ఆన్‌లైన్‌లో అభ్యంతరకరమైన కంటెంట్‌పై,,,కేంద్రం కొరడా

ఆన్‌లైన్, సోషల్ మీడియా వేదికలకు కేంద్ర ప్రభుత్వం గట్టి హెచ్చరిక జారీ చేసింది. తమ వేదికలపై అశ్లీల, అసభ్యకరమైన కంటెంట్‌పై సరైన చర్యలు తీసుకోకపోతే చట్టపరమైన పరిణామాలను ఎదుర్కోవాల్సి వస్తుందని స్పష్టం చేసింది. డిసెంబర్ 29న కేంద్ర ఎలక్ట్రానిక్స్ అండ్ ఐటీ మంత్రిత్వ శాఖ జారీచేసిన ఉత్తర్వులో ఆన్‌లైన్, సోషల్ మీడియా వేదికలు తమ అంతర్గత నిబంధనలను వెంటనే సమీక్షించుకోవాలని, చట్టవిరుద్ధమైన, అశ్లీల కంటెంట్‌పై కఠిన చర్యలు తీసుకోవాలని ఆదేశించింది. ఇక, సుప్రీంకోర్టు కూడా ఆన్‌లైన్, సోషల్ మీడియా వేదికల్లో ప్రసారమయ్యే కంటెంట్‌ను పోర్నోగ్రఫీతో పోల్చింది.

ఈ ఆదేశాలను పాటించడంలో విఫలమైతే చట్టపరమైన చర్యలు తప్పవని మంత్రిత్వ శాఖ హెచ్చరించింది. ఆన్‌లైన్ వేదికలకు ఇన్ఫర్మేషన్ టెక్నాలజీ చట్టం సెక్షన్ 79 కింద లభించే బాధ్యత మినహాయింపు, తమ ప్లాట్‌ఫామ్‌లలోని మూడో పక్షం కంటెంట్‌పై ‘తగిన జాగ్రత్త’ తీసుకున్నప్పుడే వర్తిస్తుందని పేర్కొంది. ఇటీవలి సమీక్షలో అనేక సోషల్ మీడియా ప్లాట్‌ఫామ్‌లు అశ్లీల, అసభ్యకరమైన, ఇతర చట్టవిరుద్ధమైన కంటెంట్‌పై చర్యలు తీసుకోవడం లేదనే అభిప్రాయం వ్యక్తమైంది. ఐటీ నిబంధనలు 2021 ప్రకారం.. అశ్లీల, పిల్లల లైంగిక వేధింపులకు సంబంధించిన లేదా పిల్లలకు హానికరమైన కంటెంట్‌ను అందుబాటులో ఉంచడం, అప్‌లోడ్ చేయడం, ప్రచురించడం, ప్రసారం చేయడం, పంచుకోవడం వంటివి నిరోధించడానికి సహేతుకమైన ప్రయత్నాలు చేయాలని ఆన్‌లైన్ ప్లాట్‌ఫామ్‌లకు మంత్రిత్వ శాఖ గుర్తు చేసింది.

కోర్టు ఆదేశాలు లేదా ప్రభుత్వ నోటిఫికేషన్ అందిన వెంటనే చట్టవిరుద్ధమైన కంటెంట్‌ను తొలగించాలని లేదా దానికి యాక్సెస్‌ను నిలిపివేయాలని స్పష్టం చేసింది. లైంగిక చర్యలలో ఒక వ్యక్తిని చిత్రీకరించే కంటెంట్‌పై ఫిర్యాదు అందిన 24 గంటల్లోగా చర్య తీసుకోవడం తప్పనిసరి. అన్ని ఆన్‌లైన్ ప్లాట్‌ఫామ్‌లు తమ కంటెంట్ మోడరేషన్ సిస్టమ్‌లను, అంతర్గత నియంత్రణ ప్రక్రియలను, వినియోగదారుల ఫిర్యాదుల పరిష్కార యంత్రాంగాలను వెంటనే సమీక్షించుకోవాలని ఐటీ మంత్రిత్వ శాఖ కోరింది. ఇదిలా ఉండగా, ఆన్‌లైన్, సోషల్ మీడియాలో అశ్లీలత శృతిమించడంతో సామాజిక ఉద్యమకారులు, హక్కుల సంఘాలు తీవ్ర అభ్యంతరం వ్యక్తం చేస్తున్నాయి. గతంలో సుప్రీంకోర్టు సైతం అనేక సందర్భాల్లో ఈ అంశంపై ఆందోళన వ్యక్తం చేసింది. వీటిని నియంత్రణకు మార్గదర్శకాలను రూపొదించాలని కేంద్రాన్ని ఆదేశించింది.