అసలు పరీక్ష 2027 వరల్డ్‌కప్‌లోనే,,,గంభీర్‌కు గంగూలీ హెచ్చరిక

టీమిండియా హెడ్ కోచ్ గౌతమ్ గంభీర్‌కు మాజీ కెప్టెన్ సౌరవ్ గంగూలీ కీలక హెచ్చరిక చేశాడు. ఇప్పటికే రెండు ఐసీసీ ట్రోఫీలు గెలిపించినప్పటికీ గంభీర్‌కు అసలు పరీక్ష ఇంకా ముందే ఉందని గంగూలీ అభిప్రాయపడ్డాడు. గంభీర్ ఐసీసీ టీ20 వరల్డ్‌కప్ 2026ను భారత జట్టుతో గెలిచి చరిత్ర సృష్టించాడు. అంతకుముందు ఐసీసీ ఛాంపియన్స్ ట్రోఫీ 2025ను కూడా భారత్‌కు అందించాడు. దీంతో భారత జట్టు కోచ్‌గా రెండు ఐసీసీ ట్రోఫీలు గెలిచిన తొలి కోచ్‌గా నిలిచాడు.

అయితే గంగూలీ అభిప్రాయం ప్రకారం గంభీర్‌కు నిజమైన పరీక్ష ఇంకా మిగిలే ఉంది. అది ఐసీసీ వన్డే వరల్డ్‌కప్ 2027 రూపంలో ఎదురుకానుంది. ఈ టోర్నీ దక్షిణాఫ్రికాలో జరగనుండటంతో అక్కడి పరిస్థితులు జట్టుకు సవాల్‌గా మారవచ్చని ఆయన తెలిపారు. మజూందార్‌కు ఇచ్చిన ఇంటర్వ్యూలో గంగూలీ మాట్లాడుతూ “వైట్ బాల్ క్రికెట్‌లో గంభీర్‌కు అసలు పరీక్ష 2027లో దక్షిణాఫ్రికాలో జరిగే వరల్డ్ కప్‌లోనే ఉంటుంది. అక్కడి పరిస్థితులు అతనిని పరీక్షిస్తాయి. అయితే అతని దగ్గర ఉన్న జట్టుతో అతను విజయం సాధిస్తాడని నాకు నమ్మకం ఉంది” అని అన్నాడు.

భారత జట్టు గతంలో వన్డే వరల్డ్‌కప్ 2023లో అద్భుతంగా ఆడింది. ఫైనల్ వరకు ఒక్క మ్యాచ్ కూడా ఓడిపోకుండా వచ్చిన భారత్ చివరికి ఆస్ట్రేలియా చేతిలో ఓడిపోయి ట్రోఫీని కోల్పోయింది. ఇప్పుడు 2027 వరల్డ్ కప్ భారత స్టార్ ఆటగాళ్లు విరాట్ కోహ్లి, రోహిత్ శర్మకు చివరి అవకాశం కావచ్చని కూడా భావిస్తున్నారు.

గంగూలీ మరో ముఖ్యమైన విషయాన్ని కూడా ప్రస్తావించాడు. టెస్ట్ క్రికెట్‌లో భారత జట్టు ప్రదర్శన ఇంకా మెరుగుపడాల్సిన అవసరం ఉందని ఆయన పేర్కొన్నాడు. “రెడ్ బాల్ క్రికెట్‌లో గంభీర్ ఇంకా మెరుగుపడాలి. పిచ్ గురించి ఎక్కువగా ఆలోచించాల్సిన అవసరం లేదు. మంచి పిచ్‌లు ఉంటే మంచి ఫలితాలు వస్తాయి. ఇంగ్లాండ్ సిరీస్‌ను చూడండి, అక్కడ పిచ్‌పై అతనికి ఎలాంటి నియంత్రణ లేదు” అని గంగూలీ వ్యాఖ్యానించాడు.

“గౌతమ్ గంభీర్ మంచి కోచ్. అతనికి కొంత సమయం ఇవ్వాలని నేను ముందే చెప్పాను. వైట్ బాల్ క్రికెట్‌లో అతను చాలా మంచి కోచ్. అతని వద్ద మంచి జట్టు ఉంది,” అని గంగూలీ అన్నాడు. ప్రస్తుతం ఐపీఎల్ 2026 సీజన్ కొనసాగుతోంది. ఈ టోర్నీ ముగిసిన తర్వాత గంభీర్ మళ్లీ భారత జట్టుతో టెస్ట్ మరియు వన్డే క్రికెట్‌పై దృష్టి పెట్టనున్నాడు.