రోడ్లను కప్పేసిన మంచు

అమెరికా రోడ్లను పొగముంచు కప్పేసింది. రహదార్లు కనబడక వాహనదార్లు నానా యాతనపడ్డారు. పది నిమిషాలో.. పావుగంటో ట్రాఫిక్‌లో చిక్కుకుంటేనే చాలు చికాకుపడిపోతాం. అలాంటిది ఒక రోజంతా వాహనదారులు ట్రాఫిక్‌లో ఉండిపోయారు. మంచు కారణంగా ఆ పరిస్థితి ఏర్పడింది. అమెరికాలోని వర్జీనియాలో భారీగా మంచు కురిసింది. దాంతో అక్కడ రోడ్డుపై 12 అంగుళాల ఎత్తు వరకూ మంచు పేరుకుపోయింది. దాంతో ఇంటర్ స్టేట్ 95 హైవేపై వాహనాలు నిలిచిపోయాయి. దాదాపుగా 80 కిలో మీటర్ల వరకూ కార్లు, ట్రక్కులు, బైక్‌లు ఆగిపోయాయి. అలా 24 గంటల పాటు ట్రాఫిక్ స్తంభించిపోయింది. సోమవారం మధ్యాహ్నం నుంచి మంగళవారం వరకూ వాహనదారులు అలా రోడ్లపైనే ఉండిపోయారు. వందలాది సంఖ్యలో వాహనాలు నిలిచిపోయాయి. విపరీతంగా కురుస్తోన్న మంచు కారణంగా ఈ పరిస్థితి ఏర్పడింది. వారి దగ్గర తినడానికి ఆహారం, తాగడానికి నీళ్లు లేక చాలా ఇబ్బందులు ఎదుర్కొన్నారు. అయితే అక్కడి ప్రభుత్వం రంగంలోకి దిగి ట్రాఫిక్‌ను క్లియర్ చేయడానికి వెంటనే చర్యలు తీసుకుంది. రోడ్లపై పేరుకుపోయిన మంచును తొలగించింది. ఆ తర్వాత హైవే‌పై ట్రాఫిక్ క్లియర్ అయిందని రాష్ట్ర రవాణా శాఖ ట్వీట్ చేసింది. అయితే రాత్రి సమయంలో ఉష్ణోగ్రతలు మళ్లీ గడ్డకట్టే స్థాయికి తగ్గుతాయని, అనవసరమైన ప్రయాణాలను తగ్గించుకోవాలని సూచించింది.ఈ ట్రాఫిక్ జామ్‌లో చిక్కుకుని సోమవారం మధ్యాహ్నం బయల్దేరిన వారు ఇళ్లకు మంగళవారం చేరుకున్నారు. ఈ అనుభవానికి సంబంధించిన ఫోటోలను వాహనదారులు సోషల్ మీడియాలో షేర్ చేస్తూ.. తమ ఇబ్బందులను అందరికి తెలియజేశారు. తిండి లేక, నీళ్లు లేక ఎదుర్కొన్న ఇబ్బందులను తెలియజేస్తూ ఫోటోలను షేర్ చేశారు. రోడ్ల మధ్య పడిపోయిన చెట్లు, పేరుకుపోయిన మంచు కారణంగా ఇంత ట్రాఫిక్ జామ్ అయిందని, వాటిని తొలగించడం కష్టమైందని అక్కడి అధికారులు కూడా చెప్పారు.