వాటర్ బాటిల్స్ రేట్లు భారీగా పెంపు.. సామాన్యులకు భారం

భారతదేశంలోని ప్యాకేజ్డ్ వాటర్ బాటిల్స్ మార్కెట్‌పై Iran–Israel యుద్ధ ప్రభావం పడే అవకాశముందని పలు నివేదికలు సూచిస్తున్నాయని Reuters పేర్కొంది.తాజా నివేదికల ప్రకారం, ఈ యుద్ధ పరిస్థితుల కారణంగా దేశంలోని సుమారు 5 బిలియన్ డాలర్ల విలువైన వాటర్ బాటిల్ మార్కెట్ ఒత్తిడిని ఎదుర్కొంటోంది. రాబోయే వేసవి కాలాన్ని దృష్టిలో పెట్టుకుని ఈ పరిణామాలు వినియోగదారుల్లో ఆందోళనను కలిగిస్తున్నాయి. ముఖ్యంగా చమురు సరఫరాలో అంతరాయం ఏర్పడటంతో ప్లాస్టిక్ బాటిళ్లు, మూతలు, లేబుల్స్, కార్డ్‌బోర్డ్ బాక్సుల తయారీ ఖర్చులు గణనీయంగా పెరిగాయి. ఈ ప్రభావంతో దాదాపు 2,000 చిన్న తరహా తయారీదారులు డిస్ట్రిబ్యూటర్లకు ఇచ్చే బాటిల్ ధరను రూ.1 వరకు పెంచినట్లు తెలుస్తోంది. రాబోయే రోజుల్లో ఇది మరో 10 శాతం వరకు పెరిగే అవకాశం ఉందని Federation of All India Packaged Drinking Water Manufacturers Association తెలిపింది.చమురు కొరత కారణంగా పెట్రోలియం ధరలు పెరగడంతో ప్లాస్టిక్ తయారీలో ఉపయోగించే పాలిమర్ ధర కూడా భారీగా పెరిగింది. ప్రస్తుతం కిలో పాలిమర్ ధర సుమారు రూ.170కు చేరింది. ఇది గతంతో పోలిస్తే దాదాపు 50 శాతం పెరిగినట్లుగా సమాచారం. దీంతో బాటిల్ మూతల ధర కూడా పెరిగి ఒక్కటి సుమారు 0.45 పైసలకు చేరింది. ప్రస్తుతం మార్కెట్‌లో ఒక లీటర్ బాటిల్ నీటిని సుమారు రూ.20కు విక్రయిస్తున్నప్పటికీ, తయారీ ఖర్చులు పెరుగుతుండటంతో భవిష్యత్తులో ధరలు పెరిగే అవకాశం ఉందని పరిశ్రమ వర్గాలు చెబుతున్నాయి.అదే సమయంలో దేశంలో సుమారు 70 శాతం భూగర్భ జలాలు కలుషితమై ఉండటంతో ప్రజలు పెద్దఎత్తున ప్యాకేజ్డ్ డ్రింకింగ్ వాటర్‌పై ఆధారపడుతున్నారు. దాదాపు 140 కోట్ల జనాభా ఉన్న భారత్‌లో బాటిల్ నీరు విలాస వస్తువుగా కాకుండా అవసరంగా మారిందని నిపుణులు చెబుతున్నారు. ఈ మార్కెట్‌లో Bisleri, Kinley, Aquafina వంటి ప్రముఖ సంస్థలు పోటీ పడుతున్నాయి. ప్రస్తుతం పెద్ద కంపెనీలు ఖర్చుల పెరుగుదలను తామే భరిస్తున్నప్పటికీ, చిన్న కంపెనీలు మాత్రం ధరలను పెంచక తప్పని పరిస్థితి ఎదుర్కొంటున్నాయని పరిశ్రమ వర్గాలు వెల్లడిస్తున్నాయి.