కోట్ల సంపద ఉన్నా కొడుకు కోల్పోయిన బాధ.. Anil Agarwal ఎమోషనల్ పోస్ట్ వైరల్

Anil Agarwal, Vedanta Resources ఛైర్మన్ మరియు ప్రముఖ పారిశ్రామికవేత్త, తన కుమారుడి మరణం తర్వాత ఎదుర్కొన్న మానసిక వేదనను India Today Conclave 2026లో భావోద్వేగంగా పంచుకున్నారు. వ్యక్తిగతంగా తీవ్ర విషాదాన్ని ఎదుర్కొన్నప్పటికీ దేశాభివృద్ధి కోసం తన ప్రయాణాన్ని ఆపబోనని ఆయన స్పష్టం చేశారు. భారతదేశంలో అపారమైన అవకాశాలు ఉన్నాయని, స్వయం సమృద్ధి దిశగా దేశం ముందుకు సాగాల్సిన అవసరం ఉందని ఈ సందర్భంగా తెలిపారు.ఇటీవల ఆయన కుమారుడు Agnivesh Agarwal (49) న్యూయార్క్‌లో స్కీయింగ్ ప్రమాదం నుంచి కోలుకుంటున్న సమయంలో గుండెపోటుతో మరణించారు. వేదాంత గ్రూప్‌లో కీలక బాధ్యతలు నిర్వహిస్తున్న ఆయన ఆకస్మిక మరణం కుటుంబాన్ని తీవ్రంగా కలిచివేసింది. ఈ విషాదంపై స్పందించిన అనిల్ అగర్వాల్ భావోద్వేగానికి లోనయ్యారు. తనకు ఒక్క కుమారుడే ఉన్నాడని, అతడిని కోల్పోవడం జీవితంలో పెద్ద దెబ్బగా మారిందని చెప్పారు. అయితే ఈ సంఘటన తర్వాత కూలిపోవడం కాకుండా ధైర్యంగా ముందుకు సాగాలని నిర్ణయించుకున్నానని, ఎందుకంటే తన హృదయంలో భారతదేశం ఉందని, దేశం కోసం ఇంకా చాలా చేయాల్సి ఉందని పేర్కొన్నారు. ఈ అనుభవం తనను మరింత ధైర్యవంతుడిగా మార్చిందని, ఇప్పుడు తనకు ఎలాంటి భయం లేదని ఆయన అన్నారు.అదేవిధంగా భారతదేశం నుంచి ప్రతి సంవత్సరం సుమారు 7 లక్షల మంది విద్యార్థులు ఉన్నత విద్య కోసం విదేశాలకు వెళ్లడం ఆందోళనకరమని ఆయన అభిప్రాయపడ్డారు. మన దేశంలోనే అంతర్జాతీయ స్థాయి విద్యను అందించే సామర్థ్యం ఉందని, యువతకు ఇక్కడే మంచి అవకాశాలు కల్పించాలని సూచించారు. దేశంలోని యువత, మహిళలు, రిటైర్డ్ సైనికులకు సరైన అవకాశాలు అందిస్తే భారత్ ప్రపంచంలోనే శక్తివంతమైన దేశంగా ఎదగగలదని ఆయన విశ్వాసం వ్యక్తం చేశారు.ఇంధన రంగంపై కూడా ఆయన కీలక వ్యాఖ్యలు చేశారు. ప్రస్తుతం భారత్ తన ఇంధన అవసరాల కోసం దిగుమతులపై ఎక్కువగా ఆధారపడుతోందని, దేశానికి అవసరమైన చమురు డిమాండ్‌లో సుమారు 90 శాతం దిగుమతుల ద్వారానే తీరుతోందని తెలిపారు. దేశంలో సహజ వనరులు సమృద్ధిగా ఉన్నప్పటికీ విధానపరమైన అనుమతుల జాప్యం కారణంగా వాటిని పూర్తిగా వినియోగించుకోలేకపోతున్నామని అన్నారు. మధ్యప్రాచ్య దేశాలు భారత్ ఎప్పటికీ తమపై ఆధారపడాలని కోరుకుంటాయని, భారత్ స్వయం సమృద్ధి సాధించడాన్ని అవి పెద్దగా ఇష్టపడవని కూడా వ్యాఖ్యానించారు. దేశ ఆర్థిక వ్యవస్థను బలోపేతం చేయాలంటే దేశీయ ఇంధన వనరులను అభివృద్ధి చేయడం అత్యవసరమని, ఇందుకోసం ప్రభుత్వం తక్షణ విధాన సంస్కరణలు చేపట్టాలని అనిల్ అగర్వాల్ సూచించారు.