ఫామ్ లేకపోయినా ఫుల్ ఎనర్జీ! అభిషేక్ స్పీచ్‌కు గంభీర్ నవ్వులు

టీ - 20 వరల్డ్ కప్ 2026 సూపర్ - 8 దశకు ముందు అభిషేక్ శర్మ జట్టుకు ఇచ్చిన పెప్‌టాక్ వైరల్‌గా మారింది. మూడు వరుస డక్స్ ఉన్నప్పటికీ, అతను సహచరులను ఉత్సాహపరిచాడు. గౌతమ్ గంభీర్, సూర్యకుమార్ యాదవ్ నవ్వులతో స్పందించారు. టీమ్‌లో ఉన్న పాజిటివ్ వాతావరణం అభిమానులను ఆకట్టుకుంటోంది. సూపర్ 8 లో భాగంగా ఆదివారం దక్షిణాఫ్రికాతో మ్యాచ్‌కు ముందు భారత జట్టు పూర్తి ఆత్మవిశ్వాసంతో ఉంది.

ఐసీసీ టీ-20 వరల్డ్ కప్ 2026లో డిఫెండింగ్ ఛాంపియన్‌గా బరిలోకి దిగిన భారత జట్టు ప్రస్తుతం పూర్తి ఉత్సాహంతో ముందుకు సాగుతోంది. సూపర్-8 దశలో దక్షిణాఫ్రికాతో జరిగే కీలక మ్యాచ్‌కు ముందు జట్టులో పాజిటివ్ వాతావరణం స్పష్టంగా కనిపిస్తోంది.

అహ్మదాబాద్‌లోని నరేంద్ర మోదీ క్రికెట్ స్టేడియంలో జరిగిన తొలి ప్రాక్టీస్ సెషన్ సందర్భంగా, యువ బ్యాటర్ అభిషేక్ శర్మ జట్టుకు ప్రత్యేకంగా పెప్‌టాక్ ఇచ్చాడు. ఇప్పటివరకు టోర్నీలో మూడు వరుస డక్స్ నమోదు చేసినప్పటికీ, తన ఫామ్‌ను పక్కన పెట్టి సహచరులను ఉత్సాహపరిచేందుకు ముందుకొచ్చాడు.అభిషేక్ స్పీచ్ సమయంలో అతని ఉత్సాహం, ఎనర్జీ అందరినీ ఆకట్టుకుంది. ముఖ్యంగా హెడ్ కోచ్ గౌతమ్ గంభీర్ , కెప్టెన్ సూర్యకుమార్ యాదవ్ చిరునవ్వుతో స్పందించారు.

పెప్‌టాక్‌కు ముందు అభిషేక్ మాట్లాడుతూ “జట్టులో మోటివేషన్ తగ్గకుండా చూడాలనుకుంటున్నా. అందరికీ ఉత్సాహం ఇచ్చే ప్రయత్నమే ఇది. ఉపయోగపడుతుందని ఆశిస్తున్నా” అని చెప్పాడు. ఆ తర్వాత టీమ్ హడిల్‌లోకి వెళ్లిన అభిషేక్ “మన బేసిక్స్ సరిగ్గా పాటిద్దాం. ఒకరికొకరం సపోర్ట్ చేసుకుంటూ ముందుకు వెళ్దాం” అంటూ మాట్లాడాడు. చివరగా “జో బోలే సో నిహాల్.. సత్ శ్రీ అకాల్” అనే నినాదంతో తన మాటలు ముగించాడు. జట్టు అంతా కలిసి అదే నినాదం పలకడంతో డగౌట్‌లో నవ్వుల వాతావరణం కనిపించింది.

గంభీర్, సూర్యకుమార్ ఇద్దరూ నవ్వుతూ స్పందించడంతో టీమ్‌లో ఉన్న సానుకూల వాతావరణం కనిపించింది. “ఇదే ఛాంపియన్ జట్టు లక్షణం. ఒకరి ఆటను మరొకరు ఆస్వాదించడమే మన బలం” అని అభిషేక్ తన మాటల్లో పేర్కొన్నాడు. అయితే అభిషేక్‌కు వ్యక్తిగతంగా ఈ టోర్నీ ఇప్పటివరకు కలిసిరాలేదు. మూడు మ్యాచ్‌ల్లో మొత్తం ఎనిమిది బంతులే ఎదుర్కొని వరుసగా డక్స్‌తో పెవిలియన్ చేరాడు. నెదర్లాండ్స్‌పై మ్యాచ్‌లో అదృష్టం మార్చుకోవాలని మొహమ్మద్ సిరాజ్ జెర్సీ కూడా ధరించాడు. అయినా ఫలితం మారలేదు.

ఇంతకుముందు కడుపు ఇన్ఫెక్షన్ కారణంగా నమీబియాతో మ్యాచ్‌కు దూరమైన అభిషేక్, ఆస్పత్రిలో చికిత్స కూడా పొందాడు. అయినా కోలుకున్న తర్వాత మళ్లీ జట్టులో చేరి పూర్తి ఉత్సాహంతో కొనసాగుతున్నాడు. సూపర్-8 దశలో భారత్, దక్షిణాఫ్రికా, వెస్టిండీస్, జింబాబ్వే ఉన్న గ్రూప్‌లో పోటీపడుతోంది. ఆదివారం జరగనున్న మ్యాచ్‌లో సౌతాఫ్రికాతో భారత్ తలపడనుంది. ఈ మ్యాచ్‌లో గెలుపే లక్ష్యంగా జట్టు ముందుకు సాగుతోంది.