కేంద్ర ఎన్నికల సంఘం కీలక నిర్ణయం
national | Suryaa Desk | Published : Tue, Apr 27, 2021, 01:34 PM
దేశంలో కరోనా కేసులు పెరుగుతున్న నేపథ్యంలో కేంద్ర ఎన్నికల సంఘం కీలక నిర్ణయం తీసుకుంది. ఎన్నికల విజయోత్సవ ర్యాలీలపై నిషేధం విధించింది. ఈ మేరకు మంగళవారం ఈసీ ఉత్తర్వులు జారీ చేసింది. ఇటీవల తమిళనాడు, కేరళ, అసోంలో అసెంబ్లీ ఎన్నికల పోలింగ్ జరిగింది. పశ్చిమ బెంగాల్ లో కూడా ఎన్నికలు జరుగుతున్నాయి. అలాగే పలు రాష్ట్రాల్లోనూ పార్లమెంట్, అసెంబ్లీ నియోజకవర్గాలకు ఉప ఎన్నికలు జరిగాయి. మే 2న తేదీన ఎన్నికల ఫలితాలను ఈసీ ప్రకటించనుంది. ఈ నేపథ్యంలో విజయోత్సవ ర్యాలీలపై ఆంక్షలు విధించింది. ఇప్పటికే ఎన్నికల్లో కరోనా నిబంధనల అమలు విషయంలో మద్రాస్ హైకోర్టు ఎన్నికల కమిషన్ పై ఆగ్రహం వ్యక్తం చేసింది. కరోనా కేసులు కొనసాగుతున్నప్పటికీ ర్యాలీలు, రోడ్ షో ల్లో ఆంక్షల అమలులో పూర్తిగా విఫలమైందని, ‘కరోనా సెకండ్ వేవ్కు ఏకైక కారణం ఈసీ అని, ఇందుకు అధికారులపై మర్డర్ కేసు నమోదు చేయాలని’ న్యాయమూర్తి అభిప్రాయపడ్డారు.
|
|