శ్రీ కృష్ణ జన్మస్థలం మధురలో సన్నీ లియోన్ న్యూ ఇయర్ ఈవెంట్.. తీవ్ర వ్యతిరేకత

కొత్త సంవత్సర వేడుకల వేళ ఉత్తర్‌ప్రదేశ్‌లోని పవిత్ర పుణ్యక్షేత్రం మథురలో జరగాల్సిన బాలీవుడ్ నటి సన్నీ లియోన్ డీజే షో చుట్టూ ముసురుకున్న వివాదానికి ఎట్టకేలకు ఫుల్ స్టాప్ పడింది. స్థానిక సాధువుల అభ్యంతరాలు, భక్తుల మనోభావాలను గౌరవిస్తూ.. ఆ షో నిర్వాహకులు ఈ కార్యక్రమాన్ని రద్దు చేస్తున్నట్లు అధికారికంగా ప్రకటించారు. శ్రీకృష్ణ జన్మభూమిగా వెలుగొందుతున్న మధురలోని ఒక ప్రతిష్ఠాత్మక హోటల్‌లో జనవరి 1వ తేదీ రాత్రి సన్నీ లియోన్ డీజే షో నిర్వహించాలని నిర్వాహకులు ఏర్పాట్లు చేశారు.

నూతన సంవత్సర స్వాగతం కోసం రాత్రి 8 గంటల నుంచి అర్ధరాత్రి 12 గంటల వరకు సాగే ఈ వేడుకకు టికెట్ల విక్రయాలు కూడా పూర్తి చేశారు. సుమారు 300 మంది అతిథుల కోసం కబానా, హట్ వంటి లగ్జరీ సీటింగ్ ఏర్పాట్లు కూడా ఆ హోటల్ యాజమాన్యం సిద్ధం చేసింది. అయితే సన్నీ లియోన్ ఈవెంట్‌కు సంబంధించిన వివరాలు బయటికి రాగానే స్థానిక బ్రజ్ ప్రాంత సాధువులు, ధార్మిక సంస్థలు తీవ్రస్థాయిలో మండిపడ్డాయి.

 మధుర వంటి ఆధ్యాత్మిక క్షేత్రంలో ఇలాంటి వినోద కార్యక్రమాలు నిర్వహించడం వల్ల నగర పవిత్రత దెబ్బతింటుందని వారు తీవ్ర ఆగ్రహం వ్యక్తం చేశారు. భజనలు, కీర్తనలతో మార్మోగాల్సిన మధురలో అశ్లీలతను ప్రోత్సహించే ప్రదర్శనలు సహించబోం అంటూ మధుర జిల్లా మెజిస్ట్రేట్‌కు ఫిర్యాదు చేశారు. నిరసనలు తీవ్ర స్థాయికి చేరి.. వ్యతిరేకత మిన్నంటడంతో పరిస్థితి తీవ్ర ఉద్రిక్తంగా మారింది. శ్రీ కృష్ణుడు పుట్టిన చోట ఇలాంటి షోలు నిర్వహించడం ఏంటని స్థానికులు తీవ్రంగా మండిపడుతున్నారు.

వెనక్కి తగ్గిన నిర్వాహకులు

సన్నీ లియోన్ డీజే షో పట్ల రోజురోజుకూ వ్యతిరేకత పెరగడాన్ని గమనించిన హోటల్ యజమాని మితుల్ పాఠక్.. ఆ ఈవెంట్‌ను రద్దు చేస్తున్నట్లు తాజాగా వెల్లడించారు. సన్నీ లియోన్‌ను కేవలం ఒక కళాకారిణిగానే ఆహ్వానించామని.. చట్టపరమైన అనుమతులు ఉన్నప్పటికీ.. సమాజం, సాధువుల సెంటిమెంట్లను గౌరవించడం తమకు ముఖ్యమని పేర్కొన్నారు. బ్రజ్ సంప్రదాయాలకు విరుద్ధంగా ఎలాంటి వేడుకలు జరపకూడదని నిర్ణయించుకున్నట్లు ఆయన వివరణ ఇచ్చారు.