మార్చి 1 నుంచి వైద్య ప్రవేశాలకు ఆప్షన్ల నమోదు

ఎన్టీఆర్‌ ఆరోగ్య విశ్వవిద్యాలయం ఆధ్వర్యంలో రాష్ట్రంలోని ప్రభుత్వ, ప్రైవేటు వైద్య కళాశాలల్లో చేపడుతున్న ప్రవేశాల ప్రక్రియలో మంగళవారం నుంచి ఆప్షన్ల నమోదు ఆరంభం కాబోతోంది. ఇప్పటికే తాత్కాలిక మెరిట్‌ జాబితాను విశ్వవిద్యాలయం విడుదల చేసింది. దీనిలో అభ్యంతరాలను స్వీకరించిన తర్వాత మంగళవారం తుది జాబితాను విడుదల చేయనున్నారు.

అనంతరం అభ్యర్థులు వారి ప్రాధాన్యతా క్రమంలో కళాశాలలను ఎంపిక చేసుకునేందుకు ఆప్షన్లను నమోదు చేసుకునే అవకాశం కల్పిస్తారు. వైద్య ప్రవేశాల కోసం 13, 133మంది అభ్యర్థులు దరఖాస్తు చేసుకున్నారు. వారిలో కొంతమంది దరఖాస్తుల్లో సరైన ధ్రువీకరణ పత్రాలు పెట్టలేదని అధికారులు తెలిపారు. దీంతో 12, 821మందితో కూడిన తాత్కాలిక మెరిట్‌ జాబితాను ప్రస్తుతం విడుదల చేశారు. ఆర్మీ, ఎన్‌సీసీ, వికలాంగులకు సంబంధించిన మెరిట్‌ జాబితాలు ఆయా సంస్థల డైరెక్టరేట్‌ల నుంచి విశ్వవిద్యాలయానికి చేరాయి.

వికలాంగుల కోటాకు సంబంధించి 38మంది మెడికల్‌ బోర్డు ఎదుట హాజరయ్యారు. వారిలో కొందరికి మరిన్ని వైద్య పరీక్షలు చేయమంటూ మెడికల్‌ బోర్డు ఆదేశించింది. ఆంగ్లో ఇండియన్‌ కోటాకు సంబంధించి ఒకే ఒక్క సీటు విజయవాడ సిద్ధార్థ వైద్య కళాశాలలో ఉండగా దరఖాస్తు కూడా ఒక్కటే వచ్చింది. పోలీసు సంతతికి సంబంధించిన కోటా కోసం ఎవరూ దరఖాస్తు చేసుకోలేదు. ఆప్షన్లను నమోదు చేసిన తర్వాత మొదటి విడత కౌన్సెలింగ్‌ను మార్చి మొదటి వారంలో చేపడతారు. మార్చి మూడో వారంలోగా మూడో విడత పూర్తిచేస్తామని అధికారులు పేర్కొంటున్నారు. వైద్య ప్రవేశాల కౌన్సెలింగ్‌ మార్చి 19 నాటికి పూర్తవుతుందని తెలిపారు.