రష్యా యాడ్స్ పై సోషల్ మీడియా సంస్థల నిషేధం

మారిన పరిస్థితుల్లో నేడ సోషల్ మీడియాకు అత్యంత ఆదరణ పెరుగుతోంది. దీంతో వాణిజ్య ప్రకటనల పరంగా కూడా ఈ ప్లాట్ ఫాంలో మంచి డిమాండ్ ఉంది. ఇకక విషయంలోకి వెళ్లితే రష్యా దేశ యాడ్స్‌ను ఫేస్‌బుక్ బ్యాన్ చేసింది. ఉక్రెయిన్‌పై యుద్ధ నేపథ్యంలో ఫేస్‌బుక్ యాజమాన్యం ఈ నిర్ణయం తీసుకుంది. అదే సమయంలో ఉక్రెయిన్‌లో పరిస్థితిని నిరంతరం గమనిస్తుంటామని తెలిపింది. "ప్రపంచంలో ఎక్కడైనా మా ప్లాట్‌ఫారమ్‌లో ప్రకటనలను అమలు చేయకుండా లేదా డబ్బు ఆర్జించకుండా మేము ఇప్పుడు రష్యన్ స్టేట్ మీడియాను నిషేధిస్తున్నాము" అని సోషల్ మీడియా దిగ్గజ భద్రతా విధాన అధిపతి నథానియల్ గ్లీచెర్ ట్విట్టర్‌లో వెల్లడించారు. అంతేకాదు రష్యన్ స్టేట్ మీడియాకు లేబుల్స్‌ను వేయడం కొనసాగిస్తామని, ప్రపంచవ్యాప్తంగా ఫేస్‌బుక్‌లో రష్యన్ స్టేట్ మీడియా అడ్వర్టయిజ్‌మెంట్లు ప్రచురితం కాబోవని నథానియల్ గ్లీచెర్ తెలిపారు. ఈ మార్పులు ఇప్పటికే ప్రారంభమయ్యాయని, ఈ వారాంతంలో కూడా కొనసాగుతాయని ఫేస్‌బుక్ తెలియజేసింది. అలాగే ఉక్రెయిన్‌లో పరిస్థితిని నిశితంగా పరిశీలిస్తున్నామని, వారి ప్లాట్‌ఫారమ్‌లో ప్రజలను రక్షించడానికి వారు తీసుకుంటున్న చర్యలను భాగస్వామ్యం చేస్తూనే ఉంటామని ఫేస్‌బుక్ ప్రకటించింది. మరోవైపు " ప్రభుత్వ యాజమాన్యంలోని నాలుగు రష్యన్ మీడియా సంస్థలు ఫేస్‌బుక్‌లో పోస్ట్ చేసిన కంటెంట్ స్వతంత్ర వాస్తవ తనిఖీ, లేబులింగ్‌ను నిలిపివేయాలని అక్కడి అధికారులు మమ్మల్ని ఆదేశించారు. కానీ మేము నిరాకరించాము." అని అని మెటా సంస్థ నిక్ క్లెగ్ ఒక ప్రకటనలో తెలిపారు. యూఎస్ టెక్ దిగ్గజం సెన్సార్‌షిప్‌కు పాల్పడిందని, రష్యన్ పౌరుల హక్కులను ఉల్లంఘిస్తోందని ఆరోపిస్తూ ఫేస్‌బుక్‌కు యాక్సెస్‌ను పరిమితం చేస్తున్నట్టు రష్యా మీడియా రెగ్యులేటర్ చెప్పిన కొన్ని గంటల తర్వాత నిక్ క్లెగ్ ప్రకటన వచ్చింది. ఇదిలావుంటే ఉక్రెయిన్‌పై రష్యా దండయాత్రలో సోషల్ మీడియా నెట్‌వర్క్‌లు ఒకటిగా మారాయి. ఇప్పటికే ట్విట్టర్ కూడా ఇదే విధంగా రష్యన్ స్టేట్ మీడియా అడ్వర్లయిజ్‌మెంట్లు, కంటెంట్ మానిటైజింగ్‌పై నిషేధం విధించింది.