గ్రీన్‌ల్యాండ్ వివాదం.. రూ.800 కోట్ల బంగారం ఇవ్వడానికి సిద్ధమన్న ట్రంప్

ప్రపంచంలోనే అతి పెద్ద ద్వీపమైన గ్రీన్‌ల్యాండ్‌పై అమెరికా మాజీ అధ్యక్షుడు డొనాల్డ్ ట్రంప్‌కు ప్రత్యేక ఆసక్తి ఉన్న సంగతి తెలిసిందే. డెన్మార్క్‌ అధీనంలోని గ్రీన్‌లాండ్‌‌ను కొనుగోలు చేస్తానని ట్రంప్ ఇప్పటికే అనేక సందర్భాల్లో ప్రకటించారు. ఈ క్రమంలో తాజాగా ట్రంప్ కీలక నిర్ణయం తీసుకున్నారు. గ్రీన్‌ల్యాండ్‌కు ప్రత్యేక దూతగా.. లూసియానా గవర్నర్ జెఫ్ లాండ్రీని గ్రీన్‌ల్యాండ్‌కు ప్రత్యేక దూతగా నియమిస్తూ ఆదేశాలు జారీ చేశారు.

అయితే దీనిపై పెద్ద ఎత్తున విమర్శలు వచ్చాయి. కేవలం అక్కడున్న ఖనిజ సంపద కోసమే ట్రంప్ ఈ నిర్ణయం తీసుకున్నారని ఆరోపణలు వెల్లువెత్తుతున్నాయి. ఈ క్రమంలో ట్రంప్ ఈ అంశంపై స్పందించారు. తాను ఈ నిర్ణయం తీసుకుంది.. ఖనిజ సంపద కోసం కాదని.. అమెరికా జాతీయ భద్రత కోసమే అని స్పష్టం చేశారు.

గ్రీన్‌ల్యాండ్ ప్రపంచంలోనే అతి పెద్ద ద్వీపం. అయితే ఇక్కడ జనాభా మాత్రం కేవలం 57 వేల మంది ఉన్నారు. ఇది డానిష్, అమెరికా సైనిక స్థావరాలకు నిలయం. ఇక్కడ అపారమైన ఖనిజ సంపద ఉంది. అరుదైన ఎర్త్ మెటల్స్, ఇనుము, యురేనియం, రాగి, లిథియం వంటి ఖనిజాలు భారీ పరిమాణంలో ఉన్నాయి. ఖనిజ సంపద మాత్రమే కాక భౌగోళికంగా కూడా ఈ ప్రాంతం అమెరికాకు కీలకం. వీటిని దృష్టిలో పెట్టుకునే ట్రంప్ గ్రీన్‌ల్యాండ్ కొనుగోలుకు ఆసక్తి చూపుతున్నారని నిపుణులు అంటున్నారు.

గతంలో అంటే ట్రంప్ మొదటిసారి అమెరికా అధ్యక్షుడిగా ఉన్న 2016 సంవత్సరంలో.. గ్రీన్‌లాండ్‌ను అమెరికాలో కలపాలని అనేక ప్రయత్నాలు చేశారు. ఇందుకోసం భారీ ఆఫర్‌ను ప్రతిపాదించారు. గ్రీన్‌ల్యాండ్‌ను తమకు ఇచ్చేస్తే.. 800 కోట్ల విలువైన బంగారం ఇస్తామని ప్రతిపాదనలు పెట్టారు. పైగా అక్కడి ప్రజలు తమ ప్రాంతాన్ని అమెరికాలో కలపాలని కోరుకుంటున్నారని.. డెన్మార్క్ విధానాలు వారికి నచ్చడం లేదని.. మీడియా ఎదుట అనేక సార్లు చెప్పుకొచ్చారు.

ఈ క్రమంలో తాజాగా మరోసారి ట్రంప్ గ్రీన్‌ల్యాండ్ అంశాన్ని తెర మీదకు తెచ్చారు. ప్రత్యేక ప్రతినిధి నియామకం ద్వారా వాణిజ్య, భద్రతా, వ్యూహాత్మక అంశాలను బలపరచాలని సంకేతం ఇచ్చారు. అయితే ట్రంప్ నిర్ణయంపై పెద్ద ఎత్తున విమర్శలు వస్తున్నాయి. తాము అమెరికా సహా అన్ని దేశాలతో కలిసి ముందుకు సాగుతామని.. కానీ తమ భవితవ్యాన్ని తామే నిర్ణయించుకుంటామని గ్రీన్‌ల్యాండ్‌ ప్రధాని ప్రకటించారు. అమెరికాతో సహా ప్రతిఒక్కరూ డెన్మార్క్‌ రాజ్య ప్రాంతీయ సమగ్రతను గౌరవించాలని డెన్మార్క్‌ విదేశాంగ మంత్రి పేర్కొన్నారు.