ఏడుగురిని, మోల్డోవాలో ముగ్గురిని అదుపులోకి తీసుకున్నారు. ఇందులో ముఠా నాయకుడు కూడా ఉన్నట్లు అధికారులు స్పష్టం చేశారు. దేశవ్యాప్తంగా 20 చోట్ల జరిపిన సోదాల్లో భారీగా నగదు, మారణాయుధాలు, పేలుడు పదార్థాలు, రష్యా హ్యాండ్లర్లతో జరిపిన సంభాషణల ఆధారాలను స్వాధీనం చేసుకున్నారు.
మిలిటరీ వ్యూహకర్త ఆండ్రీ యూసోవ్..!
ఈ హంతక ముఠా ప్రధానంగా ఉక్రెయిన్ మిలిటరీ వ్యూహకర్త ఆండ్రీ యూసోవ్ను చంపేందుకు ప్లాన్ చేసినట్లు అధికారులు గుర్తించారు. ఆయన ఉక్రెయిన్ సైనిక సమాచార వ్యవస్థను పర్యవేక్షించడమే కాకుండా రష్యాతో యుద్ధ ఖైదీల మార్పిడి ప్రక్రియలో కీలక పాత్ర పోషిస్తున్నారు. టార్గెట్ చేసిన వ్యక్తి ఎంత ప్రముఖుడైతే.. అంత ఎక్కువ మొత్తంలో రష్యా నగదు ఆశ చూపింది. ఒక్కో హత్యకు గరిష్టంగా 1,00,000 డాలర్ల (భారత కరెన్సీ ప్రకారం సుమారు రూ.90 లక్షలు) వరకు ఇస్తామని రష్యా వాగ్దానం చేసినట్లు ప్రాసిక్యూటర్ జనరల్ తెలిపారు.
కేవలం ఉక్రెయిన్ మాత్రమే కాదు రష్యా కూడా తమ వైపు ఉన్న కీలక నేతల హత్యలకు ఉక్రెయిన్ కారణమని ఆరోపిస్తోంది. దీనిపై స్పందించిన కీవ్.. రష్యా దురాక్రమణకు సహకరిస్తున్న వారికి బుద్ధి చెప్పేందుకే తాము కొన్ని ఆపరేషన్లు చేస్తున్నామని.. అది 'శిక్ష' మాత్రమేనని గతంలో ప్రకటించింది. ప్రస్తుతం పట్టుబడ్డ 10 మందిపై ఉగ్రవాదం, హత్యాయత్నం, దేశద్రోహం కింద కేసులు నమోదు చేశారు. మోల్డోవా కూడా ఈ కుట్రను ధృవీకరిస్తూ.. తమ భూభాగాన్ని ఉగ్రవాద కార్యకలాపాలకు వాడుకోవడాన్ని సహించబోమని స్పష్టం చేసింది. ఈ ఉదంతం రష్యా-ఉక్రెయిన్ మధ్య ఉద్రిక్తతలను మరింత పెంచేలా కనిపిస్తోంది.
|
|