నిరూపిస్తే రాజీనామా చేస్తా.... స్పీకర్ తమ్మినేనికి లోకేష్ సవాల్
Andhra Pradesh Telugu | Suryaa Desk | Published : Fri, Nov 08, 2019, 09:30 PM
పార్టీలకు అతీతంగా వ్యవహరించాల్సిన ఏపీ స్పీకర్ తమ్మినేని సీతారాం తెలుగుదేశం పార్టీపై, ఆ పార్టీ అధినేత చంద్రబాబుపై చేసిన వ్యాఖ్యలు రాజకీయ దుమారాన్ని రేపుతున్నాయి. స్పీకర్ స్థాయిలో ఉన్న వ్యక్తి ప్రతిపక్ష నేత చంద్రబాబు నాయుడుపై చేసిన వ్యాఖ్యలు చేయటమేంటని, నిలదీస్తే, నేను ముందు శాసనసభ్యుడిని తరువాతే స్పీకర్ని అంటూ ఇచ్చిన సమాధానం కూడా ఏపీలో హట్ టాపిక్గా మారింది.
కాగా తమ్మినేని వ్యాఖ్యలపై టీడీపీ రాష్ట్ర ప్రధాన కార్యదర్శి ఎమ్మెల్సీ నారా లోకేష్ ధీటుగా స్పందించారు. తమ్మినేని చేస్తున్న ఆరోపణలు వాస్తవమైతే... అగ్రిగోల్డ్తో తనకు సంబంధాలు ఉన్నట్టు నిరూపిస్తే... ఎమ్మెల్సీ పదవికి రాజీనామా చేసి రాజకీయాల నుండి తప్పుకుంటానని సవాల్ విసిరారు. తమ్మినేని తన ఆరోపణలను నిరూపించుకోలేక పోతే ఏం చేస్తారో కూడా చెప్పాలని ప్రశ్నిస్తూ స్పీకర్ తమ్మినేనికి లోకేష్ బహిరంగ లేఖ రాశారు. తెలుగుదేశం పార్టీపై అనేక ఆరోపణలతో ఎన్నికలలో గెలిచిన వైసిపి అధికారంలోకి వచ్చి అయిదునెలలు అవుతున్నా తనపై, తెలుగుదేశం పార్టీపై చేసిన ఒక్క ఆరోపణ కూడ నిరూపించలేకపోయారని, కమిటీలతో కాలక్షేపం చేస్తున్నారని ఎద్దేవా చేసారు. వైఎస్ హయాంలో అగ్రిగోల్డ్ సంస్థ విస్తరించిందని, టీడీపీ హయాంలో బాధితుల వివరాలు మాత్రమే సేకరించామని తెలిపారు. కోర్టులో వ్యవహారం ఉన్నందునే డబ్బులు మంజూరు చేయలేదని వివరించారు. మరి ఏపీ స్పీకర్ తమ్మినేని సీతారాం లోకేష్ సవాల్పై ఎలా స్పందిస్తారో చూడాలి.
|
|