విదేశాలకు పారిపోయేందుకు శ్రీలంక ప్రధాని ప్లాన్
international | Suryaa Desk | Published : Sat, Apr 09, 2022, 01:34 PM
ప్రస్తుతం శ్రీలంకలో పరిస్థితులు రోజురోజుకూ విషమిస్తున్నాయి. ఆ దేశంలో ఏర్పడిన ఆర్థిక సంక్షోభం కారణంగా ప్రజలు తీవ్ర ఇబ్బందులు పడుతున్నారు. నిత్యావసర వస్తువుల ధరలు భారీగా పెరుగుదల, కరెంట్ కోతలపై ప్రజల్లో ఆగ్రహావేశాలు పెల్లుబికుతున్నాయి. దీంతో ఏప్రిల్ 1 నుంచి ఆ దేశంలో ఎమర్జెన్సీ విధించారు. అయినప్పటికీ ఆంక్షలను లెక్క చేయకుండా ప్రజలు భారీ ఎత్తున నిరసనలు చేపడుతున్నారు. దేశాధ్యక్షుడిగా గొటబయ రాజపక్స, ప్రధానిగా మహేంద్ర రాజపక్స రాజీనామా చేయాలని ప్రజలు డిమాండ్ చేస్తున్నారు. వారి ఇళ్ల వద్దకు భారీగా చేరుకుని దాడులు చేస్తున్నారు. సైన్యం రంగంలోకి దిగినా, పరిస్థితి మెరుగు పడడం లేదు. దీంతో ప్రధాని ప్రాణాలకు ముప్పు ఉందని అధికారులు భావిస్తున్నారు. ఈ తరుణంలో ప్రజాగ్రహం చల్లారే వరకు విదేశాలకు వెళ్లిపోయే యోచనలో ప్రధాని మహేంద్ర రాజపక్స ఉన్నట్లు తెలుస్తోంది. దీనిపై స్థానికంగా జోరుగా ప్రచారం సాగుతోంది. మరోవైపు శ్రీలంకలో ఆహార పదార్ధాల ధరలు ఆకాశాన్నంటుతున్నాయి. కిలో చక్కెర రూ.240కి, కిలో బియ్యం ధర రూ.200, లీటర్ కొబ్బరి నూనె రూ.750, ఒక్క కోడిగుడ్డు రూ.30 చెల్లించి, కొనుక్కోవాల్సిన దుస్థితి నెలకొంది. కిలో పాలపొడి సైతం రూ.2 వేలు దాటింది. భారీ ధర పెట్టి కొందామనుకున్నా, దుకాణాల్లో నో స్టాక్ బోర్డులు దర్శనమిస్తున్నాయి.
|
|