టీకా వేయించుకొంటే అది ఫ్రీ

ఒకటి కొంటే ఇంకోటి ఫ్రీ  ఇది సహజంగా మనం వ్యాపార రంగ ప్రకటనలు చూసివుంటా. కానీ కరోనా పుణ్యమా అని టీకాలు వేయించుకొంటే మీకు ఇది ఫ్రీ అని ప్రకటించే పరిస్థితి వచ్చింది. సెకండ్ వేవ్‌తో దేశంలో కోవిడ్ వ్యాక్సిన్ ప్రక్రియ మొదలైంది. అన్ని రాష్ట్రాల్లో వ్యాక్సినేషన్ ప్రక్రియ ఇప్పటికీ కొనసాగుతుంది. అయితే నగరాల్లో ప్రజలు వారంతట వారే టీకాలు వేయించుకుంటున్నారు. కానీ గ్రామాల్లో మాత్రం ఈ ప్రక్రియ మందకొడిగా సాగుతుంది. ముఖ్యంగా రాజస్థాన్‌లో పలు గ్రామాల్లో టీకాలు వేయించుకునేందుకు అక్కడ ప్రజలు ముందుకు రావడం లేదు. దీనికోసం అక్కడ ఆరోగ్య శాఖ ఆలోచనలో పడింది. వ్యాక్సినేషన్‌ను పెంచడానికి వినూత్నమైన పద్ధతిని ఎంచుకుంది. అది మంచి ఫలితాలను కూడా ఇచ్చింది. జోధ్‌పూర్‌లోని గ్రామీణ ప్రాంతాల్లో వ్యాక్సినేషన్ ప్రక్రియ పెద్దగా జరగలేదు. టీకాలు తీసుకోవడానికి ఎవరూ ఇష్టపడలేదు. వ్యాక్సిన్‌లపై రకరకాల సందేహాలు, ఆందోళనలు వారిలో ఉండడంతో వ్యాక్సిన్‌ల జోలికి వెళ్లలేదు. అక్కడ ఆరోగ్య శాఖ వ్యాక్సినేషన్ డ్రైవ్‌ను పెంచడానికి ఓ ప్రోత్సాహక కార్యక్రమాన్ని ప్రారంభించింది. వ్యాక్సిన్ వేయించుకునేవారికి వంట నూనెను ఉచితంగా అందిస్తామని ప్రకటించింది. టీకా వేయించుకున్న వారికి స్వచ్ఛంద సంస్థల సహాయంతో ఫ్రీగా లీటర్ నూనె ప్యాకెట్లను అందించింది. దీనికి జనాల నుంచి మంచి రెస్పాన్స్ వచ్చింది. చాలామంది టీకాలు వేయించుకుని ఆ నూనె ప్యాకెట్లను అందుకున్నారు. ఒక్కరోజులో 15,000 లీటర్ల ఆయిల్‌ పంపిణీ అయింది. అంటే అక్కడ ఎంత మంది టీకాలు వేయించుకున్నారో అర్థం చేసుకోవచ్చు. అక్కడి ప్రభుత్వం జనవరి 31వ తేదీకల్లా ప్రజలంతా వ్యాక్సిన్ ఫస్ట్ డోస్, సెకండ్ డోస్ తీసుకునేలా టార్గెట్‌గా పెట్టుకుంది. ప్రజల దగ్గరికి వెళ్లి మరీ వ్యాక్సిన్లు ఇస్తుంది. కలెక్టర్ల సహాయంతో ప్రతి జిల్లాలో వ్యాక్సినేషన్ ప్రక్రియ జోరుగా సాగేలా చూస్తోంది. కాగా దేశంలో కోవిడ్ కేసులు పెరగడంతో 15 నుంచి 18 ఏళ్ల పిల్లలకు ప్రభుత్వం టీకాలు ఇవ్వడం రీసెంట్‌గా ప్రారంభించింది. దీనికి పెద్దఎత్తున స్పందన వచ్చింది. లక్షలాది మంది పిల్లలు వ్యాక్సిన్ల కోసం రిజిస్టర్ చేసుకున్నారు. కోవిడ్ కేసుల పెరుగుదలతో బూస్టర్ డోస్ ఇచ్చే ఆలోచనలో కూడా ప్రభుత్వం ఉంది.