గజేంద్రుడు మీదకు వచ్చినా..అదరలేదు..బెదరలేదు

భయంలో మనం ఏది తోచితే అదే చేసేస్తాం. కానీ ఆ సమయంలోనే సమయస్పూర్తి అవసరం. అదే తరహా ఘటన  ఇది. కేరళలో ఓ ఏనుగు హడలెత్తించింది. అటుగా వచ్చే బస్సు మీదకు వెళ్లి తన తొండంతో బస్సు అద్దాన్ని పగులగొట్టే ప్రయత్నం చేసింది. దాంతో అద్దం కొద్దిగా పగిలిపోయింది. అయితే కొద్దిసేపటికే ఏనుగు బస్సుకు దూరంగా వెళ్లడంతో అందరూ ఊపిరి పీల్చుకున్నారు. ఏనుగు బస్సు దగ్గర ఉన్నంతసేపు డ్రైవర్ ఏ మాత్రం బెదరలేదు. ఎంతో ధైర్యంగా ఉండి.. ఏనుగు అడ్డు తప్పుకోగానే ఒక్కసారి స్పీడ్ పెంచి బస్సును అక్కడ నుంచి తీసుకెళ్లిపోయాడు. మంగళవారం బస్సు మున్నార్‌కు వెళ్తుండగా సాయంత్రం నాలుగు గంటల సమయంలో ఇది జరిగింది. అయితే బస్సులో ఉన్న ఓ ప్రయాణికుడు ఏనుగు చేసిందంతా ఫోన్ కెమెరాతో వీడియో తీశాడు. అది సోషల్ మీడియాలో చక్కర్లు కొడుతుంది. డ్రైవర్ రోడ్డుపై మలుపు తీసుకున్న వెంటనే అక్కడ నిలబడి ఉన్న ఏనుగును చూసి వెంటనే బస్సు ఆపడం, ఏనుగు బస్సు దగ్గరకొచ్చి నానా హంగామా చేయడం వీడియోలో చూడొచ్చు. తన దంతాల కారణంగా బస్సు అద్దాలు కొంచెం పగిలాయి. ఈ వీడియోను ఐఏఎస్ అధికారిణి సుప్రియా సాహుతో సహా పలువురు చాలామంది షేర్ చేశారు.

ఈ బస్సు డ్రైవర్ ఎవరో తెలియదు కానీ అతను కచ్చితంగా మిస్టర్ కూల్. అతను ఏనుగును డీల్‌ చేసిన విధానాన్ని చూస్తే వారి మధ్య ఎప్పుడూ జరిగే తంతులా ఉందని పేర్కొంటూ సుప్రియా సాహూ ట్విట్టర్‌లో పోస్ట్ చేశారు. ఏనుగు ఉన్నంత వరకు డ్రైవర్ ప్రశాంతంగా ఉండడంతో చాలామంది నెటిజన్లు ప్రశంసలు కురిపిస్తున్నారు. డ్రైవర్‌కి నిజంగా దమ్ము ఉందని, తాను అయితే అలా చేసి ఉండనని ఒక నెటిజన్ కామెంట్ పెట్టారు. ఐఏఎస్ అధికారి సుప్రియాసాహూ పోస్ట్ చేసిన ఈ వీడియోను 15 వేలమందికిపైగా వీక్షించారు.