విషాదం.. అనుమానాస్పద స్థితిలో యువతి మృతి
Andhra Pradesh Telugu | Suryaa Desk | Published : Mon, Feb 07, 2022, 03:55 PM
ఏదో సాధించాలనే పట్టుదల, చదువులో చురుకుదనం ఆమె సొంతం. తన చదువు పూర్తయిన కొన్నాళ్లకే తల్లిదండ్రులను ఒప్పించి స్కిల్ డెవలప్మెంట్ శిక్షణలో చేరింది. స్నేహితురాళ్లతో కలిసి హాస్టల్లో ఉంటోంది. ఈ క్రమంలో ఉన్నపళంగా బాత్రూమ్లో స్పృహ తప్పి పడిపోయింది. ఆసుపత్రికి తీసుకెళ్తే, ప్రాణంపోయిందని వైద్యులు చెప్పారు. దీంతో ఆమె స్నేహితురాళ్లు నిర్ఘాంతపోయారు. తిరుపతిలో జరిగిన ఆ విషాధ ఘటనకు సంబంధించిన వివరాలిలా ఉన్నాయి.
చిత్తూరు జిల్లా వి.కోట మండలం ఆరుమాకులపల్లికి చెందిన వెంకటరత్నం రెడ్డి కుమార్తె అనిత(20) డిగ్రీ పూర్తి చేసింది. స్కిల్ డెవలప్మెంట్ శిక్షణ పొందేందుకు తిరుపతి రూరల్ పరిధిలోని తాటితోపు ప్రాంతంలో 2 నెలల క్రితం హాస్టల్లో చేరింది. ఆ భవనంలో 18 మంది యువతులు, 10 మంది యువకులు ఉంటారు. శిక్షణకు వెళ్లొచ్చిన తరువాత ఆమె శనివారం తన స్నేహితురాళ్లతో నవ్వుతూ మాట్లాడింది. కొద్ది సేపటికే బాత్రూమ్లో చలనం లేని స్థితిలో కనిపించింది. హాస్టల్ సిబ్బంది ఆమెను తిరుపతి రుయా ఆస్పత్రికి తరలించారు. ఆమె తల్లిదండ్రులకు సమాచారం అందించారు. వైద్యులు పరీక్షించి, మృతి చెందినట్లు నిర్ధారించారు. ఎన్నో ఆశలతో పెంచుకున్న తమ కుమార్తె మృతి చెందడం చూసి, ఆమె తల్లిదండ్రులు బోరున విలపించారు. మృతురాలి శరీరంపై గాయాలున్నాయని పోలీసులకు ఫిర్యాదు చేశారు. పోలీసులు కేసు నమోదు చేసి, మృతదేహాన్ని పోస్టుమార్టం నిమిత్తం ఎస్వీ మెడికల్ కళాశాలకు తరలించారు.
|
|