సబ్జైలులో స్మగ్లర్ సంగీత ఆత్మహత్యాయత్నం
Andhra Pradesh Telugu | Suryaa Desk | Published : Thu, Aug 24, 2017, 06:19 PM
ఎర్రచందనం స్మగ్లింగ్ కేసులో అరెస్టయి చిత్తూరు సబ్జైలులో రిమాండ్ ఖైదీగా ఉన్న సంగీత చటర్జీ గురువారం ఆత్మహత్యాయత్నం చేసింది. టాయిలెట్ క్లీనర్ను తీసుకుని బలవన్మరణానికి యత్నించింది. ఈ విషయాన్ని గమనించిన జైలు సిబ్బంది ఆమెను చికిత్స నిమిత్తం హుటాహుటిన చిత్తూరు ప్రభుత్వాసుపత్రికి తరలించారు. ప్రస్తుతం ఆమె ఆసుపత్రిలో చికిత్స పొందుతోంది. పీడీ యాక్టు కింద జైల్లో ఉన్న సంగీతకు బెయిల్ రాకపోడంతో నిరాశ చెంది ఆత్మహత్యకు యత్నించినట్లు పోలీసులు భావిస్తున్నారు.
కోల్కతాకు చెందిన సంగీతను ఎర్రచందనం అక్రమ రవాణా కేసులో కొన్ని నెలల క్రితం చిత్తూరు పోలీసులు అరెస్టు చేశారు. ఎర్రచందనం అంతర్జాతీయ స్మగ్లర్ మార్కొండ లక్ష్మణ్ రెండో భార్యే సంగీత. ఎయిర్హోస్టస్గా కెరీర్ ప్రారంభించి ఆ తరవాత మోడల్గా మరిన సంగీత.. బడా స్మగ్లర్ లక్ష్మణ్ను వివాహాం చేసుకుంది. లక్ష్మణ్తో కలసి ఆమె కూడా ఎర్రచందనం స్మగ్లింగ్కు పాల్పడింది. వీరిపై 2015లో చిత్తూరు జిల్లాలో రెండు కేసులు నమోదయ్యాయి. అప్పటి నుంచి అజ్ఞాతంలో ఉన్న సంగీతను ప్రత్యేక పోలీసు బృందం పక్కా ప్రణాళికతో ఈ ఏడాది మార్చిలో కోల్కతాలో అరెస్టు చేశారు. అక్కడి నుంచి చిత్తూరు తీసుకొచ్చి సబ్జైలులో రిమాండ్ ఖైదీగా ఉంచారు.
|
|