అపోలో ఆస్పత్రిలో చికిత్స పొందుతూ....బంగ్లాదేశ్ మాజీ ప్రధాని మృతి

బంగ్లాదేశ్ మాజీ ప్రధాని బేగం ఖలీదా జియా(80) కన్నుమూశారు. గత కొన్ని రోజులుగా తీవ్ర అనారోగ్య సమస్యలతో బాధపడుతూ ఆస్పత్రిలో చికిత్స పొందుతున్న ఖలీదా.. డిసెంబర్ 30, మంగళవారం నాడు తుది శ్వాస విడిచారు. . బంగ్లాదేశ్ నేషనలిస్ట్ పార్టీ (BNP) అధ్యక్షురాలైన ఖలీదా జియా గత 36 రోజులుగా ఆస్పత్రిలో చికిత్స పొందుతున్నారు. ఆమె కోలుకోవాలని పార్టీ కార్యకర్తలు, అభిమానులు ప్రార్థించారు. అంతేకాక వచ్చే ఏడాది బంగ్లాదేశ్ ఎన్నికల్లో ఆమె గెలిచి మళ్లీ దేశానికి ప్రధాని అవుతారని చాలామంది భావించారు. అయితే తీవ్ర అనారోగ్యంతో బాధపడుతూ ఢాకాలోని అపోలో ఆసుపత్రిలో చికిత్స పొందుతూ ఆమె మరణించారు.

ఖలీదా జియా మృతి గురించి బీఎన్‌పీ పార్టీ ఒక ప్రకటన విడుదల చేసింది. ‘మంగళవారం ఉదయం 6 గంటలకు ఖలీదా జియా తుది శ్వాస విడిచారు. ఆమె గత 36 రోజులుగా ఆమె ఆసుపత్రిలో చికిత్స తీసుకుంటున్నారు. నవంబర్ 23న ఖలీదా జియా గుండె, ఊపిరితిత్తుల ఇన్ఫెక్షన్లతో బాధపడుతూ.. ఆసుపత్రిలో చేరారు. ఆమె కొలుకుంటుందని భావించాము. కానీ దురదృష్టవశాత్తు ఆమె తుది శ్వాస విడిచారు. ఉదయం ప్రార్థన తర్వాత మంగళవారం 6:00 గంటలకు మరణించారు’ అని పార్టీ ఒక ప్రకటనలో పేర్కొంది. ఆమె ఆత్మకు శాంతి చేకూరాలని ప్రార్థిస్తున్నాము అని ప్రకటనలో తెలిపారు.

బంగ్లాదేశ్ తొలి మహిళా ప్రధాని అయిన ఖలీదా జియా, చాలా కాలంగా కాలేయ సిర్రోసిస్, ఆర్థరైటిస్, డయాబెటిస్, కిడ్నీలు, ఊపిరితిత్తులు, గుండె, కళ్లకు సంబంధించిన దీర్ఘకాలిక సమస్యలతో పోరాడుతున్నారు. బంగ్లాదేశ్, యూకే, యూఎస్ఏ, చైనా, ఆస్ట్రేలియా దేశాలకు చెందిన నిపుణులతో కూడిన వైద్యుల బృందం ఆమె చికిత్సను పర్యవేక్షించింది. కార్డియాలజిస్ట్ షహాబుద్దీన్ తాలుక్దార్ ఈ బృందానికి నాయకత్వం వహించారు. పైగా ఈ నెల ప్రారంభంలో ఆమెను విదేశాలకు తీసుకెళ్లి చికిత్స అందించాలని భావించారు. కానీ, ఆమె ఆరోగ్యం సహకరించకపోవడంతో ఆ ప్రయత్నం ముందుకు సాగలేదు. ఈక్రమంలో ఆమెకు బంగ్లాలోని అపోలో ఆస్పత్రిలో చికిత్స పొందుతూ తుది శ్వాస విడిచారు.

ఖలీదా జియా రాజకీయ జీవితానికి వస్తే.. ఆగతంలో మూడు సార్లు.. 1991-1996, 15 ఫిబ్రవరి 1996 - 30 మార్చి 1996, 2001-2006) దేశ ప్రధానిగా బాధ్యతలు నిర్వహించారు. ఖలీదా జియా.. 1945లో వ్యాపారవేత్త సికందర్‌ కుటుంబంలో జన్మించారు. 1960లో జియావుర్‌ రెహమాన్‌ను పెళ్లి చేసుకొన్నారు. బంగ్లా విమోచన యుద్ధంలో జియావుర్‌ పాకిస్తాన్ మీద తిరుగుబాటు చేసి యుద్ధంలో పాల్గొన్నారు. 1981లో ఆయన హత్యకు గురయ్యారు. ఆ తర్వాత బీఎన్‌పీలో నాయకత్వ సంక్షోభం ఏర్పడింది. దీంతో ఖలీదా జియా పార్టీ బాధ్యతలు స్వీకరించారు. ఆ తర్వాత పదేళ్లకు తొలిసారి ఆమె బంగ్లాదేశ్ ప్రధానిగా బాధ్యతలు స్వీకరించారు. బంగ్లాదేశ్ తొలి మహిళా ప్రధానిగా రికార్డు సృష్టించారు.