కోతి ఏఐ వీడియోలతో ఏడాదిలోనే రూ.38 కోట్లు సంపాదించిన భారత యూట్యూబ్ ఛానల్‌

ప్రస్తుతం చాలా మంది సోషల్ మీడియాలో కంటెంట్ క్రియేటర్లుగా మారిపోయి.. భారీగా డబ్బులు సంపాదిస్తున్నారు. మొదట ఉద్యోగాలు చేస్తూ పార్ట్ టైమ్ కింద వీడియోలు తీసేవారు కూడా.. మంచి మంచి ఉద్యోగాలను సైతం వదిలేసుకుని.. ఫుల్ టైమ్ వ్లాగర్లుగా మారిపోతున్నారు. యూట్యూబ్‌, ఫేస్‌బుక్, ఇన్‌స్టాగ్రామ్.. ఇలా రకరకాల యాప్‌లలో తమ కంటెంట్ ద్వారా సబ్‌స్క్రైబర్లు, ఫాలోవర్లను పెంచుకుంటున్నారు. లైక్‌లు, షేర్లు, కామెంట్లు లక్షల్లో రావడంతో.. వారికి డబ్బులు వస్తున్నాయి. అయితే ఇప్పుడు యూట్యూబ్‌లో ఆర్టిఫిషియల్ ఇంటెలిజెన్స్ (ఏఐ) సృష్టించిన కంటెంట్ ద్వారా కోట్ల రూపాయలు సంపాదించవచ్చని నిరూపిస్తూ.. భారత్‌కు చెందిన ఒక ఛానల్ ప్రపంచవ్యాప్తంగా వార్తల్లో నిలిచింది.

క్యాప్‌వింగ్ అనే వీడియో ఎడిటింగ్ ప్లాట్‌ఫారమ్ నిర్వహించిన తాజా అధ్యయనంలో బందర్ అప్నా దోస్త్ అనే భారతీయ యూట్యూబ్ ఛానల్ ఏఐ వీడియోల విభాగంలో గ్లోబల్ చార్ట్‌లలో అగ్రస్థానంలో నిలిచింది. యూట్యూబ్‌లో కేవలం ఏఐ ఆధారిత కంటెంట్‌ను మాత్రమే పోస్ట్ చేసే అత్యంత ప్రజాదరణ పొందిన ఛానల్‌గా ఇది గుర్తింపు పొందింది. ఈ ఛానల్ ఏడాదికి సుమారు 4.25 మిలియన్ డాలర్లు అంటే మన భారత కరెన్సీలో దాదాపు రూ.38 కోట్లు ఆర్జిస్తున్నట్లు ఈ నివేదిక వెల్లడించింది.

 ఈ బందర్ అప్నా దోస్త్ ఛానల్‌కు ఇప్పటివరకు 240 కోట్లకు పైగా వ్యూస్.. 27 లక్షల మందికి పైగా సబ్‌స్క్రైబర్లు ఉన్నారు. ఈ యూట్యూబ్ ఛానల్‌లో ప్రసారమయ్యే వీడియోలు అత్యంత విచిత్రంగా, ప్లాట్ ఏమీ లేకుండా ఉండటమే దీని విజయానికి కారణమని నిపుణులు చెబుతున్నారు. ఇందులో మనిషి రూపంలో ఉన్న ఒక కోతి.. హల్క్ తరహాలో ఉండే ఒక కండలు తిరిగిన వ్యక్తి మధ్య జరిగే పోరాటాలు, హాస్య సన్నివేశాలు ఉంటాయి.

ఇలాంటి వీడియోలను నిపుణులు ఏఐ స్లాప్ అని పిలుస్తారు. అంటే తక్కువ శ్రమతో.. కేవలం వ్యూస్ పెంచుకోవడమే లక్ష్యంగా ఏఐ టూల్స్‌ను ఉపయోగించి రూపొందించే నాణ్యత లేని కంటెంట్ అని అర్థం. అయితే ఈ అర్థం లేని వీడియోలనే నెటిజన్లు ఎక్కువగా చూస్తున్నట్లు ఈ అధ్యయనం స్పష్టం చేస్తోంది. ఈ క్యాప్‌వింగ్ నివేదిక ప్రకారం.. యూట్యూబ్ ఆల్గారిథమ్ నాణ్యత కంటే వీడియోను ఎంత సమయం చూస్తున్నారు అనే దానికే ప్రాధాన్యత ఇస్తోందని తెలుస్తోంది.

యూట్యూబ్ ఒక కొత్త అకౌంట్‌కు సూచించే మొదటి 500 వీడియోల్లో 21 శాతం వీడియోలు ఇలాంటి ఏఐ స్లాప్ రకానికి చెందినవేనని తేలింది. ఇలాంటి మాస్ ప్రొడ్యూస్డ్ వీడియోల వల్ల నిజమైన క్రియేటర్లు చేసే లోతైన, ఆలోచనాత్మకమైన వీడియోలు మరుగున పడిపోయే అవకాశం ఉందని పరిశోధకులు ఆందోళన వ్యక్తం చేస్తున్నారు.