LPG సంక్షోభంపై కేంద్రం క్లారిటీ.. దారిలో రెండు గ్యాస్ నౌకలు!

పశ్చిమాసియా ప్రాంతంలో కొనసాగుతున్న ఉద్రిక్త పరిస్థితుల కారణంగా భారత్‌లో ఎల్‌పీజీ కొరత ఏర్పడుతుందన్న వార్తలు ఇటీవల సోషల్ మీడియాలో విస్తృతంగా ప్రచారం అవుతున్నాయి. అయితే ఈ వార్తలపై కేంద్ర ప్రభుత్వం స్పందిస్తూ ప్రజలు ఆందోళన చెందాల్సిన అవసరం లేదని స్పష్టం చేసింది. దేశంలో వంట గ్యాస్ సరఫరా విషయంలో ఎలాంటి సమస్య లేదని కేంద్ర అధికారులు తెలిపారు. సోషల్ మీడియాలో కొన్ని ఫేక్ వీడియోలు, ఏఐ ఆధారిత తప్పుడు సమాచారాన్ని కొందరు ప్రచారం చేస్తున్నారని కూడా పేర్కొన్నారు. ఈ అంశంపై కేంద్ర పెట్రోలియం మరియు సహజ వాయువు మంత్రిత్వ శాఖ జాయింట్ సెక్రటరీ Sujata Sharma ఢిల్లీలో మీడియాతో మాట్లాడారు.అంతర్జాతీయ భౌగోళిక–రాజకీయ పరిస్థితుల వల్ల కొంత ఆందోళన ఉన్నప్పటికీ దేశంలో ఎక్కడా గ్యాస్ నిల్వలు పూర్తిగా ఖాళీ అయిన పరిస్థితి లేదని ఆమె వెల్లడించారు. అయితే భయంతో ముందుగానే ఎక్కువ మంది వినియోగదారులు గ్యాస్ సిలిండర్లను బుక్ చేసుకోవడం వల్ల ఒక్కసారిగా డిమాండ్ పెరిగిందని తెలిపారు. కేవలం ఒక రోజులోనే సుమారు 83 లక్షల గ్యాస్ బుకింగ్‌లు నమోదైనట్లు అధికారులు వెల్లడించారు.ఇదిలా ఉండగా అధికారులు తెలిపిన వివరాల ప్రకారం Strait of Hormuz దాటి సుమారు 46 వేల టన్నుల ఎల్‌పీజీ సరుకుతో రెండు నౌకలు ఇప్పటికే భారత్‌కు బయలుదేరాయి. ఈ నౌకలు మార్చి 16, 17 తేదీల్లో భారత తీరాలకు చేరుకునే అవకాశం ఉందని తెలిపారు. బ్లాక్ మార్కెట్‌ను అరికట్టేందుకు ప్రత్యేక తనిఖీలు కొనసాగుతున్నాయని, అవసరమైతే కఠిన చర్యలు తీసుకుంటామని అధికారులు హెచ్చరించారు. ఈ పరిస్థితులపై ప్రధానమంత్రి Narendra Modi కూడా పశ్చిమాసియా దేశాల నాయకులతో సంప్రదింపులు జరుపుతున్నట్లు సమాచారం. దేశీయంగా ఎల్‌పీజీ ఉత్పత్తిని సుమారు 31 శాతం వరకు పెంచినట్లు అధికారులు తెలిపారు. కమర్షియల్ గ్యాస్ సిలిండర్ల సరఫరా కూడా సాధారణంగానే కొనసాగుతోందని, అవసరానికి మించి బుకింగ్‌లు చేయకుండా ప్రజలు సహకరించాలని విజ్ఞప్తి చేశారు.అదేవిధంగా వాణిజ్య వినియోగదారులు ఎక్కువగా పీఎన్‌జీ (పైప్డ్ నేచురల్ గ్యాస్) వినియోగానికి మారేలా ప్రోత్సహించడం ప్రభుత్వ లక్ష్యమని అధికారులు తెలిపారు. ఇందుకు సంబంధించి GAIL (India) Limited ఇప్పటికే వివిధ గ్యాస్ పంపిణీ సంస్థలతో సమావేశాలు నిర్వహించినట్లు చెప్పారు. అర్హులైన వాణిజ్య వినియోగదారులకు త్వరగా పీఎన్‌జీ కనెక్షన్లు అందించాలని సూచనలు ఇచ్చినట్లు తెలిపారు. దేశంలో ముడి చమురు నిల్వలు తగినంతగా ఉన్నాయని, అన్ని రిఫైనరీలు పూర్తి సామర్థ్యంతో పనిచేస్తున్నాయని అధికారులు వెల్లడించారు. ప్రస్తుతం దేశంలో ఎక్కడా పెట్రోల్ బంకుల్లో “నో స్టాక్” పరిస్థితి లేదని కూడా స్పష్టం చేశారు.ఇక కేంద్ర షిప్పింగ్ మంత్రిత్వ శాఖ ప్రతినిధి Rajesh Kumar Sinha తెలిపిన వివరాల ప్రకారం, Persian Gulf ప్రాంతంలో మరో 22 భారతీయ జెండా నౌకలు బయలుదేరేందుకు సిద్ధంగా ఉన్నాయి. వీటిలో మొత్తం 611 మంది భారతీయ నావికులు ఉన్నారని, వారి భద్రతను డీజీ షిప్పింగ్ నిరంతరం పర్యవేక్షిస్తోందన్నారు. పరిస్థితిని బట్టి మరిన్ని నౌకలను సురక్షిత ప్రాంతాలకు తరలించే చర్యలు కూడా కొనసాగుతున్నాయని ఆయన తెలిపారు.