నితీశ్కి లాలూ ఝలక్.. రాజీనామా ప్రసక్తే లేదు
Andhra Pradesh Telugu | Suryaa Desk | Published : Wed, Jul 12, 2017, 01:04 PM
పాట్నా: బీహార్ ముఖ్యమంత్రి నితీశ్ కుమార్కు ఆర్జేడీ చీఫ్ లాలూ ప్రసాద్ యాదవ్ షాకిచ్చారు. నాలుగు రోజుల్లోగా బీహార్ డిప్యూటీ సీఎం తేజస్వి యాదవ్ తనపై వస్తున్న అవినీతి ఆరోపణలకు సమాధానం చెప్పాలంటూ నితీశ్ అల్టిమేటం జారీ చేసిన సంగతి తెలిసిందే. దీంతో ఆయన తేజస్వి రాజీనామా కోరుతున్నట్టు పరోక్షంగా సంకేతాలు వెళ్లాయి. అయితే తన కుమారుడు తేజస్వి రాజీనామా చేసే ప్రసక్తే లేదని తాజాగా లాలూ తేల్చి చెప్పారు. లాలూ సహా ఆయన కుటుంబ సభ్యుల ఇళ్లపై గత వారం సీబీఐ దాడులు జరిగిన విషయం తెలిసిందే. ఈ నేపథ్యంలో లాలూ తొలిసారి ఓ జాతీయ మీడియా సంస్థకు ఇంటర్వ్యూ ఇచ్చారు. ప్రధానమంత్రి నరేంద్ర మోదీ, బీజేపీ అధ్యక్షుడు అమిత్షా కలిసి తనను, తన పార్టీని తుడిచిపెట్టేందుకు కుట్ర పన్నుతున్నారని ఆరోపించారు. హోటల్ ఒప్పందంలో తేజస్విపై వస్తున్న ఆరోపణలు అర్థరహితమని కొట్టిపారేశారు. ఆ డీల్ కుదిరినప్పుడు తేజస్వి మైనర్ అనీ.. క్రికెట్ ప్లేయర్గా ఉన్నాడని లాలూ వివరించారు. అద్భుతమైన పనితీరుతో ముందుకెళ్తున్నందుకే తేజస్విని లక్ష్యంగా చేసుకుంటున్నారని ఆరోపించారు.
|
|