అన్ని దిగుమతులపై 10 శాతం సుంకం విధిస్తూ,,,,ప్రపంచ దేశాలకు ట్రంప్ షాక్

అగ్రరాజ్యం అమెరికా అధ్యక్షుడు డొనాల్డ్ ట్రంప్ తన మొండివైఖరిని మరోసారి చాటుకున్నారు. ప్రపంచ దేశాల నుంచి దిగుమతి అయ్యే వస్తువులపై ఆయన విధించిన సుంకాలు చెల్లవని అమెరికా సుప్రీం కోర్టు చారిత్రక తీర్పును ఇచ్చిన మరుసటి రోజే.. ట్రంప్ తిరిగి అవే సుంకాలను విధిస్తూ సంచలన నిర్ణయం తీసుకున్నారు. అన్ని దేశాల దిగుమతులపై 10 శాతం సుంకాలు విధిస్తూ తాజాగా ఆయన ఉత్తర్వులపై సంతకం చేశారు.

ఫిబ్రవరి 24వ తేదీ నుంచి అమలు..

తన సోషల్ మీడియా ప్లాట్‌ఫారమ్ ట్రూత్ సోషల్ వేదికగా ట్రంపే స్వయంగా ఈ విషయాన్ని వెల్లడించారు. తాజా ఉత్తర్వుల ప్రకారం.. ఈ 10 శాతం సుంకాలు ఫిబ్రవరి 24వ తేదీ నుంచి అమల్లోకి రానున్నాయి. వచ్చే 150 రోజుల పాటు ఈ టారిఫ్‌లు కొనసాగుతాయని వైట్ హౌస్ ఒక ప్రకటనలో స్పష్టం చేసింది. గతంలో విధించిన సుంకాల కంటే మరింత కఠినంగా వీటిని అమలు చేస్తామని.. అమెరికా ఖజానాకు రావాల్సిన ప్రతి పైసాను వసూలు చేస్తామని ట్రంప్ ఈ సందర్భంగా నొక్కి చెప్పారు.

న్యాయమూర్తులపై ట్రంప్ విరుచుకుపాటు

సుప్రీం కోర్టు తీర్పుపై ట్రంప్ తీవ్ర అసహనం వ్యక్తం చేశారు. "మేము అత్యంత ఆమోదయోగ్యమైన పద్ధతిలో సుంకాలు విధిస్తే.. సుప్రీం కోర్టులోని కొందరు దానిని వ్యతిరేకించడం సిగ్గుచేటు. ఇది చాలా హాస్యాస్పదమైన తీర్పు. అయితే మేము తగ్గబోము. గతంలో కంటే ఎక్కువ వసూలు చేసేందుకు అన్ని మార్గాలను అన్వేషిస్తాం" అని ఆయన హెచ్చరించారు. న్యాయస్థానం తీర్పు అమెరికా ప్రయోజనాలకు విఘాతం కలిగిస్తోందని ఆయన అభిప్రాయపడ్డారు.

'చట్టవిరుద్ధమైన తీర్పు' అన్న జేడీ వాన్స్

ఈ వివాదంలో అమెరికా ఉపాధ్యక్షుడు జేడీ వాన్స్ కూడా జోక్యం చేసుకున్నారు. సుప్రీం కోర్టు తీర్పును ఆయన చట్టవిరుద్ధం అని అభివర్ణించారు. "దేశ దిగుమతులను నియంత్రించే అధికారాన్ని కాంగ్రెస్ అధ్యక్షుడికే ఇచ్చింది. కానీ కోర్టు తీర్పు వల్ల అమెరికా పరిశ్రమలను, సరఫరా గొలుసును కాపాడటం కష్టతరం అవుతోంది. అమెరికా కార్మికుల భద్రత కోసం అధ్యక్షుడికి విస్తృత అధికారాలు ఉన్నాయి" అని వాన్స్ తన ఎక్స్ వేదికగా తెలిపారు. మొత్తానికి సుప్రీం కోర్టు తీర్పును పక్కన పెట్టి ట్రంప్ మళ్లీ సుంకాలు విధించడం వల్ల ప్రపంచ దేశాల మధ్య మళ్లీ వాణిజ్య యుద్ధం మొదలయ్యే సూచనలు కనిపిస్తున్నాయన్నారు. భారత్ సహా అనేక దేశాల ఎగుమతులపై ఈ 10 శాతం భారం పడనుండటంతో అంతర్జాతీయ మార్కెట్లు ఆందోళన చెందుతున్నాయి.