డిగ్రీ తర్వాత ఉద్యోగ అవకాశం! SBI Fellowship కోసం 21,000 జీతం అందుతోంది

డిగ్రీ పూర్తిచేసిన యువతకు మంచి అవకాశాలు కోసం చూస్తున్న వారికి State Bank of India (SBI) ప్రత్యేక అవకాశం అందిస్తోంది. సామాజిక సేవ మరియు గ్రామీణాభివృద్ధిలో యువతను ప్రోత్సహించే ఉద్దేశ్యంతో ‘SBI Youth for India Fellowship’ కార్యక్రమాన్ని నిర్వహిస్తోంది. ఈ ఫెలోషిప్ 13 నెలలపాటు కొనసాగుతుంది, ఇందులో ఎంపికైన యువత గ్రామీణ ప్రాంతాల్లో నివసిస్తూ స్థానిక ప్రజలతో కలిసి పని చేస్తారు. విద్య, ఆరోగ్యం, పర్యావరణ పరిరక్షణ, మహిళల సాధికారత, జీవనోపాధి వంటి విభాగాల్లో ప్రాజెక్టులు చేపట్టడం ద్వారా సమాజానికి ప్రత్యక్ష సేవ చేయడం ప్రధాన లక్ష్యం. అంతేకాక, యువతలో నాయకత్వ లక్షణాలను పెంపొందించడం, సమాజంపై బాధ్యత పెంచడం కోసం కూడా ఈ కార్యక్రమాన్ని రూపొందించారు.ఫెలోషిప్‌లో దరఖాస్తు చేయాలంటే అభ్యర్థి గుర్తింపు పొందిన యూనివర్సిటీ నుంచి ఏదైనా విభాగంలో గ్రాడ్యుయేషన్ పూర్తి చేసి ఉండాలి. వయసు 21–32 మధ్య ఉండాలి. భారతీయ పౌరులు మాత్రమే కాకుండా OCI కార్డ్ కలిగినవారికి కూడా అర్హత ఉంది. ఎంపికైనవారు గ్రామీణ ప్రజలతో నేరుగా మమేకమై పనిచేయగలగాలి. ప్రాజెక్టులు విద్య, ఆరోగ్యం, పర్యావరణ పరిరక్షణ, నీటి నిర్వహణ, గ్రామీణ జీవనోపాధి వంటి విభాగాల్లో ఉంటాయి.సామాజిక సేవ చేయాలనుకునే యువత ఆర్థిక పరిమితుల వల్ల వెనకడుగు వేయకుండా, SBI ఫెలోలకు ప్రతి నెల రూ. 21,000 వరకు స్టైపెండ్ ఇవ్వబడుతుంది. 13 నెలల ఫెలోషిప్ విజయవంతంగా పూర్తయిన తర్వాత రూ.1,10,000 వరకు రీ-అడ్జస్ట్‌మెంట్ గ్రాంట్ ఇవ్వబడుతుంది. అదనంగా, ఫీల్డ్ ట్రావెల్ ఖర్చులు, మెడికల్ ఇన్సూరెన్స్ వంటి సౌకర్యాలు కూడా అందుబాటులో ఉంటాయి.ఫెలోషిప్‌కు దరఖాస్తు ఆన్‌లైన్ ద్వారా మాత్రమే చేయాలి. అధికారిక వెబ్‌సైట్‌లో రిజిస్ట్రేషన్ చేసి వ్యక్తిగత వివరాలు, విద్యార్హతలను నమోదు చేయాలి. దరఖాస్తులో “Statement of Purpose” రూపంలో ఫెలోషిప్ చేయాలనుకునే కారణాలను వివరించాలి. ఎంపిక రెండు దశల్లో జరుగుతుంది: మొదట ఆన్‌లైన్ అసెస్‌మెంట్ ద్వారా అభ్యర్థుల ఆలోచనా విధానం, సామాజిక అవగాహనను పరీక్షిస్తారు. ఆ తర్వాత పర్సనల్ ఇంటర్వ్యూలో నాయకత్వ లక్షణాలు, కమిట్‌మెంట్, గ్రామీణాభివృద్ధి పై ఆసక్తి మదింపు చేయబడుతుంది.ఈ ఫెలోషిప్‌కు దరఖాస్తు చేసుకునే చివరి తేదీ 30 ఏప్రిల్ 2026. సమాజంలో నిజమైన మార్పు తీసుకురావాలని కలలు కనేవారికి, ఈ ఫెలోషిప్ ఒక గొప్ప అవకాశం.